ماسكەۋدە ەۋرازيالىق ەكونوميكالىق وداقتىڭ بەس جىلدىعىنا بايلانىستى مەتروپوليتەنگە تاقىرىپتىق پويىز جۇرگىزىلدى. ونىڭ قۇرامىنداعى بەس ۆاگوننىڭ ءاربىرى ينتەرەرلەرى وسى وداققا مۇشە ارمەنيا, بەلارۋس, قازاقستان, قىرعىزستان جانە رەسەي ەلدەرىنە ارنالدى. ۆاگونداردىڭ قابىرعالارىنا وسى بەس مەملەكەتتىڭ نەگىزگى ونەركاسىپ سالالارىنا, ىشكى جالپى ءونىمنىڭ وسىمىنە, ۇلتتىق اس مازىرىنە, ۇلى تۇلعالارىنا قاتىستى مالىمەتتەر جازىلىپ قويىلدى.
قازاقستان ۆاگونىندا استاناداعى «بايتەرەك» مونۋمەنتى, «بايقوڭىر» عارىش ايلاعى جانە قازاقتىڭ ەت تاعامىنىڭ ءپىسىرۋ ءتاسىلى تۋرالى مالىمەتتەر ىلىنگەن. مۇنداي سونداي-اق قازاقتىڭ ارقالى اقىنى مۇقاعالي ماقاتاەۆتىڭ بىرنەشە ولەڭى ورىن الىپتى. وندا قازاق شايىرىنىڭ وتان تۋرالى, حالىق تۋرالى جىرلارى بار. ءار ۆاگونداعى QR-كودتار سونىمەن قاتار جولاۋشىلارعا ەاەو جايلى انيماتسيالىق روليكتەر كورۋگە مۇمكىندىك بەرەدى.
پويىز كرەملدى قالا مەتروسىنىڭ شەڭبەر سىزىعى بويىمەن ءجۇرىپ ءوتىپ تۇرادى. ول جارتى جىل بويى وسى ميسسياسىن اتقارادى. وسى ارالىقتا ءۇش ميلليون جولاۋشىنى تاسىمالدايدى دەگەن بولجام بار.
«بۇل پويىزعا مىنگەن جۇرت ءبىزدىڭ وداقتىڭ تۇپكى ماقساتى نە ەكەنىن, وسى وداققا كىرەتىن ءاربىر ەلدىڭ وعان قوساتىن ۇلەسى قانداي ەكەنىن انىق اڭعارادى. بۇل اليانستىڭ بەكەر قۇرىلماعانىن بايقاتار ەدى» دەيدى ەۋرازيا ەكونوميالىق كوميسسياسى القاسىنىڭ توراعاسى تيگران ساركيسيان.
ەۋرازيا ەكونوميكالىق وداقتى قۇرۋ جونىندەگى شەشىم 2014 جىلعى 29 مامىردا قابىلداندى. ول 2015 جىلعى 1 قاڭتاردا كۇشىنە ەنىپ, ءوز جۇمىسىن باستادى.
راسۋل ايتقوجا
