مارتەبەلى مۋزەي

قاي حالىقتىڭ دا ەڭسەسىنىڭ جوعارى بولۋى ەرەن ەڭبەك پەن ەرلىككە, ءورشىل ونەر مەن نامىسقا تاۋەلدى. بۇل – ماڭگىلىك ەل مۇراتى تۋرالى ايتۋدا دا كەمدىك جوق. بىراق, ءسوزدىڭ اتى – ءسوز. كوبىنەكي ايتىلعان بويدا «جەلگە ۇشادى». ءسوزدىڭ «سۇيىلىپ» كەتپەي, «جەمىس» بەرۋى, ونىڭ «سالماعىنا» بايلانىستى, ومىرلىك تاجىريبە مەن اقىل-پاراساتتىڭ تارازىعا تۇسەر تۇسى دا – وسى. امال نە, تىرلىكتە بۇعان جەتە ءمان بەرە قويمايمىز. كۇندەلىكتى كۇيبەڭ, باياعى. وسى قالعىپ كەتكەن سانا استاناداعى ەلىمىزدىڭ ۇلتتىق مۋزەيىنە قادام باسقان ساتتە سەلت ەتىپ, «مىڭ ءولىپ, مىڭ تىرىلگەن» قازاعىمىزدىڭ ءوزىن-ءوزى ساقتاپ قالۋىنىڭ جانە ماڭگىلىك ەل بولۋ مارتەبەسىنىڭ تەرەڭ سىرى الدىمىزدان جايىلىپ سالا بەردى… جۇرتشىلىققا اۋەلدەن ءمالىم, بىراق كوڭىلدەن تاسا قالا بەرەتىن سىر. وعان مىناۋ قاسيەتتى جەر مەن قاھارمان ەل كۋا… مۋزەيدىڭ شاڭىراعىندا قالىقتاعان التىن قىران ءبىزدى دە وزىمەن بىرگە كوككە شارىقتاتا سامعاتىپ, كوزىمىزدى كولەگەيلەگەن «تۇمان» بىرتىندەپ سەيىلە بەردى.

اڭ-تاڭمىن

ۇلتتىق مۋزەيگە قادام باسقاندا تالاي تامسانا تىڭداعان, ءتىپتى, ماساتتانا ماقتان ەتەتىن, بىراق اعا بۋىننىڭ ءوزى بەرىك ۇستانا جانە ۇرپاققا سىڭىرە الماي كەلە جاتقان ۇلتتىق قاسيەتتەرىمىزدىڭ ايعاقتارى كوزىمىزگە وتتاي باسىلىپ, جان-ءتانىمىزدى باۋراپ الدى. حالقىمىزدى تالاي زوبالاڭنان امان-ەسەن الىپ وتكەن ساف التىنداي تابيعاتىمىز, بولمىس-ءبىتىمىمىز بەن قايسار مىنەزىمىز سولعىن تارتىپ, ەندى بولماسا, قۇردىمعا سىڭگەندەي ەكەن. ەگەمەندىككە قولىمىز جەتىپ, نەبىر قيلى كەزەڭدەردە ەلدىگىمىزدىڭ التىن ارقاۋى بولعان بارىمىزدى باعالاپ, جوعىمىزدى تۇگەندەيتىن كۇن  تۋدى.

