كوگىلدىر كوكتەم مەرەكەسى قارساڭىندا ىسىمەن دە, سوزىمەن دە كوپشىلىككە ۇلگى بولىپ, ۇجىمىنىڭ قۇرمەتىنە بولەنىپ جۇرگەن بەس بالانىڭ اناسى, پوليتسيا كاپيتانى الماگۇل الماعانبەتوۆا تۋرالى ءبىر ۇزىك اڭگىمە وربىتكەندى ءجون كوردىم.
الماگۇل جاستايىنان پوگون تاققان جاندارعا قىزىعىپ ءوستى. ونىڭ بالا قيالى كەي كەزدەردە قياندارعا شارىقتاپ, سول اعا, اپالارىمەن بىرگە كەرەمەت ءبىر جۇرت تاڭداي قاعاتىن ءىس تىندىرعىسى دا كەلەتىن. ءسويتىپ, بوي جەتىپ, التىن ۇيا مەكتەبىنەن تۇلەپ ۇشقاننان كەيىن ارمان جەتەگىندە جاستايىنان جانى سۇيگەن ماماندىقتى تاڭدادى. ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ زاڭ فاكۋلتەتىنە وقۋعا ءتۇسىپ, ونى 2008 جىلى ويداعىداي ءبىتىرىپ شىقتى.
اتا-اناسى ادال ەڭبەگىمەن ەلىنە ەلەۋلى, حالقىنا قالاۋلى بولىپ جۇرگەن قاراپايىم جاندار ەدى. اكەسى جانسەرىك تە, اناسى دامەتكەن دە قىزىنىڭ جۇرەك قالاۋىنا قارسى بولا قويعان جوق. الدىنا اسقارالى ماقساتتار قويا بىلگەن الماگۇل جانسەرىكقىزى ءوزى تۋىپ-وسكەن قالاسىنىڭ ءبىر كەتىگىنە كىرپىش بولىپ قالانعىسى كەلدى. تاجىريبەسىنىڭ ازدىعىنا قاراماستان, جاسوسپىرىمدەرمەن جۇمىس ىستەۋدى تاڭدادى. سول ۋنيۆەرسيتەت قابىرعاسىنان تۇلەپ ۇشقان بويدا سارىارقا اۋدانى جەرگىلىكتى پوليتسيا باسقارماسىنىڭ ايماقتىق يۋۆەنالدىق پوليتسيا ينسپەكتورى بولىپ جۇمىسقا ورنالاستى.
– وسى ماماندىقتى تاڭداردا كوپ ويلاندىم. بالا كۇنىمنەن جاقىن ارالاساتىن اعا-اپالارىمنىڭ وقالى كيىم كيىپ, ارقاشان سىمداي تارتىلىپ, قىزمەتتە جۇرگەنى وتە ۇنايتىن. العاشقى ءومىر باسپالداقتارىن اتتاردا انامنىڭ وڭاشادا ايتقان اقىل-كەڭەستەرى, اسىرەسە, «قىزىم, بۇل قىزمەت سەنەن اسا تاباندىلىقتى, توزىمدىلىك پەن قاجىر-قايراتتى تالاپ ەتەدى. كەي كەزدەردە جەكە ءومىردى ۇمىتىپ, قىزمەتىڭنىڭ جاۋاپكەرشىلىگىن جان-جۇرەگىڭمەن سەزىنە بىلسەڭ عانا الدىڭا قويعان ۇلكەن تالاپتاردى ورىنداي الاسىڭ. اركەز ۋاقىتپەن ساناسپاي, وتباسىڭدى دا, بالالارىڭدى دا ەكىنشى ورىنعا ىسىرىپ قوياتىن ساتتەر بولادى. مىنە, وسىنداي قيىندىق پەن سىنعا توزە بىلسەڭ عانا ەڭبەگىڭ جانادى» دەگەن سوزدەرى جادىمدا جاتتالىپ قالىپتى, – دەيدى ول.
الماگۇل وتاعاسى باعدات ەكەۋى ءۇش ۇل, ەكى قىز ءتاربيەلەپ وتىرعان ىنتىماعى جاراسقان وتباسى. ۇلكەن قىزى فاتيما – قالاداعى ورتا مەكتەپتە قازاق ءتىلى جانە ادەبيەتى ءپانىنىڭ مۇعالىمى. ال ارسەن مەن ءانۋار مەكتەپ وقۋشىسى بولسا, ارنۇر مەن الينا بالاباقشاعا بارادى. الماگۇل بىزگە بوس ۋاقىتتارىندا وتباسى بىرىگىپ, سپورتپەن اينالىساتىنىن, ولار ءوزى ەڭبەك ەتەتىن ۇجىمنىڭ سپورتتىق ومىرىنە دە بەلسەنە ارالاساتىنىن ماقتانىشپەن ايتتى.
– ماعان قازىر پوليتەحنيكالىق جانە قاجىمۇقان اتىنداعى سپورت كوللەدجىندە جاسوسپىرىمدەرمەن جۇمىس ىستەۋ تاپسىرىلعان. ءار ءىستىڭ وزىنە ءتان قيىندىعى بولاتىنى ءسوزسىز. الايدا جۇمىسىڭدى جاقسى كورسەڭ, جۇبايىڭ مەن بالالارىڭ سەنى قولداپ تۇرسا, بۇل قيىندىقتاردى وپ-وڭاي جەڭۋگە بولادى ەكەن. ونىڭ ۇستىنە باسشىلىق كوپبالالى انا رەتىندە جان-جاقتى كومەك كورسەتىپ تۇرادى, – دەيدى جەرگىلىكتى پوليتسيا قىزمەتى سارىارقا اۋدانى يۋۆەنالدى پوليتسيا ءبولىمىنىڭ ينسپەكتورى, كاپيتان الماگۇل الماعانبەتوۆا.
