ەلورداداعى ليفت شارۋاشىلىعىنا جاۋاپتى كومپانيالار وزدەرىنە ءتيىستى مىندەتتى ورىنداماعان جاعدايدا, اكىمشىلىك شارادان بولەك, ولاردىڭ ۇستىنەن قىلمىستىق ءىس قوزعالاتىن بولادى. بۇل تۋرالى اكىمدىكتىڭ ءباسپاسوز ورتالىعىندا وتكەن بريفينگتە قالالىق ورتا ساپاسى جانە باقىلاۋ باسقارماسىنىڭ باسشىسى تولەگەن قۇلۇشەۆ ءمالىم ەتتى.
– ءبىز قازىر قالاداعى ليفت جۇمىسىنا جاۋاپتى بارلىق كومپانيالارمەن جۇيەلى تۇردە جۇمىس جۇرگىزىپ جاتىرمىز. سونىڭ ناتيجەسىندە بۇگىندە قالا ليفتتەرىندە تەك اندا-ساندا توقتاپ قالۋ عانا بولماسا, بىردە-ءبىر اپاتتى جاعداي جوق. قازىر سول بويىنشا تالداۋ جۇرگىزىلۋدە. ليفت جۇمىسى جونىندە بۇرىن تۇرعىنداردان شاعىم وتە كوپ تۇسەتىن. بۇگىندە ول 80 پايىزعا ازايدى. مىسالى, بۇعان دەيىن اپتاسىنا 40-50 شاعىم بولسا, قازىر جەتى كۇندە بار بولعانى 2-3 شاعىم عانا تۇسەدى, – دەگەن تولەگەن قۇلۇشەۆ كومپانيالار مىندەتتەرىن دۇرىس اتقارماسا, ولاردىڭ جۇمىستارىن قالالىق ىشكى ىستەر دەپارتامەنتى قارايتىنىن اتاپ ءوتتى.
ال اتالمىش باسقارمانىڭ ەسىل اۋداندىق ءبولىمىنىڭ باس مامانى ەرلان قياباەۆتىڭ مالىمەتىنشە, بۇگىنگە دەيىن ەلورداداعى 2050 ليفت تەكسەرىلىپتى. جىل سوڭىنا دەيىن 6900 ءليفتتىڭ قالاي جۇمىس ىستەپ تۇرعانى انىقتالماق. بيۋدجەتتەن بولىنگەن قاراجات ەسەبىنەن بيىل بەس ليفت جوندەۋدەن وتسە, كەلەر جىلى 20 ءليفتتى جوندەۋ جوسپاردا تۇر ەكەن. بىراق وعان تۇرعىنداردىڭ كەلىسىمى كەرەك كورىنەدى. ءوز كەزەگىندە استانا قالاسى پيك زاڭدى تۇلعالار بىرلەستىگى قاۋىمداستىعىنىڭ توراعاسى ميزامبەك كەنجەباەۆ قالادا ورتالىقتاندىرىلعان شەبەرحانا قۇرۋدىڭ ماڭىزدىلىعىن ايتتى.
– ليفت سايماندارىن تەز تابۋ ءۇشىن استانا بويىنشا ورتالىقتاندىرىلعان شەبەرحانا قاجەت. سول كەزدە اۆتوماتيكا, ەسىك, ارقان سياقتى باسقا دا قوسالقى بولشەكتەردى اپتالاپ ىزدەپ جۇرمەس ەدىك. بۇل جەردە ماڭىزدىسى ءليفتتىڭ جايى عانا ەمەس, باستىسى – ادامداردىڭ قاۋىپسىزدىگى. سوندىقتان كەرەك-جاراقتىڭ ءبارى تابىلاتىن وسىنداي كومپانيا قۇرۋعا ءتيىسپىز, – دەدى ول. سونداي-اق بريفينگ بارىسىندا الداعى ۋاقىتتا جەدەل ساتىلاردىڭ قالالىق ورتاق بازاسىنىڭ قۇرىلاتىنى ءسوز بولدى.