ءتاۋبا

ەلىمىزدىڭ باس الاڭى – تاۋەلسىزدىك الاڭىندا قاناتىن جايىپ, 74 مىڭ شارشى مەتر اۋماقتا كوسىلگەن, تۇساۋىن ەلباسى كەسكەن ۇلتتىق مۋزەي «قازاق ەلى» مونۋمەنتى, تاۋەلسىزدىك سارايى, بەيبىتشىلىك پەن كەلىسىم سارايى, «حازىرەت سۇلتان» مەشىتى, ۇلتتىق ونەر ۋنيۆەرسيتەتى سەكىلدى زاماناۋي عيماراتتارمەن جاراسا ءسان تۇزەپ, استانامىزدىڭ سالتاناتىن اسقاقتاتا تۇسەدى. ونىڭ التىن قورىنداعى «مادەني مۇرا» مەملەكەتتىك باعدارلاماسىنىڭ اياسىندا قايتا ورالعان قۇندىلىقتار ەل شەجىرەسىنەن ونەگەلى سىر شەرتەدى. قالاي تاڭدانباسسىڭ, قالايشا كوڭىل مارقايماسىن! وسىنداي تارلان تاريحى بار  كەمەڭگەر حالىقتىڭ ۇرپاعى ءبىز قالايشا ۇلتتىق قازىنامىزدىڭ التىن جۇلگەسىن جوعالتىپ الا جازدادىق؟!  ۇلت بولاشاعى ۇرپاققا تاۋەلدى بولسا, ءبىز اتا-بابا ۇلاعاتىن ولارعا قانشالىقتى دارىتا الدىق؟! ءبىز ۇلتتىق ماقسات-مۇراتتارعا قايتسەك لايىق بولامىز؟!

ۇلى دالانىڭ ۇلىق مۇراسىنا ۇڭىلگەن سايىن قازاعىمىزدىڭ قايسار مىنەزى مەن ماڭگىلىك عۇمىرىنىڭ سىرىنا كوزىمىز بىرتە-بىرتە اشىلىپ, جاراتىلىسىنان ەڭبەككەر, قاھارمان, ونەرپاز, ويشىل ءارى نامىسشىل قازاقتىڭ تۇلعاسى سومدالا بەردى. ۇلتتىق مۋزەيدىڭ ەجەلگى جانە ورتاعاسىر تاريحى زالىنداعى قادىم زاماننان بەرگى ەڭبەك قۇرالدارى مەن ونىڭ ناتيجەلەرى مارتەبەلى ەڭبەككە باس يگىزەدى. ءبىزدىڭ جىل ساناۋىمىزعا دەيىنگى حII-VIII عاسىرلاردا جاسالعان تۇرمىستىق زاتتار مەن شارۋاشىلىق قۇرالدارى… كونەنىڭ كونەرمەس كوزىندەي, وتكەننىڭ ونەگەلى سوزىندەي ءاربىر جادىگەر ەڭبەك پەن ونەر ەسەيتىپ, نامىس پەن ەرلىك شىنىقتىرعان التى الاشتىڭ ماڭگىلىك ەل بولار اسىل قاسيەتتەرىن پاش ەتەدى.

سەنىم

ەگەمەندىك الىپ, ەڭسەمىزدى تىكتەدىك. بۇرىننان بار, ابدەن قاتىپ, سەمگەن ۇعىمدارعا جاڭاشا كوزقاراس قالىپتاستى. الاڭ-پۇلاڭ كەزەڭ ەدى ول. ۇلت مارتەبەسى ەلباسىنىڭ, ونىڭ سەرىكتەرىنىڭ, جالپى جاناشىر اعايىننىڭ قابىرعاسىنا شىنداپ باتتى. جالاڭ تىلەك پەن قۇرعاق قيال جەتەگىندە كەتەتىن ۋاقىت ەمەس  ەدى. ەتەك-جەڭىمىزدى جيناپ, بارىمىزدى تۇگەندەيتىن «قۇس ۇيقىلى» كەزەڭ بولاتىن. بىراق, وسى اششى شىندىقتى دا كوپشىلىكتىڭ ءتۇسىنۋى سوزىلىپ بارا جاتقان. سول ءبىر الماعايىپ كەزەڭدە حالقىمىز ەل تاعدىرىن قازاعىنىڭ قۇلدىق زامانىندا-اق سۇلتان تۋعان قايراتكەردىڭ قولىنا سەنىپ تاپسىردى. ول بيلىك تىزگىنىن قىمتاي ۇستاپ, قىرۋار شارۋانىڭ ساتىمەن ساباقتالۋىنىڭ ەكونوميكاعا تاۋەلدى ەكەنىن قاداپ ايتىپ, قاتاڭ تالاپ قويدى. قىزىل يمپەريادان «مۇراعا» ءتيىپ, ابدەن قوردالانىپ قالعان الەۋمەتتىك, شارۋاشىلىق, ساياسي جانە رۋحاني ماسەلەلەردى «ويىنعا» اينالدىرماۋدى مىقتاپ ەسكەرتتى. ەل تاعدىرىنىڭ ەشكىمنىڭ ەرمەگى  ەمەسى داۋسىز بولاتىن.

