«مەديكەر» ەكسپو سەرىكتەسى
«مەديكەر» جانە «استانا ەكسپو-2017» كومپانيالارى ەكى-جاقتى مەموراندۋمعا قول قويىپ, سونىڭ ناتيجەسىندە جوعارىداعى ۇيىم ەكسپو كورمەسىنىڭ وپەراتورى ءارى سەرىكتەسى اتاندى.
جاسالعان كەلىسىم اياسىندا «مەديكەر» جشس ءوز ينۆەستيتسياسىنىڭ ەداۋىر بولىگىن مامانداندىرىلعان كورمە الاڭىندا اشىلاتىن مەديتسينالىق ورتالىقتار مەن 6 مەديتسينالىق پۋنكتتىڭ تالاپقا ساي جابدىقتالۋىنا باعىتتايدى.
– ءبىزدىڭ فيرمامىز ءۇشىن بۇل ۋاقيعا – ۇلكەن ابىروي. وسى ارقىلى بىزگە ارتىلعان سەنىمنىڭ قانشالىقتى بيىك دەڭگەيدە ەكەنىن بايقادىق. ارينە, جۇكتەلگەن جاۋاپكەرشىلىك وتە جوعارى. سونىڭ ۇدەسىنەن شىعىپ, مەموراندۋمنىڭ تالاپتارىن ساپالى ءارى ۋاقىتىلى ورىندايتىنىمىزعا كەپىلدىك بەرەمىز, – دەدى «مەديكەر» كومپانياسىنىڭ باسقارما ءتورايىمى گۇلجان سادىرباەۆا.
ەكسپو كورمەسىندە حالىقارالىق ستاندارتتار بويىنشا ارنايى وقىتىلعان ماماندار – دارىگەرلەر, ۇيلەستىرۋشىلەر جانە باسقا دا مەديتسينالىق قىزمەتكەرلەر جۇمىس ىستەيتىن بولادى. «بولاشاق ەنەرگياسى» دەگەن تاقىرىپپەن وتكەلى جاتقان اۋقىمدى ءىس-شارانى قولدايتىن «مەديكەر» فيرماسى بۇگىندە بارلىق قىزمەتىن قۋات ۇنەمدەۋ ساياساتىنا سايكەس جۇرگىزۋدە.