ءماسليحاتتار سايلاۋىنا ازىرلىك قانداي؟
ءتيىستى زاڭعا سايكەس, 26 ناۋرىز كۇنى ءماسليحاتتاردىڭ شىعىپ قالعان دەپۋتاتتارىنىڭ ورنىن تولتىرۋ ماقساتىندا ەلىمىزدە سايلاۋ وتەدى. وسىعان وراي كەشە قر ورتالىق سايلاۋ كوميسسياسىنىڭ توراعاسى بەرىك يماشەۆ پەن استانا قالاسى اكىمىنىڭ ورىنباسارى ەرمەك امانشاەۆ قالاداعى №20 سايلاۋ وكرۋگىندە بولىپ, سايلاۋ كوميسسيالارى جۇمىسى مەن سايلاۋ ۋچاسكەلەرىنىڭ دايىندىعىمەن تانىستى.
ءماسليحاتتار سايلاۋى ءبىر ۋاقىتتا مەملەكەتىمىزدىڭ 58 سايلاۋ وكرۋگىندە ۇيىم-داستىرىلادى. بوساپ قالعان ورىندارعا 201 كانديدات ءوتىنىش بەرسە, ولاردىڭ 188-ءىن سايلاۋ كوميسسيالارى تىركەدى. ءتيىستى تالداۋ جۇرگىزىلگەندە, ءبىر ورىنعا ءۇش كانديداتتان كەلەتىنى انىقتالدى. ولاردىڭ جاسىنىڭ ورتاشا كورسەتكىشى – 40 جاس.
№20 سايلاۋ وكرۋگىنە كەلسەك, دەپۋتاتتىق مانداتتى يەلەنۋگە 7 ۇمىتكەر ءوتىنىش بەرگەن. كەيىننەن ەكەۋى وتىنىشتەرىن قايتارىپ, قورىتىندىسىندا 5 ادام تىركەلدى. ولاردىڭ بىرەۋى «نۇر وتان» پارتياسىنىڭ, بىرەۋى قازاقستاننىڭ كوممۋنيستىك حالىق پارتياسىنىڭ ءمۇشەلەرى بولسا, ۇشەۋى ەش پارتيادا جوق.
وسىندا تىركەلگەن كانديداتتاردىڭ اراسىندا قىرىق جاسقا جەتپەگەندەر دە بار ەكەن.
سايلاۋ كوميسسيالارى مۇشەلەرىمەن كەزدەسكەن بەرىك يماشەۆ ەلىمىزدە جۇرگىزىلگەن كونستيتۋتسيالىق رەفورماعا ساي سايلاۋ ناۋقانى الدىندا تۇرعان ءمىندەتتەرگە توقتالدى. جۇزدەسۋ بارىسىندا تۇيتكىلدەر دە قوزعالماي قالعان جوق. ماسەلەن, سايلاۋ ناۋقانى كەزىندە كوميسسيا مۇشەلەرى ءتۇننىڭ ءبىر ۋاعىنا دەيىن جانە دەمالىس كۇندەرى دە جۇمىس ىستەيدى. وسى جۇمىس ءۇشىن ەڭ مينيمالدى جالاقىنىڭ ۇشكە كوبەيتكەن قوسىندىسىن الادى. الايدا نەگىزگى جۇمىس ورنىنداعى جالاقىنى المايدى.
استانا قالالىق سايلاۋ كوميسسياسىنىڭ توراعاسى يگىلىك جالبىروۆ ۋچاسكەلىك سايلاۋ كوميسسيا مۇشەلەرىنىڭ سانى 7 ادامنان تۇراتىنىن, ولار قىرۋار جۇمىس اتقارۋعا ءماجبۇر ەكەنىن ايتىپ, ولاردىڭ سانىن كوبەيتۋ جونىندەگى ۇسىنىسىن جەتكىزدى.
«اتالعان ماسەلەلەردى تەرەڭ تالقىلاۋ كەرەك. ولار بيۋدجەتتىڭ قوسىمشا شىعىندارى مەن ءتيىستى زاڭناماعا وزگەرىستەر ەنگىزۋدى قاجەت ەتەدى. بۇل بولاشاقتىڭ جۇمىسى دەپ ويلايمىن» دەدى بەرىك يماشەۆ.
بۇدان وزگە دە بىرنەشە ۇسىنىستار ايتىلىپ, ءتيىستى جاۋاپتار بەرىلدى.
امانعالي قالجانوۆ