ەل تاعدىرى

مىنە, ەگەمەندىك پەن ەلدىكتىڭ قۇتتى قادامدارى ۇلتتىق مۋزەيدىڭ تورىنەن «مەنمۇندالاپ», زامانالار جۇگىن تەرەڭ زەردەلەتەدى. ەشكىمگە جالتاقتاماي كۇن كەشىپ, الەۋمەتتىك قانا ەمەس, ۇلتتىق ماسەلەلەردى دە ورايىمەن شەشۋ ءۇشىن ەڭ الدىمەن مىقتى بازيس, ياعني, سەنىمدى ىرگەتاس قالاۋ شاپشاڭ قولعا الىنعانىن كورەمىز. شيكىزات شىلاۋىنان مەيلىنشە تەز قۇتىلىپ, ءوندىرىستى ورىستەتۋ ءبىرىنشى كەزەككە شىقتى. اسا قيىن دا الاساپىران زامان ەدى ول. سىرتتاعىسى ءوز الدىنا, ەڭ وكىنىشتىسى, ءوز ىشىمىزدە دە «وسىلاردىڭ قولدارىنان نە كەلەدى ەكەن…» دەپ اڭدىپ وتىرعان قىرعي قاباق «دوستار» كوپ بولاتىن. سوناۋ, 1917-ءنىڭ قازانىنداعى قاندى توڭكەرىستەن باستاپ-اق تۇرمىس-سالتىنىڭ تۇتە-تۇتەسى شىعىپ,  قاساقانا اشارشىلىقتان قايعى جۇتقان, كوش باستار ارىستارىنان ايىرىلعان قازاقتىڭ كۇنى باتۋعا كوپ قالماعان ەدى. ولاي بولسا, تاۋەلسىزدىك تاڭى اتقاندا ءۇش عاسىر وتارلىقتان ابدەن قاجىپ, ەگەمەن ەل بولۋ ەلەسكە اينالىپ, جارقىن كۇندەردەن كۇدەرىن ءۇزىپ, ءزابىر-زاپا شەگىپ, تورىققان  حالقىمىزدىڭ  تاۋەلسىزدىكتىڭ يگىلىگىن قاشان كورگەنشە اسىعۋى زاڭدى ەدى. ەگەمەندىكتىڭ يگىلىگىن دە باسقا ەشكىممەن بولىسكىمىز كەلمەۋىن ابدەن تۇسىنۋگە بولاتىن. بىراق, قىزىل يمپەريانى «كەڭبايتاق ەلىم مەنىڭ, تۋعان ەلىم…» دەپ, ەركىن جايلاعان «اعا بالاسىنىڭ» وعان پاراساتى جەتپەيتىن.

سابىر

ەلباسى قازاعىنىڭ زارىققان ارمانىن جان-تانىمەن تۇسىنە تۇرىپ تا  «اسىقساق تا اپتىقپايىق, اعايىن!» دەپ سابىرعا شاقىردى. وسى باتۋاعا جىعىلعان ەلجاندى ازاماتتار ۇلت مارتەبەسىن كوتەرۋگە جۇدىرىقتاي  جۇمىلدى. اتا زاڭىمىزدا مەملەكەتىمىزدىڭ اۋماقتىق تۇتاستىعى اتاپ كورسەتىلىپ, شەكارامىز بەكىتىلدى. يادرولىق قارۋدان باس تارتىپ, قحر, اقش, رەسەي سياقتى الىپ دەرجاۆالارمەن ماڭگىلىك  دوستىق تۋرالى كەلىسىمگە قول قويىلدى. وسى قايىرلى قادامنىڭ قارىمتاسى رەتىندە ولار قازاق ەلىنە قاۋىپسىزدىك كەپىلدىكتەرىن بەردى.

