الداعى 19-20 قىركۇيەك كۇندەرى ماسكەۋدە استانانىڭ مادەني كۇندەرى وتەدى. وندا كونە قالانىڭ تۇرعىندارى قازاقتىڭ باي مادەني مۇراسىمەن تانىسىپ, اۋەزدى اۋەن مەن كۇمبىرلەگەن كۇيدىڭ سازىنا بولەنىپ, ۇلتتىق ونەردىڭ ءىنجۋ-مارجاندارىن تاماشالايدى.
اۋقىمدى شارا اياسىندا ماسكەۋلىكتەرگە ەجەلگى كوشپەلى ءداۋىردىڭ كەلبەتىن بەينەلەيتىن ەتنواۋىل ەكسپوزيتسياسى ۇسىنىلادى. ەتنواۋىل الاڭىندا «اق وردا», «اڭشىنىڭ ءۇيى», «شەبەرلەردىڭ كيىز ءۇيى», «قولونەرشىلەر شەبەرحاناسى» جانە تاعى باسقا تاقىرىپتى قامتىعان كيىز ۇيلەر تىگىلەدى. حالىق شارۋاشىلىعى جەتىستىكتەرىنىڭ كورمەسى كورسەتىلەدى. ەتنواۋىلدى تاماشالاۋعا كەلگەندەر قازاقتىڭ كيىز ءۇيىن قۇرۋعا قاتىسادى. ۇلتتىق تاعامداردان اۋىز تيەدى. قىمىز بەن شۇباتتان ءدام تاتادى.
سونىمەن قاتار,ەتنواۋىل اۋماعىندا «ەكسپو-2017» پاۆيلونى اشىلادى. قوناقتاردى الىپ باتىرلار مەن ۇلتتىق كيىم كيگەن قىزدار قارسى الادى. ۇيىمداستىرۋشىلاردىڭ ايتۋىنشا, بۇل ناعىز قازاق اۋىلىنىڭ كوركەم كەلبەتىن قالىپتاستىرادى. ەكسپوزيتسيا تاڭعى ساعات 10.00-دەن كەشكى 22.00-گە دەيىن جۇمىس ىستەيدى.
سونداي-اق, رەسەيلىك كورەرمەندەر سوڭعى جىلدارى تۇسىرىلگەن قازاقستاندىق كينەماتوگرافتاردىڭ كوركەم تۋىندىلارىمەن تانىسادى. 19 جانە 20 قىركۇيەكتە «كوسموس» كينوكونتسەرت زالىندا «جاۋجۇرەك مىڭ بالا» جانە «امانات» فيلمدەرى كورسەتىلەدى. 19 قىركۇيەكتە مەملەكەتتىك كرەمل سارايىنىڭ ساحناسىندا قازاقستاندىق ەسترادا جۇلدىزدارىنىڭ قاتىسۋىمەن گالا-كونتسەرت وتەدى. وندا وتاندىق ونەر تارلاندارى, اتاپ ايتقاندا, قر حالىق ارتىستەرى الىبەك دىنىشەۆ, روزا رىمباەۆا, ايمان مۇساقوجاەۆا جانە مايرا مۇحامەدقىزى ونەر كورسەتەدى. «سلاۆيانسكي بازار-2015» كونكۋرسىنىڭ جەڭىمپازى ديماش قۇدايبەرگەن, بۇركىت پەن ايشا, «مۋزارت», «فورمات», «رينگو» توپتارى ءان شىرقايدى. وعان «ناز» مەملەكەتتىك بي تەاترى مەن «شالقىما» حالىق ءبيى ءانسامبلى, استانا قالاسى مەملەكەتتىك فيلارمونياسىنىڭ قازاق حالىق اسپاپتارى وركەسترى جانە «استانا» ەسترادالىق-سيمفونيالىق وركەسترى, «تۇران» ەسترادالىق-فولكلورلىق ءانسامبلى جانە «سەرپەر» دومبىراشىلار ءانسامبلى قاتىسادى.
ساتيرا كەشىندە تۇرسىنبەك قاباتوۆ باستاعان ۇزدىك ازىلكەشتەر ماسكەۋلىكتەرگە كوتەرىڭكى كوڭىل-كۇي سىيلايدى. بۇل كۇنى رەسەيلىك «ا-ستۋديو» توبى دا كەلۋشىلەردى ءوز ونەرلەرىمەن قۋانتادى.
18-20 قىركۇيەكتە استانا مەن ماسكەۋ قالالارىنىڭ بىلعارى قولعاپ شەبەرلەرى ءوزارا كۇش سىناسادى. ەلوردا قۇراماسىنان جارىسقا 16 سپورتشى قاتىسادى.
20 قىركۇيەكتە ساعات 19.00-دە رەسەيدىڭ ءىرى مادەني ورتالىعى – ماسكەۋ حالىقارالىق مۋزىكا ءۇيىنىڭ ساحناسىندا م. گوركي اتىنداعى اكادەميالىق ورىس دراما تەاترىنىڭ بولات جانداربەكوۆتىڭ «ساقتار» رومانىنىڭ جەلىسىمەن دايىندالعان «توميريس – ساق پاتشايىمى» قويىلىمى جۇرتشىلىققا ۇسىنىلادى. ءدال وسى كۇنى ۇزدىك قازاقستاندىق سۋرەتشىلەر مەن مۇسىنشىلەردىڭ ەڭبەكتەرى قويىلعان «جۋسان ءيىسى» اتتى بەينەلەۋ ونەرىنىڭ كورمەسى اشىلادى. ەكسپوزيتسيا نيۋ-يورك, بەرلين جانە بەيجىڭ سياقتى ءىرى قالالاردا وتكىزىلىپ, جەرگىلىكتى ماماندار مەن ونەردى باعالاۋشىلار اراسىندا ۇلكەن جەتىستىككە قول جەتكىزگەن. كوپشىلىك نازارىنا ۇسىنىلاتىن تۋىندىلار كورمەسى «جۇمىسشى مەن كولحوزشى» كورمە ورتالىعىندا 2 قازانعا دەيىن جالعاسادى.
ازامات ەسەنجول
