استانادا ورتالىق كوممۋنيكاتسيالار قىزمەتىندە قر مادەنيەت جانە سپورت ءمينيسترى ارىستانبەك مۇحامەديۇلى جۋرناليستەرمەن جۇزدەسىپ, ءباسپاسوز ءماسليحاتىن وتكىزدى. وندا ەلىمىزدەگى مادەنيەت سالاسىنىڭ دامۋى مەن الدا جۇزەگە اسپاق جوبالار تۋرالى ءسوز بولدى.
ايتالىق, قازاق مادەنيەتىن شەت مەملەكەتتەردە ناسيحاتتايتىن «ماڭگىلىك مۇرا» اتتى جوبا قولعا الىنعان. اتالعان جوبا ەلىمىزدىڭ تاريحي-مادەني دامۋىنا ەرەكشە سەرپىن بەرمەك. بۇل ەلىمىزدىڭ باي مادەني مۇراسىن الەمدىك قۇندىلىقتار قورىمەن ىقپالداستىرۋعا باعىتتالعان.
سونداي-اق, ءبىزدىڭ ەلدەگى مۋزەيلەردىڭ جۇمىس فورماتى دا وزگەرتىلمەك. ول الەمگە ايگىلى لۋۆر, ەرميتاج, ۆاتيكان سىندى مۋزەيلەردىڭ تاجىريبەسىن ەسكەرە وتىرىپ جاسالادى. جانە قر ۇلتتىق مۋزەيىندە قازاقستان حالقى اسسامبلەياسىنىڭ زالى اشىلادى دەپ جوسپارلانۋدا.
«مادەنيەت ساياساتى تۇجىرىمداماسى بويىنشا اتالمىش سالاداعى مەنەدجمەنتتى وزگەرتۋ كوزدەلىپ وتىر. سالا ەكونوميكا سەكتورى رەتىندە وڭتايلاندىرىلادى. ەكونوميكالىق بەلسەندىلىكتى ارتتىرۋ ماقساتىندا جەتەكشى مۋزەيلەر مەن كىتاپحانالاردىڭ اكىمشىلىك-قۇقىقتىق فورماسى مەملەكەتتىك مەكەمەدەن قازىنالىق كاسىپورىنعا اۋىستىرىلادى» دەدى ول.
تاعى ءبىر جۇزەگە اسپاق تىڭ جوبانى ايتساق دەيمىز. الداعى تاڭدا قازاقستاننىڭ ەلەكتروندى ەنتسيكلوپەدياسى جاسالادى. بۇل جوبا «ەكسپو-2017» كورمەسىندە قازاقستاندى تانىستىرۋ اياسىندا وتە وزەكتى بولماق.
ونىڭ ايتۋىنشا, مينيسترلىك ەكسپو شاراسىنا بايلانىستى ارنايى جوسپار جاساعان. سونىڭ نەگىزىندە «ەكسپو-2017» كورمەسىندە ەلىمىزدىڭ الەمدەگى تاريحي جانە گەوساياسي ماڭىزى تۋرالى تۇساۋكەسەر وتكىزىلمەك. «ەكسپو-2017» كورمەسى مەن حالىقارالىق جانە ەلوردانىڭ قارجىلىق ورتالىق رەتىندەگى الەۋەتى مادەني-تۋريستىك كلاستەردى قۇرۋعا قاجەتتى باس قالانىڭ جاڭا مادەني ينفراقۇرىلىمىنىڭ دامۋىن تالاپ ەتەدى» دەيدى ا.مۇحامەديۇلى.
ازامات ەسەنجول