ۇلتتىق مۋزەيدىڭ ەكسپوزيتسيالارىمەن دەندەي تانىسقان سايىن ەگەمەندىك شەجىرەسى كوز الدىمىزدا شوقتىقتانا تۇسەدى… ەلىمىزدىڭ مەملەكەتتىك رامىزدەرى قازاقتىڭ قايسار رۋحىنىڭ قايتا تۇلەۋىنىڭ ايعاقتارى. ەلدىگىمىزدىڭ باستى بەلگىلەرىنىڭ ءبىرى – انا ءتىلىمىز بىرقاتار قيىندىقتارعا قاراماستان قوعامدا ءوزىنىڭ  مەملەكەتتىك مارتەبەسىنە لايىق تۇعىرعا كوتەرىلۋدە. سول سياقتى قوس ازاماتتىق  دەگەن ارانداتۋ دا تاۋەلسىزدىكتىڭ تابالدىرىعىندا جەر قاپتى. وركەنيەتپەن جان-جاقتى جانە ءوزارا پايدالى بايلانىس ورىستەدى. ۇلتارالىق كەلىسىم ادامزاتتىڭ ءوزارا تۇسىنىستىكتە ءومىر ءسۇرۋىنىڭ بالاماسى جوق ۇلگىسىنە اينالدى. كاسىپكەرلىك قانات جايىپ, ءوندىرىس ورىستەدى. ەڭ باستىسى ادامدى, ونىڭ بوستاندىقتارى مەن قۇقىلارىن اتا زاڭىمىز ءوز اياسىنا الدى.

ادام

«ءبىزدىڭ مەملەكەتىمىزدىڭ ەگەمەندىك العاننان كەيىنگى تابىستارى تۋرالى ايتقاندا, – دەيدى وسى ورايدا ۇلتتىق مۋزەيدىڭ ديرەكتورى دارحان قامزابەكۇلى مىڭباي, – كوبىنەسە ەلباسىنىڭ باسشىلىعىمەن جۇزەگە اسىرىلعان جانە دۇنيە ءجۇزى مويىنداعان ەكونوميكاداعى جەتىستىكتەر تىلگە تيەك ەتىلەدى. داۋسىز تابىس. سول تابىستاردىڭ ارقاسىندا سارىارقا توسىندە زاماناۋي شاھار – استانانىڭ بوي كوتەرگەنى ماقتان ەتىلەدى. ماقتانۋعا ابدەن لايىق. الايدا, ءوز باسىم ءۇشىن ەلباسىنىڭ كورەگەندىگىنىڭ جەمىسى جانە ەگەمەندىكتىڭ تابىسى مەن باياندىلىعى, ەڭ الدىمەن, ەگەمەن ەلدىڭ ەركىن ادامى دەر ەدىم. قازاق ەلىنىڭ اسا قىسقا مەرزىمدە عاسىرعا تەڭ جولدان ءوتۋى دە كەمەڭگەر قازاقتىڭ ەل باسشىلىعىنىڭ ساياساتىنا سەنگەن, وعان بەلسەنە اتسالىسقان تاۋەلسىز, ەڭبەككەر, وتانشىل ۇرپاعىنىڭ ارقاسى. حالقىمىزدىڭ سان عاسىر جيناقتالىپ, اتادان بالاعا مۇرا بولىپ كەلە جاتقان رۋحاني, الەۋمەتتىك, ەڭبەكسۇيگىشتىك جانە ەرلىك داستۇرلەرى ەگەمەندىك العاندا ۇلت بولاشاعىنا, ماڭگىلىك ەل بولۋدىڭ بيىك تە تەرەڭ مۇراتىنا قىزمەت ەتە باستادى».

