ەلوردادا «استانا قالاسىنداعى كولىك تۇراعىن باسقارۋ» جوباسىنىڭ ءبىرىنشى كەزەڭى باستالدى.
472 ورىنعا ارنالعان كولىك تۇراعى «نۇرجول» ساياجولىندا ورنالاسقان. قازىرگى تاڭدا كولىك سالاسىنىڭ ماماندارى اۆتوكولىك يەلەرىنە تاريف, تولەم تاسىلدەرىنە قاتىستى تۇراقتى پايدالانۋ ەرەجەلەرىن تۇسىندىرۋدە.
«استانا قالاسىنداعى كولىك تۇراعىن باسقارۋ» جوباسى ەلوردانىڭ كولىك كەشەندەرىن جاڭعىرتۋ باعدارلاماسى اياسىندا قولعا الىنىپ, ۆوكزال ماڭى, كوممەرتسيالىق پاركينگتەر, جولشىباي تۇراقتار بويىنشا كوشە-جول جەلىلەرىن قامتاماسىز ەتۋ ماقساتىندا جۇرگىزىلۋدە. اتالعان باسقارۋ جۇيەسى قالاداعى كولىك قوياتىن ورىندارعا مونيتورينگ جۇرگىزۋ ءۇشىن, جۇرگىزۋشىلەرگە بوس ورىندار تۋرالى اقپارات بەرۋگە, جول قوزعالىس ەرەجەسى بۇزىلعان جاعدايدا جانە تۇراق ورىندارىنا اقى تولەنبەگەن كەزدەردە اۆتوماتتى تۇردە تىركەۋ ءۇشىن قولعا الىنىپ وتىر.
پيلوتتىق جوبا قۇرامىنا 9 مىڭ كولىك قوياتىن ورىندى قامتيتىن كوشە-جولداردىڭ جەلىسى قاراستىرىلعان. باعدارلاما جۇرەتىن جولدىڭ بولىگىندە ۇزاق ۋاقىتقا قوياتىن اۆتوموبيلدەردى ازايتۋ ارقىلى كوشە-جولدار جەلىسىندەگى جۇكتەمەلەردى 20-30 پايىزعا كەمىتۋگە, كولىك تۇراقتارىنىڭ كەڭىستىگىندەگى كورسەتكىشتى 40-50 پايىزعا ازايتۋعا جانە قوعامدىق كولىكتەرگە سۇرانىستى 15-20 پايىزعا كوبەيتۋگە باعىتتالعان. سونىمەن قاتار, جوبا قالا ورتالىعىنداعى كولىك قوزعالىسىنىڭ جىلدامدىعىن ارتتىرۋعا مۇمكىندىك بەرەدى. كولىكتىڭ قاتىسۋىمەن بولاتىن اپاتتى وقيعالاردى 70-80 پايىزعا دەيىن ازايتىپ, جاياۋ جۇرگىنشىلەردىڭ, قوعامدىق كولىك قۇرالدارى مەن اۆتوموبيلدەردىڭ قوزعالىسىنا قولايلى جاعداي جاساۋعا ىقپال ەتەدى دەپ كۇتىلۋدە.
جوبانى تەستىلەۋ كەزىندە كولىك يەلەرىنەن جاڭا جۇيەمەن كەڭىرەك تانىسۋ ماقساتىندا تۇراققا كولىكتى قويۋ ءۇشىن اقى تولەۋدىڭ قاجەتى جوق دەيدى جوبا ازىرلەۋشىلەرى.كولىك قوزعالىسى كوپ جەرلەردە اقىلى تۇراقتاردى قويۋ ارقىلى بىرقاتار ماڭىزدى ماسەلەلەردىڭ ءتۇيىنى شەشىلمەك. الەمدىك تاجىريبە بويىنشا, وسىنداي جوبالار – كەپتەلىستىڭ ورىن الماۋى مەن جول ەرەجەسىن بۇزۋ كورسەتكىشىن تومەندەتەتىن ءتيىمدى تاسىلدەردىڭ ءبىرى. ەلوردا تۇرعىندارى مەن قوناقتارى تولىعىراق اقپاراتتى Call-ورتالىقتىڭ 8 800 080 28 88 ءنومىرى ارقىلى نەمەسە www.astra-park.com رەسمي سايتىنان بىلە الادى.
گۇلدانا تالعاتقىزى
