قايىرىمدى جاندار ۆەلوسيپەدكە قونادى
استانا تويىنا وراي «قايسار كەرۋەن» اشىق بۇقارالىق ۆەلوجارىسى ۇيىمداستىرىلادى. بۇل قايىرىمدىلىق باعىتىنداعى شارا 29 ماۋسىم كۇنى سالتانات سارايى الدىنداعى الاڭنان باستالادى. ۆەلوجارىسقا كەز كەلگەن استانا قالا تۇرعىنى مەن قوناعى قاتىسا الادى.
جارىس الدىندا ءار قاتىسۋشىعا لوتەرەيا بيلەتىنىڭ ءنومىرى ۇسىنىلادى. ءساتتى ءنومىر سايكەس كەلگەن ۆەلوشاباندوزدارعا جيىرما جاڭا ۆەلوسيپەد تارتۋ ەتىلمەك. اۋكتسيون مەن ۆەلوجارىستان تۇسكەن قارجى مۇمكىندىگى شەكتەۋلى جاندار اراسىندا سپورتتى دامىتىپ جۇرگەن «قايسار» سپورت كلۋبىنىڭ تالىمگەرلەرىنە بەرىلەدى.
ۆەلوجارىس بارىسىنداعى قايىرىمدىلىق شاراسىنا سەرىك ساپيەۆ, يليا يلين, باقتيار ارتاەۆ, ەرماحان يبرايىموۆ, يۋري مەلنيچەنكو سىندى وليمپيادا جەڭىمپازدارى مەن مەتسەناتتار, وتاندىق ەسترادا جۇلدىزدارى كەلەدى. سونىمەن بىرگە, «استانا» ۆەلوكومانداسىنىڭ اتىنان لوتتى اۋكتسيون ۇيىمداستىرىلادى.
ۆەلوجارىستىڭ بارلىق باعدارىندا العاشقى مەديتسينالىق كومەك كورسەتۋ جانە قان قىسىمىن ولشەۋگە ارنالعان نۇكتەلەر قاراستىرىلعان. سالتانات سارايى الدىنداعى الاڭدا مينەرالدى سۋ تاراتۋ نۇكتەسى ورنالاسادى.
ۆەلوجارىس مارەسى – «سارىارقا» ۆەلوترەگى الاڭى.
قاتىسۋشىلاردى تىركەۋ ۋاقىتى – 8:00.
قاتىسۋشىلاردى قاتارعا تۇرعىزۋ ۋاقىتى – 8:40.
ۆەلوجارىستىڭ باستالۋ ۋاقىتى – 09.00.
ۆەلوجارىس مارەسى, قاتىسۋشىلاردى ساحنا الدىنا تۇرعىزۋ ۋاقىتى – 09:30.
«ۆەلوجارىستىڭ ەڭ جاس قاتىسۋشىسى», «ۆەلوجارىستىڭ ەڭ ەگدە قاتىسۋشىسى», «سپورتقۇمار وتباسى» اتالىمدارى بويىنشا ماراپاتتاۋ ۋاقىتى – 10:00.
قوزعالىس باعىتىنىڭ كارتاسى جەكە بەرىلەدى.
بۇل ۆەلوجارىس سپورتتىق دودا ەمەس, مۇنىڭ ماقساتى – سالاۋاتتى ءومىر سالتىن ناسيحاتتاۋ جانە جاستاردى بەلسەندى دەنە شىنىقتىرۋ مادەنيەتىنە, اسىرەسە, ۆەلوسيپەد سپورتىنا تارتۋ.
ءار استانالىق تىركەلۋ ارقىلى مۇمكىندىگى شەكتەۋلى جاندار اراسىندا سپورتتىڭ دامۋىنا ءوز ۇلەسىن قوسۋعا مۇمكىندىك الادى.
اسحات رايقۇل