ماڭگىلىك ەل

مۋزەيدىڭ زاماناۋي ونەر زالىنىڭ تورىنەن ورىن العان كورنەكتى ونەر قايراتكەرى ەربولات تولەپباي باستاعان ءبىر توپ سۋرەتشىنىڭ «جاڭارعان دالا» پانورامالىق سۋرەتىن قازاقستاندىقتاردىڭ سان-سالاداعى قاجىرلى ەڭبەگىنە تاعزىم جانە  ەل بولاشاعى – جاستاردى ارداق تۇتۋدىڭ ايعاعى دەسەك جاراسادى. قازىر دە تامىرى تەرەڭ تارلان تاريحىمىز بەن  سالت-داستۇرلەرىمىز  ۇلت ماقتانىشى بولا وتىرىپ, ۇرپاق نامىسىن جانيدى جانە ونى وركەنيەت بايگەسىنە قامشىلايدى. جاس جىگىتتەر مەن قىزدار  ءۇشىن ونەر مەن ءبىلىم, ەڭبەك پەن ەرلىك, ماقتانىش پەن نامىس قاستەرلى ماقساتقا اينالۋدا… ءبىر ەل, ءبىر تاعدىر, ءبىر بولاشاق. بۇدان باسقا ويدىڭ  بولۋى, ءتىپتى مۇمكىن بە؟!

وي كوپ

ۇلتتىق مۋزەيدىڭ ورتالىق زالىنداعى قۇرىشتان قۇيىلعان جۇدىرىقتاي عانا بەينە «توبىل ويشىلى» دەپ اتالادى. اسپانعا تەلمىرىپ وتىرعان ادام ءمۇسىنى 1977 جىلى قوستاناي قالاسىنىڭ ماڭىنان, توبىل وزەنىنىڭ وڭ جاعالاۋىنان تابىلعان ەكەن. عالىمداردىڭ پىكىرىنشە, ول «قولا داۋىرىندەگى ءمۇسىنشىنىڭ قولىنان شىققان, الەمدىك ونەردىڭ ۇزدىك ۇلگىسى» بولىپ تابىلادى. كەيبىر «جاڭاشىل» سۋرەتشىلەر مەن اقىنداردىڭ «جاتباۋىر» تۋىندىسىنداي ەمەس, جۇرەككە اسا جاقىن. شىنايىلىق پەن شەبەرلىكتىڭ عاجايىپ «جەمىسى» بولعان سوڭ سولاي… كەمەڭگەر بابامىزدىڭ كەمەل بەينەسى كوزگە وتتاي باسىلادى. وي تەرەڭىنە شومعان ونىڭ قۇنىسا شيرىعىپ, جۇدىرىقشا تۇيىلگەنى كورەرمەنىن ەرىكسىز ۇيىتادى.

بار زەيىنى اسپانعا اۋعان ەر ادامنىڭ العا قاراي ۇمسىنعان كەسەك باسى مەن جۋان دا قىسقا مويىنى, ءىرى دە قولاقپانداي مۇرىنى, اۋىر دا جىگەرلى يەگى جانارىڭدى بايلايدى. ەرىندەرىن جىمقىرعان كۇيى جاقتارى قارىسىپ قالعانداي. اينالاسى بىلەمدەنە بۇلتيعان كوزدەرىنىڭ ۇياشىقتارى ونىڭ بەت-ءجۇزىنىڭ جارتىسىنا جۋىعىن الىپ جاتىر. جارىقتىڭ تۇسۋىنە قاراي ويشىلدىڭ نازارىنىڭ باعىتى وزگەرىپ وتىراتىنى بايقالادى. ەرتەدەگى ءمۇسىنشىنىڭ اناتوميانى تەرەڭ بىلگەنى جانە تاستان تاسپا تىلگەن حاس شەبەر ەكەنى كورىنىپ-اق  تۇر. ونىڭ كەيىپكەرى وي سايگۇلىگىنە  قۇرىق سالىپ, بار ىقىلاسىمەن ەركىن قالىقتايتىنداي. بالكىم, ويشىلدى  ەلىنىڭ باقىتتى دا باياندى بولاشاعى الاڭداتاتىن شىعار؟ جۇدىرىقتاي بەينەدەن ەرەسەن ەنەرگيا, شىعارماشىلىق تۇلپار سەرپىلىس پەن تاباندى ەڭبەك شيىرشىق اتادى.

