كەشە ەلوردا اكىمى باقىت سۇلتانوۆ, ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ جانە قر يندۋستريا جانە ينفراقۇرىلىمدىق دامۋ ءمينيسترىنىڭ ءبىرىنشى ورىنباسارى قايىربەك وسكەنباەۆ كوپبالالى انالارمەن كەزدەستى.
كەزدەسۋ بارىسىندا كوپبالالى انالار باسپانا ماسەلەسىن ءسوز ەتتى. باقىت سۇلتانوۆ باس قالاداعى تۇرعىن ءۇي ماسەلەسى تۋرالى ءتۇسىندىردى. «بيىل كەزەكتە تۇرعان استانالىقتارعا 900 پاتەر بەرىلەدى. جىل ساناپ بەرىلەتىن پاتەرلەردىڭ سانىن كوبەيتۋگە كۇش سالۋدامىز. الايدا مەنىڭ دە قالا باسشىسى رەتىندە زاڭمەن شەكتەلەتىن قۇقىعىم مەن مىندەتىم بار. زاڭعا ءبارىمىز دە باعىنامىز. سوندىقتان باسپانا ماسەلەسىن شەشۋگە كاسىپكەرلەردى تارتۋعا جۇمىس ىستەپ جاتىرمىز» دەدى ول. سونداي-اق اكىم ءوز سوزىندە تۇرعىن ءۇي ءۇشىن كەزەكتە تۇرعان ازاماتتاردى اتتاپ وتۋگە نەمەسە ولاردى «ىعىستىرۋعا» بولمايتىنىن جەتكىزدى.
بيىل قالا اكىمدىگى كوپبالالى انالاردى قولداۋعا باعىتتالعان 13 الەۋمەتتىك شارانى ازىرلەدى. ونىڭ ىشىندە اتالعان الەۋمەتتىك توپ وكىلدەرىنە كوممۋنالدىق قىزمەتتىڭ باعاسىن تومەندەتۋدەن باستاپ, كوپبالالى وتباسىلاردىڭ مەكتەپكە باراتىن بالالارى جانە كوللەدج بەن جوعارى وقۋ ورىندارىندا وقيتىن ستۋدەنتتەرىنە قوعامدىق كولىكتە تەگىن ءجۇرۋ مۇمكىندىگى بەرىلدى. 1-11 سىنىپتا وقيتىن كوپبالالى وتباسىلاردىڭ بالالارى مەكتەپتە تەگىن ىستىق تاماقپەن قامتىلادى.
سونىمەن قاتار كوپبالالى جانە الەۋمەتتىك جاعىنان از قامتىلعان وتباسىنىڭ جەتكىنشەكتەرى مەن جەتىم بالالار ءۇشىن ارنايى ساۋىقتىرۋ دەمالىسى ۇيىمداستىرىلدى. وسى ساناتتاعى وتباسى بالالارى مەكتەپ فورماسىمەن جانە قاجەتتى وقۋ قۇرالدارىمەن تەگىن قامتىلاتىن بولادى.
سونداي-اق وسى كۇنى پرەزيدەنت اكىمشىلىگىنىڭ باسشىسى باقىتجان ساعىنتاەۆ تا كوپبالالى انالارمەن جۇزدەستى.
