مەرەكە قارساڭىندا ەلوردا دەنساۋلىق ساقتاۋ سالاسىندا بىرەگەي كاسىبىمەن ەرەكشەلەنەتىن, كوبىنە ەرلەر اتقاراتىن جۇمىستان تارتىنبايتىن جانداردى وقىرماندارعا تانىستىرعىم كەلدى. ويىمدا حيرۋرگ, انەستەزيولوگ, تراۆماتولوگ سياقتى جاۋاپكەرشىلىگى اۋىر ماماندىق يەلەرىن تاڭدارمىن دەپ ويلاعانمىن. دەگەنمەن ول ويىمنىڭ وزگەرۋىنە ەرەكشە كەيىپكەرىمىزبەن بولعان كەزدەسۋ اسەر ەتتى.
ول – «نۇر وتان» پارتياسىنىڭ استانا قالاسىنداعى «وركەنيەت» فيليالى توراعاسىنىڭ ءبىرىنشى ورىنباسارى ماريا وتەباەۆا. ماريا مۇحتارقىزى ۇجىمنىڭ قۇرىلعان 2009 جىلعى 15 قىركۇيەگىنەن وسى ءىستىڭ باسىندا ءجۇر. ونىڭ قۇرامىندا بۇگىندە 1850-دەن استام پارتيا مۇشەلەرى – مەديتسينا قىزمەتكەرلەرى بار ەكەن.
ساياسات پەن دەنساۋلىق سالاسىنىڭ ءتۇيىسەتىن تۇستارى قايدا دەگەنىمىزدە, ماريا مۇحتارقىزى وتكەن ايدا وتكەن «نۇر وتان» پارتياسىنىڭ XVIII سەزىندە ەلباسىنىڭ سويلەگەن ءسوزىن العا تارتىپ, پارتيا قىزمەتىنەن حاباردار ەتتى. «باقۋاتتى قوعام: ونجىلدىقتىڭ 10 ماقساتى» اتتى 2030 جىلعا دەيىنگى ارالىقتى قامتيتىن جوسپاردا پارتيا الەۋمەتتىك باعىتتارعا ەرەكشە باسىمدىق بەرىپ وتىر.
پارتيانىڭ العا قويعان تاعى ءبىر ماقساتى – ۇلت دەنساۋلىعىنىڭ مىقتى بولۋىنا قول جەتكىزۋ, ول ءۇشىن وتاندىق مەديتسينا وشاقتارىن دامىتۋ, ولاردىڭ ماتەريالدىق بازاسىن نىعايتىپ, ينفراقۇرىلىمدى دامىتۋ, ۇزدىك مامانداردى تارتۋ, وسىنىڭ ناتيجەسىندە دەنى ساۋ ۇلت قالىپتاستىرۋ. مۇنىڭ ءبارى قوعامدىق دەنساۋلىق ساقتاۋ سالاسىنداعى ارقايسىمىزدىڭ ۇلەسىمىزبەن قول جەتكىزىلەدى.
ايتالىق, «نۇر وتان» پارتياسىنىڭ استانا قالاسىنداعى «وركەنيەت» فيليالى «باقىتتى بالالىق» پارتيالىق جوباسىن ىسكە اسىرۋ شەڭبەرىندە جىل سايىن بالالارعا, الەۋمەتتىك تۇرعىدان حالىقتىڭ وسال توبىنا جاتاتىن جاندارعا مەديتسينالىق كومەك كورسەتەدى. «جەكەلەگەن ازاماتتاردان تۇسكەن وتىنىشتەردى قاراپ, ونىڭ وڭ شەشىمىنە ءمان بەرەمىز. ۇستىمىزدەگى جىلدىڭ قاڭتارىنان باستاپ «مەيىرىم سىيلا» الەۋمەتتىك جوبا ىسكە قوسىلىپ, بالالارعا «University Medical Center» كورپوراتيۆتىك قورىنان 10 كۆوتا قوسىمشا ءبولىندى. پارتيانىڭ 20 جىلدىعىنا وراي «نۇر وتان» پارتياسى – 20 ىزگى ءىس» شاراسىن وتكىزدى. وسى رەتتە «University Medical Center» كورپوراتيۆتىك قورىنان انا مەن بالا ۇلتتىق عىلىمي ورتالىعىندا ناۋقاستاردى دياگنوستيكالاۋ جانە اۋرۋحاناعا جاتقىزۋ ءۇشىن 62 كۆوتا بولەدى. بۇلار اۋىر دياگنوزى بار ناۋقاستاردى ستاتسيونارلىق ەمدەۋگە جاتقىزۋ ءۇشىن ءبولىندى. بۇلاردىڭ اراسىندا زەينەتكەرلەر مەن جالعىزىلىكتى انالاردىڭ ەم-دومىنا كەزەكسىز ءبولۋ قاراستىرىلعان» دەدى ماريا وتەباەۆا.
بۇدان بولەك, وسى ورتالىقتاردا ەڭبەك ەتىپ جۇرگەن مەديتسينا قىزمەتكەرلەرىنىڭ قىزمەتىن ۇيىمداستىرۋ, ولاردىڭ دا مۇڭ-مۇقتاجدارىنا قۇلاق اسىپ, وسى باعىتتا الەۋمەتتىك جوبالارعا وزگەرىستەر ەنگىزىپ, مۇددەلەرىن العا شىعارۋ ءۇشىن دە جۇمىس ىستەيدى.