ەڭبەك

جاقىندا مەملەكەتىمىزدىڭ ۇلتتىق مۋزەيىندە رەسپۋبليكالىق ەڭبەككەرلەر فورۋمى بولىپ ءوتتى. وعان  كەڭ-بايتاق ەلىمىزدىڭ تۇكپىر-تۇكپىرىنەن جۇزدەگەن ادام قاتىستى. تۇڭعىش رەت قىركۇيەك ايىنىڭ سوڭعى جەكسەنبىسىندە «ەڭبەك كۇنى مەرەكەسى» تويلاندى. ماقسات – مەملەكەت باسشىسىنىڭ تاپسىرماسىنا سايكەس ەڭبەكتى ىنتالاندىرۋ, جاستار اراسىندا جۇمىسشى كاسىبىن ناسيحاتتاۋ جانە جۇمىسشى اۋلەتتەرىندە كوپجىلدىق ءداستۇردى جالعاستىرۋعا كەلىپ سايادى. اتالمىش فورۋم بارىسىندا قازاقستان ەكونوميكاسىنىڭ دامۋىنا جانە نىعايۋىنا قوسقان ەلەۋلى ۇلەستەرى ءۇشىن 10 ادام «ەڭبەك ارداگەرى» مەدالىمەن ماراپاتتالدى.

زەينەت

سول  ماراپات يەلەرىنىڭ ءبىرى – ەلىمىزدىڭ ەلەكتروەنەرگەتيكا سالاسىنىڭ كەزىندەگى باسشىلارىنىڭ ءبىرى, ەڭبەك مايتالمانى كەجەك بەرشەنۇلى يسكاكوۆ. «ەڭبەك ەتسەڭ ەرىنبەي, تويادى قارنىڭ تىلەنبەي» دەپ, قازاق تەگىن ايتپاعان عوي, – دەپ باستادى ءوز اڭگىمەسىن ارداقتى كەجەك اعا. – سوندىقتان ەڭبەك ادامىنىڭ مارتەبەسىن اسىرۋ ارقىلى ءومىردىڭ ءبىر قۇندىلىعى ەڭبەكتىڭ باعاسىن ارتىرۋ كەرەك-اق. وزدەرىڭ بىلەسىڭدەر, نارىقتى ەكونوميكاعا  كوشەر وتپەلى كەزەڭدە «ساتۋ مەن ساتىپ الۋ» دەگەن الىپساتارلىق قاعيداتى بەلەڭ الدى. جاستاردىڭ وڭاي اقشاعا قىزىعۋشىلىعى ءالى دە بولسا, باسىم. ولار  بىلىكتى دە باياندى ەڭبەكتىڭ ارقاسىندا عانا بەرەكەلى تۇرمىس قۇرۋدىڭ مۇمكىن ەكەنىن تۇسىنۋلەرى قاجەت».

