استانا سەكىلدى الىپ شاھار تىرشىلىگىنە قاتىستى بارلىق قۇجاتتار قالالىق ءماسليحات ارقىلى وتەدى. ەلوردا اكىمدىگىنىڭ ەكونوميكالىق جانە الەۋمەتتىك باعدارلامالارى, قالا بيۋدجەتى ءماسليحاتتا تالقىلانىپ بارىپ قابىلدانادى. مۇنىڭ سىرتىندا ماسليحاتقا استانا تۇرعىندارىنان سان ءتۇرلى وتىنىشتەر مەن ارىز-شاعىمدار ءتۇسىپ جاتادى. ءبىر سوزبەن ايتقاندا, ءماسليحات قالانىڭ ماڭىزدى ماسەلەلەرىن شەشۋدە جەتەكشى رولدەردىڭ ءبىرىن اتقارادى. وسى ىستە ماسليحاتقا سايلانعان ايەل دەپۋتاتتار ەر ازاماتتاردان قالىسپايدى. ءماسليحات سەسسيالارىنا, تۇراقتى كوميسسيالاردىڭ وتىرىستارىنا, قوعامدىق تىڭداۋلارعا قاتىسىپ ءجۇرىپ, وعان ۇنەمى كۋا بولىپ جاتامىز.
وسىدان تۋرا ءۇش جىل بۇرىن ەلىمىزدە ءتۇرلى دەڭگەيدەگى ءماسليحاتتاردىڭ سايلاۋى ءوتتى. التىنشى شاقىرىلىمداعى استانا قالاسى ءماسليحاتىنا جيىرما بەس دەپۋتات سايلانسا, سونىڭ التاۋى ايەلدەر بولدى. ياعني, ءماسليحاتتىڭ 25 پايىزعا جۋىعى نازىك جاندى ارۋلاردان تۇرادى. ولاردىڭ اراسىندا مۇعالىمدەر, دارىگەرلەرمەن قاتار كاسىپكەر ايەلدەر دە بار. ارقايسىنىڭ ارتىندا مىڭداعان سايلاۋشى تۇر. ايەل دەپۋتاتتار ەر ارىپتەستەرىمەن قاتار استانانىڭ وركەندەۋىنە ءوز ۇلەستەرىن قوسىپ, حالىقتىڭ مۇددەسىن قورعاپ كەلە جاتىر. ايەلدەردىڭ حالىقارالىق كۇنى قارساڭىندا ەشقايسىسىن بولە-جارماي, سولار تۋرالى از-كەم ءسوز ساباقتاعاندى ءجون كوردىك.
№84 مەكتەپ-ليتسەيىنىڭ ديرەكتورى زاۋرە ءجۇسىپوۆا شيرەك عاسىردان بەرى استانادا ەڭبەك ەتىپ جاتىر. سونىڭ ىشىندە بەسىنشى شاقىرىلىمداعى قالالىق ءماسليحاتتىڭ دەپۋتاتى بولدى. كەلەسى سايلاۋدا دا حالىق وعان سەنىم ءبىلدىرىپ, قايتا سايلادى. زاۋرە عيناياتقىزى – ءماسليحاتتىڭ زاڭدىلىق, قۇقىقتىق ءتارتىپ جانە قوعاممەن جۇمىس جونىندەگى تۇراقتى كوميسسياسىنىڭ مۇشەسى.
ءبىزدى ول, اسىرەسە, ۇلتجاندىلىعىمەن تارتادى. بىردە دەپۋتاتتاردىڭ رەيدى كەزىندە الاش تاسجولى اتاۋى قالانىڭ شەتىنە كەتىپ قالعانىنا شامدانعانى بار. سوندا ىشتەي ريزا بولعانبىز. ارينە, مۇعالىم بولعان سوڭ ۇرپاق تاربيەسى, مەكتەپتەر ماسەلەلەرىن دە ۇنەمى كوتەرىپ جاتادى. قالادا ورتا ءبىلىم بەرۋ ورىندارىنىڭ جەتىسپەي جاتقانى, مەكتەپتەرگە جول سەكىلدى ينفراقۇرىلىمدى تارتۋ جۇمىستارى ءتيىستى دەڭگەيدە ەمەستىگى جاسىرىن ەمەس. بۇل ماسەلەلەر تالقىلانعاندا اششى داۋىسىنىڭ شىققانىن دا ەستىدىك.
