«رەيتينگ.kz» زەرتتەۋ اگەنتتىگىنىڭ ساراپشىلارى ەسەپتىك كەزەڭ بويىنشا 2014 جىلدىڭ ءى توقسانىنداعى وبلىستار مەن وبلىس ورتالىقتارىنىڭ اكىمدىكتەرى جۇمىسىنىڭ تيىمدىلىك دارەجەسىن انىقتادى. ساراپتاماعا بيزنەس سالاسى, ۇكىمەتتىك ەمەس ۇيىمدار مەن تالدامالى قاۋىمداستىقتاردىڭ 40 ساراپشىسى قاتىستى, دەپ حابارلادى «قازاقپارات» اگەنتتىگى.
زەرتتەۋ بارىسىندا اكىمدىكتەردىڭ جۇمىس ساپاسىن باعالاۋ ءۇشىن 11 نەگىزگى سانات باسشىلىققا الىنعان. باعالاۋ 11 بالدىق جۇيە بويىنشا جۇزەگە اسىرىلدى. اتاپ ايتقاندا, اكىمدەردىڭ جۇمىستارىنىڭ باستى كورسەتكىشتەرى رەتىندە ساياسي جانە الەۋمەتتىك تۇراقتىلىقتى قامتاماسىز ەتۋ مەن ايماقتاردىڭ ەكونوميكالىق دامۋ دارەجەلەرى الىنعان. وسىعان سايكەس اعىمداعى جىلدىڭ العاشقى توقسانىندا كوش باسىنان كورىنگەن اكىمدىكتەر انىقتالدى.
ساراپتاما ناتيجەسىندە ءبىرىنشى ورىندى 4,10 بالل جيناعان يمانعالي تاسماعامبەتوۆ باستاعان استانا قالاسىنىڭ اكىمدىگى, ەكىنشى ورىندى 4,02 بالمەن بەردىبەك ساپارباەۆ باستاعان شىعىس قازاقستان وبلىسىنىڭ اكىمدىگى, ءۇشىنشى ورىندى 4,01 بالل جيناعان قىرىمبەك كوشەرباەۆ باستاعان قىزىلوردا وبلىسىنىڭ اكىمدىگى يەلەندى.
استانا قالاسىنىڭ اكىمدىگى بۇل بيىككە «ايماقتىڭ ەكونوميكالىق دامۋىنىڭ تابىستىلىعى» جانە «ايماقتىق الەۋمەتتىك باعدارلامالاردى جۇزەگە اسىرۋ» كورسەتكىشتەرى بويىنشا قول جەتكىزدى.
سونداي-اق, زەرتتەۋ بارىسىندا جۇمىسى ۇزدىك ءارى ءتيىمدى قالالىق اكىمدىكتەر دە انىقتالدى. ونىڭ قورىتىندىسى بويىنشا كوشباسشىلار توبىن الماتى قالاسىنىڭ اكىمدىگى باستاعان. ودان سوڭ وسكەمەن, اتىراۋ, قىزىلوردا, اقتاۋ جانە ورال قالالارى اكىمدىكتەرى ورنالاسقان.
