بۇرناعى كۇنى «استانا كەشتەرى» اتتى حالىقارالىق ونەر فەستيۆالى مارەسىنە جەتتى. ءۇش كۇنگە سوزىلعان ونەرى مەرەكەسى ءۇش جىلدان بەرى استانا تويىنىڭ دۋمانىن ارتىرىپ كەلەدى. ايتۋلى شارانى «دەگدار» گۋمانيتارلىق قورىنىڭ قامقورلىق جونىندەگى ءتورايىمى داريعا نازارباەۆا ۇيىمداستىردى. الەم ەلدەرىنىڭ ونەر جۇلدىزدارىن قازاق ساحناسىندا شىرقاتقان فەستيۆالدىڭ العاشقىسىنا ەلباسى نۇرسۇلتان نازارباەۆ قاتىسقانى ەسىمىزدە.
بيىلعى «استانا كەشتەرى» بەيبىتشىلىك جانە كەلىسىم سارايىندا باستالدى. قۇرمانعازى اتىنداعى قازاق مەملەكەتتىك اكادەميالىق وركەسترى قالا تۇرعىندارى مەن قوناقتارىن تۇركەشتىڭ «كوڭىلاشار» كۇيىمەن قارسى الدى. قۇرامىندا سەكسەن كوركەمونەرپاز بار وركەستر ىلە-شالا احمەت جۇبانوۆتىڭ «بي», تاتتىمبەتتىڭ «سارىجايلاۋ» كۇيلەرىن ورىندادى. كەشكە جينالعان كورەرمەن قانات ءامىرحانوۆ, ەرلان رىسقالي سىندى ءداستۇرلى انشىلەردىڭ دە ونەرىن تاماشالادى. ەسكە سالا كەتكەن ءجون, بيىل ونەر ۇجىمىنىڭ ىرگە قالاعانىنا سەكسەن جىل تولىپ وتىر.
وسى كۇنى بەيبىتشىلىك جانە كەلىسىم سارايىندا بەلگىلى فوتوسۋرەتشى ۆاديم سولوۆەۆتىڭ جەكە كورمەسى اشىلدى. كوپشىلىك نازارىنا ۇسىنىلعان جيىرما شاقتى كارتينا اسسى, كۇمىستوبە ءوڭىرلەرىندەگى شوپانداردىڭ ءومىرىنەن, كۇندەلىكتى تىنىس-ءتىرشىلىگىنەن حابار بەرەدى.
فەستيۆال اياسىنداعى شارالار لەگى «استانا-وپەرا» تەاترىنىڭ كامەرالىق زالىندا جالعاستى. وندا يتاليالىق بەلگىلى سوپرانو نينو لەجاۆا مەن ەلىمىزدىڭ ەڭبەك سىڭىرگەن قايراتكەرى تيمۋر ۋرمانچەەۆ كونتسەرت بەردى. مۋزىكالىق كەشتە اتاقتى بەلكانتو اريالارى مەن سەرگەي راحمانينوۆتىڭ رومانستارى شىرقالدى. شارانى ۇيىمداستىرۋشىلاردىڭ وكىلى لاۋرا احمەتوۆا قالا تۇرعىندارى مەن قوناقتارىنىڭ فەستيۆالدى اسىعا كۇتكەنىن ايتادى. «استانا تويى – الاشتىڭ تويى. ەلدىگىمىزدىڭ وسىنداي ۇلكەن مەرەكەسىنە الىس-جاقىن شەت ەلدەردىڭ مادەنيەت مايتالماندارى ۇلەس قوسۋدا. بۇل سوزىمە «استانا كەشتەرىنىڭ» كونتسەرتتەرى كۋا» دەيدى ول.
فەستيۆال رەسەيدىڭ جەزتاڭداي ءانشىسى ولەگ پوگۋدين مەن ازەربايجاندىق ءداستۇرلى مۋگام ورىنداۋشىلارى ءانسامبلىنىڭ كەشتەرىنە ۇلاستى. جەكسەنبى كۇنگى قورىتىندى كونتسەرتتە «استانا» سيمفونيالىق وركەسترىمەن بىرگە رەسەيدىڭ حالىق ءارتىسى لاريسا دولينا مەن ەڭ ۇزدىك دجاز ترۋباشىلارىنىڭ ءبىرى ۆاديم ەيلەنكريگ ونەر كورسەتتى. ونەرپازدار جاندى داۋىسپەن ءتۇرلى جانرداعى اندەردى ناقىشىنا كەلتىرە ورىندادى.
ايتا كەتەرلىگى, قايىرىمدىلىق باعىتىنداعى مەرەكەلىك كەشتەردىڭ بيلەتتەرى كورەرمەنگە تەگىن تاراتىلدى. «استانا كەشتەرى» فەستيۆالىنىڭ اتقارۋشى پروديۋسەرى نۇرگۇل سۇلەيمەنوۆا فەستيۆالعا قالاداعى ۇلى وتان سوعىسى ارداگەرلەرى مەن مۇگەدەكتەر ارنايى شاقىرىلعانىن جەتكىزدى.
