بيىل ەلوردادا «نۇرلى جەر-2025» باعدارلاماسى ارقىلى 19 كوپقاباتتى ءۇيدى جوندەۋ جوسپارلانعان. نۇر-سۇلتان قالاسى اكىمدىگىنىڭ «استانا – ادالدىق الاڭى» جوبالىق كەڭسەسى سىبايلاس جەمقورلىققا قارسى ءىس-قيمىل اگەنتتىگى مەن تۇرعىن ءۇي جانە تۇرعىن ءۇي ينسپەكتسياسى باسقارماسىمەن بىرلەسىپ, الماتى جانە بايقوڭىر اۋداندارىندا بۇل باعدارلامانى ىسكە اسىرۋ بارىسىمەن تانىستى.
ساتپاەۆ كوشەسى, 8, قاجىمۇقان, 14/1, اباي, 80/1 جانە اباي, 80/2 مەكەنجايى بويىنشا تۇرعىن ۇيلەرگە مونيتورينگ جۇرگىزىلدى. قازىر كوپپاتەرلى ۇيلەردىڭ كىرەبەرىسى, شاتىرى مەن جەرتولەسى جوندەلىپ جاتىر. وسى ايدىڭ سوڭىندا جوندەۋ جۇمىستارى اياقتالۋى ءتيىس. مونيتورينگ كەزىندە تۇرعىنداردىڭ تىلەكتەرى تىڭدالدى. مەردىگەرلەرگە انىقتالعان كەمشىلىكتەردى جويۋ تۋرالى نۇسقاۋ بەرىلدى.
«قالانىڭ ءار اۋدانىندا جوندەلىپ جاتقان كوپپاتەرلى ۇيلەردىڭ مونيتورينگى جۇرگىزىلەدى. ءبىز بۇل ءىستى باقىلاۋدا ۇستاپ وتىرمىز» دەيدى قالا اكىمدىگىنىڭ «استانا – ادالدىق الاڭى» جوبالىق كەڭسەسىنىڭ ۇيلەستىرۋشىسى ساۋلە بيسەمباەۆا.
