«استانا تاڭداۋى-2014» جالپى قالالىق بايقاۋىنىڭ جەڭىمپازدارى انىقتالدى. «بايتەرەك» حالىقارالىق مەديا ورتالىعىنىڭ حابارلاۋىنشا, تاڭداۋلى استانالىقتار ەلوردا كۇنىنە وراي ماراپاتتالادى.
جەڭىمپازدارعا استانا اكىمى يمانعالي تاسماعامبەتوۆ كۋبوك پەن گراموتالار تابىستايدى, جۇلدەگەرلەرگە باعالى سىيلىقتار بەرىلىپ, حالىقتىڭ تانىمىنا يە بولادى. بۇعان قوسا, رەسپۋبليكالىق تەلەارنالاردان تاراتىلاتىن شاعىن فيلمدەر ءتۇسىرىلىپ, جەڭىمپازداردىڭ سۋرەتتەرى مەن جەتىستىكتەرى كورسەتىلگەن بيلبوردتار ورناتىلادى.
1-20 ماۋسىمدا استانا قالاسىنىڭ رەسمي سايتىندا بايقاۋ قاتىسۋشىلارىنا اشىق حالىقتىق داۋىس بەرۋ وتكىزىلگەن ەدى. كەشە جەتى ماماندىق بويىنشا ۇزدىكتەردىڭ ەسىمى بارشا قازاقستانعا بەلگىلى بولدى. اتاپ ايتقاندا, ۇزدىك مۇعالىم مايرا قۇرمانباەۆا 28 مىڭ داۋىس جينادى. ەلوردالىقتاردىڭ پىكىرىنشە, ۇزدىك دارىگەر – كيريلل چيچەروۆ. «جول جوندەۋشى» اتالىمىندا بەكزات مۋسەەۆ جەڭىسكە جەتتى, «ۋچاسكەلىك پوليتسيا ينسپەكتورى» – باۋىرجان تاۋماحانوۆ, ەنەرگياشىلار ىشىنەن ولجاس يششانوۆ توپ جاردى. ال ەركەن ۋماروۆ – ۇزدىك قۇرىلىسشى, سەرىك اداەۆ ۇزدىك قوعامدىق كولىك جۇرگىزۋشىسى اتاندى.
ەسكە سالايىق, «استانا تاڭداۋى» بايقاۋى العاش رەت ەكى جىل بۇرىن ۇيىمداستىرىلدى, ول كەزدە قاتىسۋشىلارعا 30 مىڭعا جۋىق ادام داۋىس بەرگەن. بيىل داۋىس بەرۋ كورسەتكىشى بويىنشا رەكورد ورناتىلدى – 163 908 داۋىس.
