ۇرلىققا – توسقاۋىل
استانا قالاسىندا جىل باسىنان بەرى جاسالعان 21 مىڭ قىلمىستىڭ 12 مىڭى, ياعني 56,8 پايىزى بوتەننىڭ مۇلكىن ۇرلاۋ ەكەن. مىنە, وسى ساندار ەلوردالىق پوليتسەيلەردى, شىنىندا دا, الاڭداتىپ وتىر. وسىعان وراي, جاقىندا استانا قالاسى پوليتسيا دەپارتامەنتى جەرگىلىكتى پوليتسيا قىزمەتى باستىعىنىڭ ورىنباسارى تاحير ابدراحمانوۆ, كريمينالدى پوليتسيا باسقارماسى باستىعىنىڭ ورىنباسارى جانبولات ايتباەۆ جانە ەلوردا اكىمدىگىنىڭ باس مامانى ءمولدىر تولەباەۆا ءباسپاسوز ءماسليحاتىن وتكىزدى.
وتكەن ون ايدا قالاداعى ءبىلىم وردالارىندا 148 ۇرلىق تىركەلىپ, 17 جوعارى وقۋ ورنىنىڭ, 44 كوللەدج ستۋدەنتى مەن 27 مەكتەپ وقۋشىسى جاۋاپقا تارتىلىپتى. قولدى بولاتىن كوبىنە – ۇيالى تەلەفوندار مەن التىن بۇيىمدار جانە اقشا. وعان, نەگىزىنەن, ازاماتتاردىڭ زاتتارىن قاراۋسىز قالدىراتىن بەيقامدىقتارى دا سەبەپ بولىپ وتىر. وسىنداي كەلەڭسىزدىككە قارسى تۇرىپ, قىلمىستىڭ الدىن الۋ ماقساتىندا باس قالا پوليتسەيلەرى وسى جىلعى 21 قاراشا مەن 11 جەلتوقسان ارالىعىندا «ۇرلىققا – توسقاۋىل» اتتى بىرلەسكەن شارا ۇيىمداستىرىپ وتىر.
شارا اياسىندا پوليتسيا دەپارتامەنتى بوتەننىڭ مۇلكىن ۇرلاۋدىڭ الدىن الۋ, بالالار مەن جاسوسپىرىمدەر اراسىندا قۇقىق مادەنيەتىن قالىپتاستىرۋ تۇرعىسىندا وقۋشىلار مەن ستۋدەنتتەر اراسىندا ۇزدىك بۋكلەتتەرگە كونكۋرس جاريالادى. ول پاتەر ۇرلىعى, قالتا ۇرلىعى, اۆتوكولىك سالونىنىڭ ۇرلىعى اتالىمدارى بويىنشا وتكىزىلەدى. بايقاۋعا ءبىر ءبىلىم وشاعىنان ءۇش جۇمىستان ارتىق قابىلدانبايدى. كونكۋرسقا جۇمىستار 22 قاراشا مەن 9 جەلتوقسان ارالىعىندا قابىلدانىپ, جەڭىمپازدار باعالى سىيلىقتار مەن ارنايى جۇلدەلەرگە يە بولادى.
– بۇل جۇمىستى ءبىز بارىنشا جۇيەلەندىرۋگە تىرىستىق. نەگىزىنەن, قوعامدىق كولىكتەردە, ويىن-ساۋىق ورتالىقتارى مەن جاستاردىڭ ءجيى باس قوساتىن جەرلەرىندە ۇرلىققا قارسى ۇگىت-ناسيحات ءىس-شارالارىن وتكىزۋدى كوزدەپ وتىرمىز. وسىنىڭ ءوزى جاسوسپىرىمدەردىڭ وي-تۇيسىگىن, سانا-سەزىمىن قالىپتاستىرۋداعى العاشقى قادامدار بولماق. قالاداعى جوعارى وقۋ ورىندارىنا, مەكتەپ, كوللەدجدەرگە بارۋدىڭ كەستە-جوسپارىن بەلگىلەدىك. سول ارقىلى جاستاردىڭ تانىم-تۇسىنىكتەرىن كەڭەيتە تۇسكىمىز كەلەدى, – دەدى استانا قالاسى پوليتسيا دەپارتامەنتى كريمينالدىق پوليتسيا باسقارماسى باسشىسىنىڭ ورىنباسارى جانبولات ايتباەۆ.