ەلباسى كىتاپحاناسىندا «نۋرسۋلتان نازارباەۆ: چەلوۆەك ۋ ۆلاستي» اتتى كىتاپتىڭ بەتاشار ءراسىمى ءوتتى. ەڭبەك اۆتورلارى – تاريح عىلىمىنىڭ دوكتورلارى بۇركىتباي اياعان مەن ءاليما اۋاناسوۆا.
ءىس-شاراعا پارلامەنت دەپۋتاتتارى, ديپلوماتيالىق كورپۋستىڭ وكىلدەرى, مەملەكەت پەن قوعام قايراتكەرلەرى, عالىمدار جانە وقىتۋشىلار قاتىستى. تۋىندىمەن تانىسىپ شىققاندار كەزەك-كەزەك ءوز ويلارىمەن ءبولىستى.
«بايىپتاپ قاراساق, نۇرسۇلتان ءابىشۇلى بالا كەزىنەن-اق كوشباسشى بولىپتى عوي, – دەپ باستادى ءسوزىن ەلىمىزدىڭ تۇڭعىش سىرتقى ىستەر ءمينيسترى تولەۋتاي سۇلەيمەنوۆ. – نۇرەكەڭ دنەپرودزەرجينسكىدەگى وقۋدا – ستاروستا, مەتاللۋرگيالىق كومبيناتتا – پارتكوم حاتشىسى, مينيسترلەر كەڭەسىنىڭ توراعاسى, ودان سوڭ قازاقستان كومپارتياسى ورتالىق كوميتەتىنىڭ ءبىرىنشى حاتشىسى قىزمەتتەرىن اتقاردى. سول كەزەڭدەردىڭ اربىرىندە ول كىسى كەرەمەت باسشىلىق قابىلەتىمەن كوزگە ءتۇستى. مىنە, وسى جايتتاردىڭ ءبارى تۇگەل بۇگىنگى كىتاپتا تارقاتىلىپ جازىلعان.
زاڭ عىلىمىنىڭ كانديداتى, پروفەسسور زينايدا فەدوتوۆا دا – ەلباسىمەن بىرگە قىزمەت ىستەگەن جانداردىڭ ءبىرى. وسى ەڭبەكتى وقي وتىرىپ, بارلىق ۋاقيعالاردى كوز الدىنان قايتا ءبىر وتكىزىپ شىققانىن ايتتى ول: «پرەزيدەنتىمىز ءوزى دە دەمالمايتىن, وزگەنى دە دەمالدىرمايتىن قايراتكەر عوي. سونىسىنىڭ ارقاسىندا تاۋ-تاۋ مىندەتتەر ىسكە استى. ايتپەسە, قازىرگىدەي حالگە نەبارى 24 جىلدا جەتە الار ما ەدىك؟! ءالى ەسىمدە, استانانى اقمولاعا كوشىرەردە كوپ داۋ بولدى. «بۇل قالاي بولار ەكەن؟» دەگەن سەنىمسىزدىك بەلەڭ الدى. بىراق نۇرسۇلتان ءابىشۇلى – مىقتى ستراتەگ ەمەس پە؟! استانانى از ۋاقىتتا گۇلدەندىرىپ, مەگاپوليسكە اينالدىرا ءبىلدى. بۇدان سوڭ وعان حالقى قالايشا سەنبەسىن, ءۇمىت ارتپاسىن؟»
ال «ەگەمەن قازاقستان» گازەتى اكتسيونەرلىك قوعامىنىڭ پرەزيدەنتى ساۋىتبەك ابدراحمانوۆ جاڭا كىتاپتى «ەلدىگىمىزدى ەڭسەلەندىرەتىن ەڭبەك» دەپ اتادى: «2013 جىلدىڭ شىلدەسىندە پوستكەڭەستىك الەم ينستيتۋتى 68 ەلدىڭ 300-دەن استام ساراپشىسىنا ساۋال تاستاعان ەدى. ناتيجەسىندە, دۇنيە ءجۇزى بويىنشا ەڭ ۇزدىك 5 ليدەردىڭ قاتارىنا نۇرسۇلتان ءابىشۇلى دا كىردى. بۇل – ۇلكەن كورسەتكىش. كىتاپ اۆتورلارى ءبىزدىڭ كسرو-دان ءبولىنىپ شىققان كەزىمىزدى جەر مەن مەتەوريتتىڭ سوقتىعىسۋى رەتىندە باعالايدى. بۇدان سوڭ, ءسوزسىز, جەردە كليمات وزگەرەدى, اۋا رايى قۇبىلادى. ءبىز دە ءدال سونداي قيىن جاعدايمەن بەتپە-بەت كەلدىك. ءبىر كۇنى نۇرسۇلتان ءابىشۇلى رەسپۋبليكالىق تەلەراديو حابارلارىن تاراتۋ كومپانياسىنىڭ توراعاسى عادىلبەك شالاحمەتوۆتى ءباسپاسوز حاتشىسى قىزمەتىنە شاقىرعان ەكەن. قانشا دەگەنمەن, عادەكەڭنىڭ بۇرىن ىستەپ كورمەگەن جۇمىسى عوي. ءسوز اراسىنا ەلباسىدان «ايتىڭىزشى, ءباسپاسوز حاتشىسى دەگەن كىم؟» دەپ اقىرىن سۇراپتى. سول كەزدە نۇرسۇلتان ءابىشۇلى «اۋەلى پرەزيدەنت دەگەننىڭ كىم ەكەنىن ءتۇسىنىپ الايىق» دەپ جاۋاپ بەرەدى. شىنىمەن دە, ول تۇستا نۇرەكەڭنىڭ وزىنە دە مۇنىڭ ءبارى تىم تاڭسىق, جاڭاشا دۇنيە بولىپ كورىنگەنى راس. سوعان قاراماستان, ول كىسىنىڭ كورەگەندىلىگى مەن ساياسي ساۋاتتىلىعى بارلىق جەردە دالەلدەنىپ جاتتى. ول كىسىنىڭ وسى قاسيەتتەرىن تانۋ ارقىلى ءبىز ەلدىگىمىزدى, مەملەكەتتىگىمىزدى تاني تۇسەمىز».
ءماجىلىس دەپۋتاتى, گەنەرال-لەيتەنانت اباي تاسبولاتوۆ ەلباسىنىڭ ءاربىر دەتالعا مۇقيات نازار اۋداراتىنىن تىلگە تيەك ەتتى. «پرەزيدەنتتىك وركەستر ونەر كورسەتىپ جاتقاندا نۇرسۇلتان ءابىشۇلىنىڭ جانىندا ارقاشان مەن وتىراتىنمىن. ءبىر ءان ورىندالىپ جاتسا, ونىڭ قاشان شىققانىن, كۇيدى ەستىسە, ونىڭ اۆتورىن مەنەن سۇرايدى. كەي سۇراقتارىنا كىبىرتىكتەپ قالامىن. سول كەزدە نۇرەكەڭنىڭ ءوزى ءبارىنىڭ جاۋابىن ايتادى. سونشاما اقپارات ءبىر باسىنا قالاي سياتىنىنا تاڭ قالاتىنمىن. بۇدان سوڭ, مەن دە بۇكىل ءان-كۇيدىڭ تاريحىمەن تانىسىپ شىقتىم عوي. جالپى, بۇگىنگى كىتاپتا ەلباسىنىڭ ءبىز بىلمەيتىن باسقا دا قىرلارى جان-جاقتى اشىلادى» دەيدى اباي بولەكبايۇلى.
بوتاقان مارات
