مەكتەپ مەديتسيناسى ەرەكشە نازاردا
مەكتەپتەگى مەديتسينانى ءبىلىم بەرۋ سالاسىنان دەنساۋلىق ساقتاۋ جۇيەسىنە بەرۋ تۋرالى باستامانى استانا قالاسى ءبىرىنشى بولىپ قولدادى. ەلوردا اكىمى ادىلبەك جاقسىبەكوۆتىڭ تاپسىرماسىمەن كۇللى مەكتەپتەگى مەديتسينالىق كابينەتتەردى دەنساۋلىق ساقتاۋ باسقارماسىنا بەرۋ تۋرالى جول كارتاسىنا قول قويىلدى.
مەكتەپ مەديتسيناسى – ۇلكەن سالا. سوڭعى جىلدارى وقۋشىلاردىڭ اراسىندا ءارتۇرلى اۋرۋلار كوبەيىپ كەتكەن. مىسالى, پروفيلاكتيكالىق تەكسەرۋلەردىڭ ناتيجەسى بويىنشا سوڭعى ءۇش جىلدا جەتكىنشەكتەردىڭ اراسىندا تىنىس الۋ ورگاندارىنىڭ اۋرۋلارى ءبىرىنشى ورىنعا شىققان. ەكىنشى ورىندا اس قورىتۋ جۇيەلەرىنىڭ سىرقاتى بولسا, ءۇشىنشى ورىندا – كوز اۋرۋلارى. سوندىقتان مەكتەپتەگى مەديتسينانى كاسىبي مامانداردىڭ قولىنا تاپسىرىپ, ەرەكشە كوڭىل اۋدارۋ قاجەت.
استانا قالالىق دەنساۋلىق ساقتاۋ باسقارماسىنىڭ باسشىسى ەرىك بايجۇنىسوۆتىڭ ايتۋىنشا, بۇل مەكتەپتەگى مەديتسينانىڭ ساپاسىن ارتتىرىپ قانا قويماي, وندا جۇمىس ءىستەيتىن مەدبيكەلەردىڭ جۇكتەمەسىن دە ازايتپاق. ايتالىق, نەگىزگى نورماتيۆ بويىنشا مەكتەپتە جۇمىس ىستەيتىن ءبىر مەدبيكەنىڭ قاراۋىندا 600 بالا بولۋعا ءتيىس. قازىرگى جاعداي بويىنشا ءبىر مەديتسينا قىزمەتكەرى 3 مىڭنان استام وقۋشىنى قاراۋعا ءماجبۇر. ال ءبىلىم باسقارماسىنىڭ باسشىسى ەلميرا سۋحانبەرديەۆانىڭ ايتۋىنشا, مەكتەپ مەديتسيناسى دەنساۋلىق ساقتاۋ باسقارماسىنىڭ قاراۋىنا وتسە دە باسقارما بۇل ماسەلەگە جاۋاپتى بولىپ قالا بەرمەك. «سوڭعى جىلدارى مەكتەپتەگى مەديتسينالىق كابينەتتەرگە ءتيىستى ليتسەنزيالاردان بولەك, قاجەتتى قۇرال-جابدىقتار, ءدارى-دارمەكتەر الىندى. بۇل وزگەرىستەر ەڭ الدىمەن ەلىمىزدىڭ بولاشاعى – بالالاردىڭ دەنساۋلىعىن جاقسارتۋعا باعىتتالعان» دەيدى ول.
مەكتەپ مەديتسيناسىن دەنساۋلىق ساقتاۋ باسقارماسىنىڭ قاراۋىنا بەرۋ كەزەڭ-كەزەڭمەن جۇزەگە اسىرىلاتىن بولادى. وسىعان سايكەس, مۇندا جۇمىس ءىستەيتىن مەديتسينا قىزمەتكەرىنىڭ قىزمەتتىك مىندەتتەرى مەن ءرولى قايتا قارالىپ, شتاتتىق نورماتيۆتەرىن ەسەپتەۋ جۇرگىزىلەدى.
قىمبات توقتامۇرات
ماتەريالدى «استانا اقشامى» گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.