ەلوردالىق كوپبالالى انالار تاراپىنان كوپتەگەن الەۋمەتتىك جوبالار جۇزەگە اسىرىلۋدا. سولاردىڭ ءبىرى – وقۋشىلارعا ارنالعان تەگىن وقىتۋ كۋرستارى.
كوپبالالى وتباسىلار ءۇشىن كۇردەلى ماسەلەنىڭ ءبىرى – بالالارىنا قوسىمشا ءبىلىم بەرۋ اقىسىن تولەۋگە اقشانىڭ جەتىسپەۋى. سونىڭ سالدارىنان ولار مەكتەپ پاندەرى بويىنشا رەپەتيتورلىق, شەت ءتىلى كۋرستارىنا بالالارىن قاتىستىرا المايدى. بۇل ماسەلەنى شەشۋ ماقساتىندا Strong mothers قوعامدىق قورى كوپبالالى وتباسىلاردىڭ وقۋشىلارى ءۇشىن تەگىن ءبىلىم بەرۋ كۋرستارىن اشقان.
قور ءۇش كوپبالالى انا – رايگۇل سەرىكباەۆا, جانار يسانوۆا جانە ۇلجان مىرزاگەلديەۆا باستاماسىمەن قۇرىلدى.
«جۇمىستى 1 ماۋسىمدا باستادىق. ءوزىم اعىلشىن ءتىلىنىڭ مۇعالىمىمىن, شەت تىلىندە ساباق جۇرگىزەمىن. ماعان ەكى ەرىكتى ستۋدەنت كومەكتەسەدى. سونداي-اق بىزدە كوپبالالى انا جۇرگىزەتىن اراب ءتىلى كۋرسى بار. ول ءبىر ەلشىلىكتە اۋدارماشى جانە دەمالىس كۇندەرى ساباق بەرەدى. ءوزى مىسىرداعى باكالاۆريات جانە ماروككوداعى ماگيستراتۋرانى بىتىرگەن. كوپبالالى وتباسىلاردىڭ بالالارى اعىلشىن جانە اراب ءتىلى ساباقتارىنا تەگىن قاتىسادى. بۇگىنگى تاڭدا مۇنداي وتباسىلار مۇشەلەرىنەن ون ادامنان تۇراتىن ءتورت وقۋشىلار توبى قۇرىلدى» دەپ اتاپ ءوتتى رايگۇل سەرىكباەۆا.
ورتالىقتا 100-دەن اسا بالا وقىتىلىپ, 10-نان اسا ادام جۇمىس ىستەيدى.
Strong mothers قوعامدىق قورىنىڭ ەكىنشى باعىتى – ەرىكتىلىك. الداعى ۋاقىتتا قوعامدىق قور كوپبالالى انالاردى تسيفرلىق ساۋاتتىلىققا وقىتۋمەن اينالىسۋدى جوسپارلاپ وتىر. بۇل ولاردىڭ ەلەكتروندى مەملەكەتتىك قىزمەتتەردى الۋى, قاجەتتى جاردەماقىلاردى رەسىمدەۋى ءۇشىن قاجەت. سونداي-اق قوعامدىق قور كوپبالالى ايەلدەرگە ارنالعان بوس جۇمىس ورىندارىنىڭ مالىمەتتەر بازاسىن جۇرگىزۋگە نيەتتى جانە زاڭ قىزمەتتەرىن الۋعا جاردەمدەسەدى.
«جالعىزباستى انالار كوپ. ولار بالالارىن كۇتىپ-باعۋ ءۇشىن اليمەنت تاعايىنداي المايدى. مۇنداي انالارعا بىلىكتى زاڭ كومەگى قاجەت» دەپ اتاپ ءوتتى قور وكىلى.
كوپبالالى انالار قۇرعان تاعى ءبىر الەۋمەتتىك كاسىپورىن – «التىن شاڭىراق» اتەلەسى. وسى جىلدىڭ ناۋرىز ايىندا ىسكە قوسىلعان جوبانىڭ نەگىزىن قالاۋشى جانە جەتەكشىسى – ءاسيا وسپانقۇلوۆا.
