«تسيفرلى قازاقستان» بۇگىننەن باستالادى. وسىلاي دەپ شەشكەن «زەردە» ۇلتتىق ينفوكوممۋنيكاتسيالىق حولدينگى قالالىق اكىمدىكپەن, اقپارات جانە كوممۋنيكاتسيا مينيسترلىگىمەن بىرلەسىپ, باستاۋىش سىنىپ وقۋشىلارىنا باعدارلامالاۋ ءىسىن ۇيرەتۋدى قولعا الدى. قاناتقاقتى جوباعا 12 باستاۋىش سىنىپتا وقيتىن 373 وقۋشى قاتىستى.
2017-2018 وقۋ جىلىندا ەنگىزىلگەن فاكۋلتاتيۆ كۋرسىنىڭ ناتيجەلەرىمەن تانىسۋ ءۇشىن №27 مەكتەپ-ليتسەيىنە استانا قالاسى اكىمىنىڭ ورىنباسارى ماليكا بەكتۇروۆا كەلدى. اشىق ساباقتا باعدارلامالاۋدى جىل بويى مەڭگەرگەن بالالار ءوز جوبالارىن تانىستىردى. ويىندار, مۋلتفيلمدەر جانە ءىت-جوبالاردى كورىپ بولعان سوڭ, «وزدەرىڭىز بىلەتىندەي, الدىڭعى باعدارلاماعا سايكەس ينفورماتيكانى وقىتۋ 7 سىنىپتان باستالعان بولاتىن, ونىڭ ءوزى فاكۋلتاتيۆ رەتىندە ەدى. ال قازىرگى باعدارلاما ويىن تۇرىندە ۇسىنىلعان. الەمدە بالالار باعدارلامالاۋ ءتىلىن سكرەتچ ادىسىمەن ۇيرەنۋ ءۇردىسى كەڭىنەن تارالىپ كەلەدى. بۇل پلاتفورمادا وقۋشىلار انيماتسيا ارقىلى مۋلتفيلم مەن ويىن قۇراستىرىپ, كليپ تۇسىرە الادى» دەدى اكىم ورىنباسارى.
