استانا قالاسى اكىمدىگى مەن MCDONALD’S قازاقستان كومپانياسى ءوزارا ىنتىماقتاستىقتى دامىتۋ تۋرالى مەموراندۋمعا قول قويدى. ويتكەنى جىلدام تاماقتاندىرۋمەن اينالىساتىن كومپانيا «ەكسپو-2017» كەزىندە ەرىكتىلەردى تەگىن تاماقتاندىرادى.
استانا قالاسى اكىمىنىڭ ورىنباسارى ماليكا بەكتۇروۆانىڭ ايتۋىنشا, مەموراندۋمعا قول قويۋ – مەملەكەت پەن بيزنەستىڭ ءوزارا ارىپتەستىگىن ارتتىرا تۇسەدى. ماسەلەن, كومپانيا حالىقارالىق كورمە كەزىندە استانا قالاسى اكىمدىگىنىڭ 1500 ەرىكتىسىن تۇسكى اسپەن قامتاماسىز ەتەدى.
ال اتالعان كومپانيانىڭ باس ديرەكتورى لەنار كۋتلين استانا قالاسى جاستار ساياساتى ماسەلەلەرى باسقارماسىنىڭ ۇندەۋىنە بەيجاي قاراي الماعانىن تىلگە تيەك ەتتى. ياعني, McDonald’s الەۋمەتتىك جاۋاپكەرشىلىگى زور كومپانيا رەتىندە ەرىكتىلەردى تاماقتاندىرۋ ءۇشىن جالپى قۇنى 50 ميلليون تەڭگە بولاتىن 46 مىڭ كۋپون ءبولىپ وتىر.
– قازىرگى تاڭدا الەۋمەتتىك-ەكونوميكالىق ماسەلەلەردى شەشۋدە مەملەكەتتىك باسقارۋ ورگاندارى مەن كاسىپكەرلەردىڭ تىعىز بايلانىسى بولماسا ەلىمىزدىڭ الدىنا قويعان ستراتەگيالىق ماقساتتارىنا جەتۋ مۇمكىن ەمەس. بۇل سەرىكتەستىك ەكى تاراپتىڭ مەملەكەتىمىزدىڭ الەۋمەتتىك-ەكونوميكالىق دامۋىنا نەگىز بولادى ءارى ورتاق ماسەلەنى شەشۋدە بىرىگىپ جۇمىس ىستەي الاتىندىعىن كورسەتەدى. ماسەلەن, «ەكسپو-2017» حالىقارالىق كورمەسىندە قىزمەت كورسەتەتىن 1500 ەرىكتى اسا ماڭىزدى شارا كەزىندە ەلىمىزدىڭ بەدەلىن كوتەرەدى. سوندىقتان دا ءبىز ەرىكتىلەرگە جان-جاقتى جاعداي جاساپ, ولارعا ەرەكشە قۇرمەتپەن قارايمىز, – دەدى ل.كۋتلين.
سەرىك جولداسباي
