حالىققا قىزمەت كورسەتۋ ورتالىقتارىندا اۆتوكولىكتى ءبىر ساعات ىشىندە تىركەۋگە مۇمكىندىك بەرەتىن پيلوتتىق جوبا ىسكە قوسىلدى. ۋاقىتتى قىسقارتۋ ورتالىق ماماندارىنىڭ قر ءىىم اكىمشىلىك پوليتسياسى كوميتەتى مەن قر قارجى مينيسترلىگىنىڭ اقپاراتتىق جۇيەلەرىنە تۇزەتۋ قۇقىعىنسىز كىرۋ مارتەبەسىن العاننان كەيىن مۇمكىن بولىپ وتىر.
«ازاماتتارعا ارنالعان ۇكىمەت» مەملەكەتتىك كورپوراتسياسى» اق باسقارما توراعاسى دانيار ەرەنچينوۆتىڭ ايتۋىنشا, بۇرىن كولىك يەلەرى 40 مينۋتتان اسا ۋاقىتىن ءتيىستى مامانداردا ايىپپۇلدار مەن سالىقتار تولەۋگە جۇمسايتىن. «جوبانى ىسكە قوسقانعا دەيىن حالىققا قىزمەت كورسەتۋ ورتالىعىنا كەلگەن كليەنت 3 ەلەكتروندىق كەزەك تالونىن الاتىن. ءبىرى – ايىپپۇلداردى تەكسەرۋ ءۇشىن اكىمشىلىك پوليتسياسى قىزمەتكەرىنە, ەكىنشىسى – سالىق تولەمدەرىن تەكسەرۋ ءۇشىن سالىق قىزمەتكەرىنە, ءۇشىنشىسى – تولىق قۇجاتتار توپتاماسىن وتكىزۋ ءۇشىن حقكو قىزمەتكەرىنە بولاتىن. بۇل رەتتە, ەگەر ازاماتتىڭ تولەنبەگەن ايىپپۇلدارى مەن سالىقتارى بار بولسا, ونى تولەۋ ءۇشىن كاسساعا بولەك كەزەككە تۇراتىن. ەندى مەملەكەتتىك كورپوراتسيا قىزمەتكەرى كليەنتتىڭ اۆتوكولىگىنە ايىپپۇلدارى نەمەسە سالىق بەرەشەكتەرى بار-جوعىن ءوز بەتىنشە تەكسەرە الادى. ەگەر بار بولسا, ەلەكتروندىق ۇكىمەت پورتالىنىڭ تولەم ءشليۋزى ارقىلى كارتوچكامەن تولەۋگە بولادى نەمەسە مامانداندىرىلعان حقكو عيماراتىندا ورنالاسقان بانك كاسسالارى ارقىلى تولەي الادى» دەيدى ول.
كولىكتى قايتا تىركەۋ مەملەكەتتىك قىزمەتىنىڭ مەرزىمىن ساقتاۋدى سيتۋاتسيالىق ورتالىقتىڭ ماماندارى قاداعالاپ وتىرادى. قۇجاتتار مەرزىمى بۇزىلعان جاعدايدا, ونىڭ سەبەبىن انىقتاپ, الداعى ۋاقىتتا بۇزۋشىلىققا جول بەرمەۋ شارالارىن قابىلدايدى.
ايتا كەتسەك, مامانداندىرىلعان حالىققا قىزمەت كورسەتۋ ورتالىقتارىندا ەلىمىز بويىنشا كولىكتەردى قايتا تىركەۋ قىزمەتتەرىن 435 706 قازاقستاندىق پايدالانعان ەكەن.
