رۋحى بار نارسە قاشاندا قۇندى. «استانا دارىنى» وڭىرلىك عىلىمي-تاجىريبەلىك ورتالىعى عاسىردان عاسىرعا جەتەر وسى قۇندىلىقتى وقۋشىلار اراسىندا دارىپتەۋدى داستۇرگە اينالدىرعان. بيىل ونىنشى رەت شىمىلدىعىن تۇرگەن سايىس ەلباسىنىڭ «ۇلى دالانىڭ جەتى قىرى» ماقالاسىنا وراي, قازاق كينو ونەرىن قامتىدى.
جىل سايىن وتكىزىلەتىن بۇل بايقاۋ وقۋشىلاردى وتانسۇيگىشتىككە, ۇلتتىق قۇندىلىقتارىمىزدى قۇرمەتتەۋگە باعىتتالعان. قالا بويىنشا بارلىق مەكتەپتەردىڭ 9-10 سىنىپ وقۋشىلارىنان وزىپ شىققان 15 كوماندا اقتىق سىندا باقتارىن سىنادى.
جارىستىڭ شارتى بويىنشا ءبىرىنشى اينالىم «تۇساۋكەسەر» دەپ اتالادى. مۇندا وقۋشىلار قازاق كينوسىنان ءۇزىندى كەلتىرىپ, ساحنالىق كورىنىستەر قويۋى ءتيىس. ەكىنشى اينالىمدا ۆيكتورينالىق سۇراقتارعا جاۋاپ بەرىپ, ءبىلىم دەڭگەيىن ساراپتايدى. ءۇشىنشى اينالىمداعى «سيقىرلى ساندىق» دەپ اتالاتىن سىن – ەڭ قيىن كەزەڭ. مۇندا وقۋشىلار سيپاتتاما ارقىلى جاسىرىلعان زاتتى انىقتاۋى ءتيىس. بۇل جەردە وقۋشىنىڭ سۋرەتكەرلىك قىرىمەن ءتىل بايلىعى دا تارازىلانادى.
«استانا دارىنى» وڭىرلىك عىلىمي-تاجىريبەلىك ورتالىعى ۇيىمداستىرىپ وتىرعان بۇل سىنعا ەلىمىزگە ەسىمى تانىس اكتەرلەر مەن وپەرا جانە بالەت تەاترىنىڭ رەجيسسەر ماماندارى باعا بەرىپ, قازىلىق ەتتى. قاتىسۋشىلارعا ۇسىنىلعان فيلمدەردەن جاستاردىڭ سان قىرلى كوركەم وبرازداردى سومدايتىن ەستەتيكالىق قۇبىلىس ارقىلى جالپى دۇنيەتانىمىن, ۇلتتىق قۇندىلىقتاردى بويىنا سىڭىرۋگە ىقپال ەتەتىن ەپيزودتارىن تاڭداۋ تالاپ ەتىلدى.
وقۋشىلار ساحنادا شوقان بولىپ تولعانىپ, اباي بولىپ ءان شىرقادى. مانشۇك بوپ ەرلىك كورسەتىپ, تولەگەن بوپ تەبىرەندى. قازاق كينوسىنا ەرەكشە سەرپىلىس اكەلگەن مىقتى كينولاردان ءۇزىندى كورسەتۋ ولاردىڭ قولدارىنان كەلدى.
سايىس قورىتىندىسى بويىنشا №64 مەكتەپ-ليتسەيى جەڭىمپاز اتانىپ, باس جۇلدەمەن ماراپاتتالدى. جۇلدەلى ءى ورىندى №76 مەكتەپ-ليتسەيى, ءىى ورىندى №82, №3, №73, №70, ءىىى ورىندى №75, №66, №52, №85, №48, №74 مەكتەپتەر يەلەندى. سونىمەن قاتار №6 گيمنازيا «ونەرلى كوماندا», №81 «Astana English School» گيمنازياسى «كورەرمەن كوزايىمى», №30 مەكتەپ-گيمنازيا «ساحنالىق شەبەرلىك» نوميناتسيالارىمەن ماراپاتتالدى.
