كۇن سالقىنداپ, كۇز مەزگىلى جەتكەن ۋاقىتتا كومىر باعاسىنىڭ كۇرت كوتەرىلىپ كەتۋى ءجيى كەزدەسەدى. مىنە, وسى ماسەلەنىڭ الدىن الۋ ءۇشىن استانا قالاسىنىڭ اكىمى اسەت يسەكەشەۆ كومىردىڭ باعاسى ءوسىپ كەتپەۋىن ەرەكشە تاپسىردى.
نارىقتاعى كومىر جاعدايىمەن وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنىڭ باسشىسى ەربول تولەۋوۆ باياندادى. ول بۇگىندە استانادا كومىر جەتكىزەتىن 7 ىسكە اسىرۋشى بارىن ەسكە سالدى. جالپى, قوردا 7 تامىزداعى جاعداي بويىنشا 9590 توننا كومىر بار.
– «ماگنيت 21 عاسىر» جشس-تە شۇباركولدىڭ 1700 توننا (14500 تەڭگە) جانە كۋزنەتسكىنىڭ (12000 تەڭگە) كومىرى بار. «ايتكوجىنوۆا» جك مايكوبەنىڭ 500 توننا (10000 تەڭگە) كومىرى بار, «ۋمار KZ» جشس – 1000 توننا قاراجىرانىڭ (13500 تەڭگە), «سەۆەرەنەرگوۋگولسناب» جشس – 4800 توننا قاراجىرانىڭ (13000 تەڭگە) كومىرى بار, – دەدى ە.تولەۋوۆ.
كومىر باعاسىنىڭ كۇرت كوتەرىلىپ كەتۋى قانداي سەبەپتەن تۋىندايدى؟ باسقارما باسشىسىنىڭ مالىمەتى بويىنشا ساتۋ كەزەڭى شارىقتاعان كەزدە كومىردىڭ جەتپەي قالۋىنان وسىنداي ماسەلە تۋىندايدى. ونىڭ ۇستىنە, كومىر تاسىمالىنا تاپسىرىستىڭ كوپ تۇسۋىنەن «قازاقستان تەمىر جولى» ۇك» اق تاراپىنان دا ۆاگوندار جەتىسپەي جاتاتىن كەزدەر بولادى. وسىعان بايلانىستى اسەت يسەكەشەۆ «قتج – جۇك تاسىمالى» اق ەلورداعا كومىر جەتكىزەتىن پويىزداردى ءتيىستى مولشەردە ۆاگوندارمەن قامتاماسىز ەتۋدى تاپسىردى.