ادامزاتتىڭ قازىرگى دامۋ دەڭگەيى دە سول بەينەتتى دە زەينەتتى ەڭبەكتىڭ ارقاسى ەكەنى ايان. ءبىز عوي, قازىرگى تەحنيكا مەن تەحنولوگيا سالاسىنداعى جاڭالىقتارعا تىماعىمىزدى اسپانعا اتامىز… ولار العاشقى ادامدار ءومىر ءسۇرۋ ءۇشىن ءبارىن دە وزدەرى ويلاپ تاپتى. تىڭنان تۇرەن سالدى. ولاردىڭ ومىرلەرىنىڭ ءاربىر ءساتى جارىق دۇنيە ءۇشىن جانتالاسقا اينالدى. تۇرعىنجايدان باستاپ, تۇرمىس قۇرالدارىنا شەيىن ءوز قولدارىمەن, ماڭداي تەرىمەن جاسادى. ايانباي كۇرەستى… بىرتە-بىرتە ءبىزدىڭ اتا-بابالارىمىز ءومىر ءسۇرۋدىڭ ءوزىن ونەرگە اينالدىردى.

ونەر

ۇلت رەتىندە قالىپتاسىپ جانە ساقتالىپ قانا قويماي, سالت-ءداستۇرىن دامىتىپ, شارۋاشىلىق جۇرگىزۋ مادەنيەتىن وركەندەتە وتىرىپ الدىڭعى قاتارلى ەلدەرمەن تەرەزەسى تەڭ تۇرمىس قۇرۋعا ۇمتىلۋ ءومىر ءسۇرۋ مادەنيەتىن مەڭگەرۋدىڭ تاماشا ۇلگىسى بولاتىن. ءبىزدىڭ قاھارمان اتا-بابالارىمىز اينالاسىن اقىلمەن دە «ارقانداپ», الداسپاننىڭ ايباتىمەن دە ىقتىرا ءبىلدى. ءومىر ءسۇرۋ ونەرىن جەتە مەڭگەردى جانە سونىڭ ارقاسىندا باي رۋحاني جانە ماتەريالدىق قازىناسىن ۇرپاقتان ۇرپاققا امانات ەتىپ وتىردى. ءبىر عانا ارحەولوگيالىق ىزدەۋلەر ناتيجەسىندە تابىلعان ەرتە عاسىرلاردا التىننان, كۇمىستەن جانە اسىل تاستاردان سومدالعان  تۋىندىلار حاس شەبەرلەردىڭ ونەرىنە تاڭداي قاقتىرادى. قولا داۋىرىنەن باستاپ بۇگىنگى زامانعا دەيىن ۇلى دالادا قالىپتاسقان كوركەم-ەستەتيكالىق تالعام ەرىكسىز ءتانتى ەتكەندەي. جەتىسۋ ءوڭىرىنىڭ ەسىك وباسى مەن مىڭشۇڭقىردان (ك.ا.اقىشەۆ قازباسى), شىعىس قازاقستاننىڭ بايگەتوبەسىنەن ء(ا.ت.تولەۋباەۆتىڭ قازباسى), سارىارقانىڭ تالدىسىنان (ا.ز.بەيسەنوۆتىڭ قازباسى) تابىلعان التىن ادام مەن باسقا دا التىن اشەكەيلەر ونەرپاز حالقىمىزعا دەگەن ماقتانىش سەزىمىن تۋعىزادى.

ماقتانىش

ۇلتتىق مۋزەيگە ءبىر مارتە بولسا دا جولى تۇسكەن زامانداستىڭ كەۋدەسىن ماقتانىش سەزىمى كەرنەيدى. ءبىز تامىرى تەرەڭ تاريحى, كەمەڭگەر كوشباسشىلارى بار, ەڭبەگىمەن, ەرلىگىمەن, ونەرىمەن بۇگىنگى كۇنگە جەتكەن حالىقپىز. ءبىز سول اتا-بابالار اماناتىنا ادال, ءبىلىمدى دە, نامىسشىل, قانداي دا ءبىر الامان بايگەگە بىلەك سىبانىپ, دايىن تۇرعان ۇرپاعى بار حالىقپىز. ۇلتتىق مۋزەيمەن جۇزدەسۋدەن ءبىز تۇيگەن ماڭگىلىك ەل مارتەبەسى وسىنداي.

بولات جۇنىسبەكوۆ,

جازۋشى