ەلورداداعى ۇلتتىق اكادەميالىق كىتاپحانادا مادەنيەت جانە سپورت مينيسترلىگى مەملەكەت باسشىسىنىڭ «ۇلى دالانىڭ جەتى قىرى» اتتى ماقالاسىنا ايتىلعان تولعامدى دۇنيەلەرگە بايلانىستى جيىن وتكىزدى.
كەلەلى كەڭەستە قر مادەنيەت جانە سپورت ءمينيسترى ارىستانبەك مۇحامەديۇلى اتالعان ماقالاداعى ءوز سالاسىنا قاتىستى جۇمىستاردى ىسكە اسىرۋ مەن ناقتى جوبالاردى قۇرۋ تۋرالى باياندادى.
«ەلباسىنىڭ «ۇلى دالانىڭ جەتى قىرى» اتتى ماقالاسى – تىكەلەي ءبىزدىڭ مينيسترلىككە قاتىستى بولىپ وتىر. سوندىقتان ءبىز وسى دۇنيەدە قامتىلعان اۋقىمدى مىندەتتەردى دەر كەزىندە سارالاپ, بىرلەسىپ وتىرىپ, ىرگەلى جۇمىس ىستەۋىمىز قاجەت» دەگەن مينيستر جيىنعا كەلگەن بارلىق ارحيۆ, مۋزەي, كينو, كىتاپحانا, تەاتر جانە تاعى باسقا ونەر مەكەمەلەرىنىڭ باسشىلارىنا ءبىر اپتا ىشىندە اتقارىلار ءىس-شارالاردىڭ جوباسىن تاپسىرۋدى مىندەتتەدى. ول ءوز سوزىندە تاريحي, كوركەم, دەرەكتى جانە انيماتسيالىق وتاندىق فيلمدەردى تۇسىرۋگە سالماق سالىپ ءوتتى.
«ەلىمىزدەگى قاسيەتتى جەرلەردى, ولاردان تابىلعان قۇندى جادىگەرلەردى جانە سولاردىڭ شىعۋ تاريحىن دەرەكتى فيلم نەمەسە بالالارعا مۋلتفيلم ارقىلى جەتكىزسەك ۇتىمدى بولادى دەپ ويلايمىن. ۇلى دالانىڭ كونە اۋەندەرىن نوتاعا ءتۇسىرىپ, ۇلى تۇلعالار تۋرالى ەنتسيكلوپەديا شىعارۋدى دا تەزىرەك جۇزەگە اسىرعان ءجون. «ارحيۆ-2025» جەتى جىلدىق باعدارلاماسىنا دا تەرەڭىرەك ءمان بەرىپ, مۇراعات قىزمەتكەرلەرى كىتاپحانالارمەن بىرلەسىپ جۇمىس ىستەۋگە مۇمكىندىك تۋعىزۋ قاجەت» دەدى ارىستانبەك مۇحامەديۇلى.
مينيستردەن كەيىن ءسوز كەزەگىن العان مەملەكەت جانە قوعام قايراتكەرى, عالىم مىرزاتاي جولداسبەكوۆ, قازاقستان جازۋشىلار وداعىنىڭ توراعاسى ۇلىقبەك ەسداۋلەتوۆ ەلباسى ماقالاسى تۋرالى پاراساتتى وي ءوربىتتى.
جيىن بارىسىندا تاعى دا باسقا ازاماتتار ءسوز الىپ, پرەزيدەنتتىڭ ماقالاسى تۋرالى ويلارىن ورتاعا سالدى.
