ەلورداداعى «Forte Bank Kulanshi Art Space» گالەرەياسىندا بەلگىلى قىلقالام شەبەرى لەيلا ماحاتتىڭ «كوز تيمەسىن» كورمەسى اشىلدى.
بۇل كورمەگە سۋرەتشىنىڭ قازاقستان مەن اۆستريادا جاساعان جۇمىستارى قويىلدى. «كوز تيمەسىن» كارتينالار توپتاماسى اۆتوردىڭ ۇلى دالانىڭ ساۋلەت ونەرىندەگى كونە ەسكەرتكىشتەرىن زەرتتەۋىنىڭ ناتيجەسىندە پايدا بولعان. مويىنتۇمارلاردىڭ پىشىندەرى مەن ورنەكتەرى ەلىمىزدەگى ارحەولوگيالىق زەرتتەۋلەردەن باستاۋ الادى. تۇستىك شەشىمدەردى تۇسىندىرۋگە كارتينالاردى سالۋ بارىسىنداعى ەموتسيونالدىق فون سەبەپ بولعان. شەبەردىڭ تاعى ءبىر توپتاماسى «Woman in Art» دەپ اتالادى. كورمەنىڭ جەكە ءبولىمى اباي اتامىزدىڭ قارا سوزدەرىنە ارنالعان تۋىندىلاردان قۇرالعان. قارا سوزدەردەن كەلتىرىلگەن ۇزىندىلەر حاكىم اتامىزدىڭ فيلوسوفياسىنا كورسەتىلگەن قۇرمەت رەتىندە كەنەپتىڭ گالاكتيكالىق ابستراكتىلى كەڭىستىگىنە ورنالاستىرىلعان.
كورمەنىڭ اشىلۋىندا ءسوز العان قالالىق مادەنيەت جانە سپورت باسقارماسىنىڭ باسشىسى نۇرلان سىدىقوۆ وسىندا كەلە جاتىپ, لەيلا ماقات ءبىزدى تاعى نەمەن تاڭعالدىرادى ەكەن دەپ ويلاعانىن ايتتى.
– شىن مانىندە, ول كىسى ۇدايى تاڭعالدىرىپ جۇرەدى. كورمەنى ارالاپ كوردىم. ماعان كارتينالار جاندىلىعىمەن, تابيعيلىعىمەن ەرەكشە ۇنادى. لەيلا كەز كەلگەن تۋىندىسىنا بار تالانتى مەن ونەرىن جۇمسايدى. سول ءۇشىن دە ونى ەرەكشە قادىرلەيمىن, – دەدى ول.
سونداي-اق شارا بارىسىندا دارىندى وپەرا ءانشىسى مايرا مۇحامەدقىزى ءوز اندەرىمەن كەلۋشىلەردىڭ ىقىلاسى مەن قوشەمەتىنە بولەندى.
