وتاندىق 32 بانكتىڭ اراسىنان 16-شى ورىندى يەلەنگەن بانكتىڭ باسىنا قارا بۇلت ءۇيىرىلدى. كەشە ۇلتتىق بانك «استانا بانكى» اق-نىڭ سالىمشىلارىنا اقپاراتتىق حابارلاما تاراتتى. اتالعان قارجى ينستيتۋتىنىڭ ءوزىنىڭ جانە تۇتىنۋشىلارىنىڭ شوتتارى بويىنشا بارلىق وپەراتسيالار توقتاتىلدى. 18 قىركۇيەكتە ۇلتتىق بانكتىڭ باسقارماسى قابىلداعان شەشىمگە سايكەس, سالىمشىلاردىڭ تەڭگەمەن جانە شەتەل ۆاليۋتاسىمەن جيناعان دەپوزيتتەرىنىڭ, تولەم كارتوچكاسى مەن بانك شوتىنداعى اقشالارىنىڭ جوعالماۋىن «قازاقستاندىق دەپوزيتتەرگە كەپىلدىك بەرۋ قورى» (قدكبق) قورعايتىنى ءمالىم بولدى. الداعى ۋاقىتتا سوت شەشىمىمەن بانك كۇشپەن جابىلاتىن بولسا, قدكبق حالىقتىڭ كەپىلدەندىرىلگەن قاراجاتىن قايتارادى. كەپىلدىكتىڭ ەڭ جوعارى شەگى تەڭگەمەن اشىلعان دەپوزيتتەر بويىنشا – 10 ملن تەڭگەگە; شەتەل ۆاليۋتاسىمەن اشىلعان دەپوزيتتەر بويىنشا 5 ملن تەڭگەگە دەيىن. قدكبق-دان اقشاسىن زاڭدى تۇلعالار, جەكە كاسىپكەرلەر, جەكە سوت ورىنداۋشىلارى, نوتاريۋستار جانە قورعاۋشىلار قايتارا الادى. الايدا ولار بانك شوتىنداعى قاراجاتىن عانا الادى. ايتا كەتەلىك, «استانا بانكىنەن» جالپى قۇنى 41,2 ملرد تەڭگەنى قۇرايتىن زاڭدى تۇلعالاردىڭ دەپوزيتتەرى اشىلعان.
بانكتىڭ باسقارۋ ورگاندارىنىڭ قۇزىرەتى ۇلتتىق بانك توراعاسىنىڭ بۇيرىعىمەن تاعايىندالعان ۋاقىتشا اكىمشىلىككە جۇكتەلدى. ول سوت بانكتى جابۋ تۋرالى كوميسسيا قۇرىلعانعا دەيىن جۇمىس ىستەيدى. سوتتىڭ بانكتى كۇشپەن جابۋ تۋرالى شەشىمى زاڭدى كۇشىنە ەنگەننەن كەيىن 14 كۇن ىشىندە قدكبق وتاندىق بانكتەرگە «استانا بانكىنىڭ» سالىمشىلارىمەن جۇمىس ىستەۋگە حابارلاما جاسايدى. ول بانكتىڭ قارجىلىق احۋالى تۇراقتى, كەڭەيتىلگەن فيليالدىق جەلىسى بولۋى شارت. قدكبق ونداي بانكتى تاڭداعان كەزدە «استانا بانكىنىڭ» سالىمشىلارى كەپىلدى قاراجاتىن قايتارىپ الۋ ءۇشىن سول بانككە ارىز بەرەدى. بانك-اگەنت سالىمشىلاردىڭ قۇجاتى تۇسكەن كۇننەن باستاپ 5 جۇمىس كۇنى ىشىندە تولەم جاسايدى.
ايتا كەتەرلىگى, «بىرىڭعاي جيناقتاۋشى زەينەتاقى قورى» اق وسى بانكتەگى ەكى دەپوزيتىندە 7,35 ملرد تەڭگەسىن ساقتاعانى تۋرالى اقپارات بار. ايتپاقشى, وسى جازدا «Astana LRT» جشس-ءنىڭ باسقارما توراعاسى بەكمىرزا يگەنبەرديەۆ ەلوردامىزداعى جەڭىل رەلستى كولىكتىڭ قۇرىلىسىنا بولىنگەن 257, 6 ملن اقش دوللارىنىڭ «استانا بانكىندە» «قاتىپ» قالعانىن مالىمدەگەنى بەلگىلى.
