استانالىق مەديتسينا سالاسىنىڭ قىزمەتكەرلەرى مەيىربيكە كۇنىن مەرەكەلەدى. №2 قالالىق بالالار اۋرۋحاناسىندا وتكەن سالتاناتتى جينالىستا دەنساۋلىق ساقتاۋ باسقارماسىنىڭ باسشىسى ايگۇل سەگىزباەۆا ورتا مەديتسينا قىزمەتكەرلەرىن كاسىبي مەرەكەسىمەن قۇتتىقتاپ, دەنساۋلىق ساقتاۋ ىسىنە قوسقان ۇلەستەرى ەرەكشە اتاپ ءوتتى.
بۇگىندە قالالىق دەنساۋلىق ساقتاۋ باسقارماسىنا قاراستى 33 مەديتسينالىق ۇيىمدا بەس مىڭنان استام ورتا مەديتسينا قىزمەتكەرى ەڭبەك ەتەدى. ولاردىڭ 41 پايىزىنىڭ اتتەستاتسيالىق بىلىكتىلىك ساناتتارى بار.
– دارىگەرلەردىڭ قولقاناتى بولا ءجۇرىپ, ناۋقاستىڭ جازىلىپ كەتۋىنە ادال قىزمەت ەتەتىن ابزال جاندارعا قۇرمەتىمىزدى بىلدىرگىمىز كەلەدى. ەلوردالىق ءۇش مەيىربيكە دەنساۋلىق ساقتاۋ ءىسىنىڭ ۇزدىگى اتاندى. جەتپىستەن استام اق حالاتتى ابزال جاندارىمىزعا العىس ايتىپ, ەڭبەگىن ەلەدىك, – دەدى دەنساۋلىق ساقتاۋ باسقارماسىنىڭ باسشىسى ايگۇل سەگىزباەۆا.
شارا سوڭىندا دەنساۋلىق ساقتاۋ ءىسىنىڭ ۇزدىگى اتانعان مەيىربيكەلەر زاۋرەش ابدىحالىقوۆا, ءاليا اقۋباسوۆا جانە گۇلزي ابەنوۆا ارىپتەستەرىنىڭ قۇرمەت-قوشەمەتىنە بولەندى.
ايگۇل ۋايسوۆا