سەگىز بالانىڭ اناسى 2019 جىلى قالا اكىمى التاي كولگىنوۆتىڭ قابىلداۋىندا بولىپ, ەلوردالىق انالاردىڭ باسىن قوسىپ, ءوز ءىسىن باستاۋ يدەياسىنا ايتقان. ناتيجەسىندە قالا اكىمدىگى قولايلى ورىن ءبولىپ, دەمەۋشىلەر تىگىن جابدىقتارىن ساتىپ الۋعا كومەكتەستى, اتەلە ءوز جۇمىسىن باستادى.
العاشىندا اتەلەدە 8 انا جۇمىسىن باستاعان. قازاقتىڭ ۇلتتىق كيىمدەرى, كورپە-توسەگى, كيىز باسۋ, باسقا دا ۇلتتىق ونىمدەرىن زاماناۋي ۇلگىدە دايىندايتىن اتەلە جۇمىس اۋقىمىن كەڭەيتىپ, الداعى ۋاقىتتا جۇمىسپەن قامتۋ ورتالىعى ارقىلى تاعى دا 5-6 انانى جۇمىسقا الۋدى جوسپارلاپ وتىر.
«باسقا انالارىمىزعا ۇلگى كورسەتكىمىز كەلەدى. سونىمەن قاتار ءوزىمىز جۇمىس ىستەپ قانا قويماي, جۇمىس ورىندارىن قۇرۋعا دا نيەتتىمىز. باستاپقى كەزەڭدە جوباعا كورسەتكەن قولداۋى ءۇشىن قالا اكىمدىگىنە, التاي كولگىنوۆكە العىسىمىزدى بىلدىرەمىز. الدا ۇلكەن جوسپارلار بار. بىزگە بيلىك كومەك قولىن سوزدى, ەندى ءوزىمىز دە باسقا كوپبالالى انالارعا كومەكتەسە الامىز. الداعى ۋاقىتتا جاس انالارىمىزعا ارناپ وقۋ ورتالىعىن اشۋدى ويلاستىرىپ وتىرمىز. 20-عا جۋىق اناعا ارنالعان وقۋ ورتالىعىندا قولونەردىڭ قىر-سىرى ۇيرەتىلەتىن بولادى» دەيدى ءاسيا وسپانقۇلوۆا.
اتەلە باسشىسى كاسىپورىن ءوزىنىڭ الەۋمەتتىك مارتەبەسىن كوپبالالى انالاردى جۇمىسقا ورنالاستىرۋمەن عانا ەمەس, سونىمەن قاتار حالىق ءۇشىن قولجەتىمدى قىزمەت ۇسىنۋمەن دە دالەلدەپ وتىرعانىن ايتادى.
ەلوردادا مۇمكىندىگى شەكتەۋلى بالالاردى تاربيەلەپ وتىرعان انالار ءۇشىن «باقىتتى شاڭىراق» الەۋمەتتىك جوباسى ىسكە قوسىلدى.
«ءبىز مۇگەدەك بالاسى بار بۇكىل وتباسىن, ياعني اتا-انالاردى, دەنى ساۋ بالالاردى جانە ەرەكشە بالالاردى قولداۋمەن اينالىسامىز. ولارعا ءۇي-جايلار مەن جۇمىس ورىندارىن ۇسىنامىز, جۇمىس ىستەۋىنە ارنالعان جابدىقتار تاۋىپ بەرەمىز. انالار بيزنەستىڭ قىر-سىرىن ۇيرەنەدى, بولاشاقتا وزدەرى دە كاسىپ اشا الاتىن بولادى. ەرەكشە بالا تاربيەلەنەتىن اتا-انالارعا ىڭعايلى جۇمىس كەستەسى قاجەت, ويتكەنى ولار بالاسىن ۋاقىتىلى وڭالتۋعا بەيىمدەيدى. ءبىزدىڭ قوردىڭ ماقساتى – وسىنداي وتباسىلاردىڭ ءومىر ءسۇرۋ ساپاسىن جاقسارتۋ» دەپ اتاپ ءوتتى ورتالىق باسشىسى بوتاگوز سۇلتانوۆا.
ورتالىق ماۋسىم ايىندا اشىلدى. بۇگىنگى تاڭدا وندا 13 انا جۇمىسپەن قامتىلعان. جاقىندا ۇيىمدا جاڭا جۇمىس ءتۇرى – ەرەكشە قاجەتتىلىكتەرى بار بالالاردىڭ وتباسىلارىنا بارىپ, ولارعا كومەك نەمەسە قولداۋ كورسەتەتىن ءۇي كومەكشىسى قىزمەتى اشىلدى.