بۇل تۇرعىدا ماسليحاتتاعى قىزمەت بويىنشا دا, العان ماماندىعى بويىنشا دا ارىپتەسى رامزيا ومىرباەۆامەن ۇندەسەدى. №17 مەكتەپ-گيمنازيانىڭ ديرەكتورى رامزيا فااتقىزى دا دەپۋتاتتىق قىزمەتتە ءبىراز تاجىريبە جيناعان ادام. وسىعان دەيىن ەكىنشى شاقىرىلىمداعى قالالىق ءماسليحاتتىڭ دەپۋتاتى بولدى. ءماسليحاتتا سويلەگەن سوزىنەن ونى قالانىڭ الەۋمەتتىك-مادەني دامۋ ماسەلەلەرى تولعاندىراتىنى بايقالادى. جاقىندا «استانا – ادالدىق الاڭى» جوباسى اياسىندا مەكتەپتەردەگى وقۋ سىنىپتارىن كەڭەيتۋدى قولداعان العاشقى باسشىلاردىڭ ءبىرى بولىپ, ءوز كابينەتىن بوساتىپ بەردى.
گۇلنار دانباەۆا – استانا قالاسىنىڭ تۋماسى. قالالىق ءماسليحات دەپۋتاتى قىزمەتىن ول ءتورتىنشى شاقىرىلىمنان بەرى اتقارىپ وتىر. ءبىراز جىلدان بەرى جەكە كاسىپكەرلىكپەن اينالىساتىن گۇلنار امانجولقىزى – تۋعان جەرىنىڭ پاتريوتى. قازىر ءوزى باسقاراتىن كورپوراتيۆتىك قور دا «استانا» اتاۋىن العان.
№5 قالالىق اۋرۋحانانىڭ باس دارىگەرى التىنشاش تابۋلدينا مەديتسينا سالاسىنداعى وزەكتى ماسەلەلەردى كوتەرەدى. سونىڭ ىشىندە دارىگەرلەردى دايارلاۋدىڭ ساپاسىنا قاتىستى دالەلدەرمەن سويلەگەنىن ەستىگەن ەدىك. مەديتسينا قىزمەتكەرلەرىنىڭ جالاقىسى كوڭىل كونشىتپەيتىنى دە وتىرىك ەمەس. استاناعا سىرتتان ەمدەلۋشىلەر كوپ كەلەتىنى دە بەلگىلى بولىپ وتىر. التىنشاش جۇماشقىزىنىڭ پىكىرىنشە, بۇل ماسەلەدە استانانىڭ قوعامدىق دەنساۋلىق ساقتاۋ باسقارماسى ەلوردامەن شەكارالاس جاتقان وبلىستارمەن بايلانىس ورناتۋ كەرەك. سوندا جۇمىس تا دۇرىس جۇرەدى. مۇنى ءجون ءسوز ەمەس دەپ ايتا المايمىز.
قالالىق ءماسليحاتتىڭ ەڭ بەلسەندى دەپۋتاتتاردىڭ ءبىرى – قاراقات ابدەن. ءار سەسسيادا, ءار وتىرىستا ونىڭ سويلەمەگەن كەزى جوق. ءبىلىم, دەنساۋلىق ساقتاۋ ماسەلەلەرىنەن باستاپ, ءارتۇرلى ماسەلەلەردى كوتەرەدى. ۇرپاق تاربيەسى تۋرالى كوپ تولعانادى.
«قازاق قىزى» قوعامدىق بىرلەستىگىنە جەتەكشىلىك ەتەتىنى تەگىن ەمەس. ءوزى كوتەرگەن ماسەلەلەردىڭ شەشىلۋىن دە ۇنەمى قاداعالاپ وتىرادى. ماسەلەن, پريگورودنىي تۇرعىن الابىنداعى №24 ورتا مەكتەپكە وقۋشىلاردى اۆتوبۋسپەن اپارۋ ماسەلەسىن بىرنەشە مارتە قوزعادى. اقىرى بۇل ماسەلە ساتىمەن شەشىلىپ, دەپۋتات اتا-انالار مەن مەكتەپ باسشىلىعىنان العىس الدى.
يرينا مانجانوۆا – قۇرىلىس, كوممۋنالدىق-شارۋاشىلىق سالالارىنىڭ جىلىگىن شاعىپ, مايىن ىشكەن دەپۋتات. ءتيىستى ساراپتامالاردى جاساپ, نىساندار قۇرىلىسىنداعى ولقىلىقتاردى اتاپ كورسەتكەنىن تالاي كورگەنبىز. العان ماماندىعى مۇعالىم بولا وتىرىپ, بيزنەسكە يكەمدەلگەننىڭ ۇلگىسىن وسى دەپۋتاتتان كوردىك.
تۇيىندەپ ايتقاندا, قالالىق ءماسليحاتتا ءار الۋان ماسەلەنى كوتەرە بىلەتىن وسىنداي ايەل دەپۋتاتتار بار. ءبىز ولاردىڭ انا, جار رەتىندەگى تۇلعالارىنا توقتالماي, تەك قىزمەتتەرىندەگى ءوزىمىز بايقاعان ەرەكشەلىكتەرىن جازدىق. مەرەكەلەرىڭىز قۇتتى بولسىن! ەلدىڭ, استانامىزدىڭ وركەندەۋىنە قىزمەت ەتە بەرىڭىزدەر, دەپۋتات ارۋلار!
