استانا قالاسى اكىمدىگىنىڭ ۇيىمداستىرۋىمەن كەڭ اۋقىمدا وتكىزىلىپ جاتقان «مەيىرىمدى قالا» قايىرىمدىلىق اكتسياسى ءالى دە جالعاسىپ جاتىر.
كەشە ەل تاۋەلسىزدىگىنىڭ 25 جىلدىعىنا وراي ۇيىمداستىرىلىپ جاتقان بۇل شاراعا تەك قانا وتاندىق ونىمدەر ساتىلاتىن «ۋنيۆەرماG.kz» ساۋدا ورتالىعى ءۇن قوسىپ كاسىپتىك-تەحنيكالىق كوللەدجىنىڭ ءبىراز ستۋدەنتىنە قازاقستاندىق وندىرۋشىلەردىڭ قولىنان شىققان كيىم-كەشەكتەر جيىنتىعى تابىس ەتىلدى.
«قايىرىمدىلىق شاراسى اياسىندا استاناداعى كاسىپتىك-تەحنيكالىق كوللەدجىندە ءبىلىم الاتىن 20 ستۋدەنتكە كيىم-كەشەكتەر جيىنتىعى مەن كىتاپتار بەرىپ وتىرمىز. بۇلاردىڭ اراسىندا تۇرمىسى تومەن وتباسىلاردان شىققان جانە اتا-اناسىنان ايىرىلعان ستۋدەنتتەر, سونىمەن قاتار وبلىستىق, رەسپۋبليكالىق دەڭگەيدەگى جارىستاردا جەڭىمپاز اتانىپ جۇرگەن ۇلگىلى جاستار بار. كومەك كورسەتۋ تۋرالى باستامامىزعا ەلىمىزدىڭ بارلىق كاسىپكەرلەرى قولداۋ ءبىلدىردى. سونداي-اق, بۇل شارا «ۋنيۆەرماG.kz» ساۋدا ورتالىعىنىڭ ءبىر جىلدىعىنا سايكەس كەلىپ وتىر» دەيدى جەڭىل ونەركاسىپ ونىمدەرىن وندىرۋشىلەر وداعىنىڭ پرەزيدەنتى ساۋلە شاۋەنوۆا.
شاراعا استانا قالاسى اكىمىنىڭ ورىنباسارى ماليكا بەكتۇروۆا, ەلوردانىڭ كاسىپكەرلىك جانە ونەركاسىپ باسقارماسى جانە «اتامەكەن» ۇكپ وكىلدەرى قاتىستى. جالپى استانا قالاسىندا كاسىپكەرلىككە عانا ەمەس الەۋمەتتىك ماسەلەلەرگە, از قامتىلعان وتباسىلارعا قاتتى كوڭىل ءبولىنىپ كەلەدى. وعان وسى «مەيىرىمدى قالا» قايىرىمدىلىق اكتسياسى كۋا بولسا كەرەك.
بۇركىت نۇراسىل
