نۇر-سۇلتان قالاسىنىڭ تىلدەردى دامىتۋ جانە ارحيۆ ءىسى باسقارماسىنا قاراستى «رۋحانيات» كوممۋنالدىق مەملەكەتتىك مەكەمەسى №48 مەكتەپ-ليتسەيىندە «الاش القاسى» عىلىمي-تانىمدىق ينتەللەكتۋالدى جاستار كلۋبىنىڭ كەزەكتى جيىنىن وتكىزدى. جيىننىڭ بۇل جەردە ءوتۋى دە تەگىن ەمەس. وقۋ ورداسىنا الاش قايراتكەرىنىڭ ەسىمىن بەرۋ تالايدان قوزعالىپ كەلەدى. ۇلت ۇستازىنىڭ شاعىن مۇراجايى دا وسى مەكتەپتە ورىن تەپكەن.
«مەكتەبىمىزدە احمەتتانۋعا ۇمتىلىپ جۇرگەن وقۋشىلار كوپ. ولار جىل سايىن رەسپۋبليكالىق دەڭگەيدەگى جارىستان ورىندار الىپ ءجۇر. ەندىگى ارمانىمىز مەكتەبىمىزگە ۇلت ۇستازىنىڭ ەسىمى بەرىلسە دەيمىز. بۇل ارقىلى بالالاردىڭ بويىنا ەلجاندىلىق پەن ۇلتتىق رۋحتى سىڭىرگىمىز كەلەدى» دەيدى №48 مەكتەپ-ليتسەي ديرەكتورىنىڭ ورىنباسارى الماس مومىسقىزى.
كەزدەسۋدە ەربول تىلەشوۆ, بەكجان ءابدۋالى, ساعىمباي جۇماعۇل, ۇلان ەركىنباي سىندى الاشتانۋشى عالىمدار مەن اقىننىڭ اتالاس ۇرپاعى ازامات نۇرلانۇلى وقۋشىلاردىڭ كوكەيتەستى سۇراقتارىنا جاۋاپ بەرىپ, عىلىمي زەرتتەۋلەرىمەن ءبولىستى. ءوز كەزەگىندە وقۋشىلار اقىن شىعارمالارىن جاتقا وقىپ, احمەت بايتۇرسىنۇلىنىڭ قاناتتى سوزدەرى توپتاستىرىلعان ەستەلىك سىيلىقتى مەكتەپ مۇراجايىنا تارتۋ ەتتى. ال جاس زەرتتەۋشى بازارباي سىمبات قايراتكەر شىعارماشىلىعىن زەرتتەۋدى قولعا الىپ, الداعى جۇمىستارى ءۇشىن اعا بۋىندارىنان اقىل سۇراي كەلىپتى. بالعىننىڭ جاس تالابىنا ريزا بولعان ەل اعالارى عىلىم جولىنا ەندى كەلگەن سىمباتتىڭ قادامىنا قۇت تىلەپ, باتالارىن بەردى.
«وسىمەن ءۇشىنشى رەت وتكىزىلىپ وتىرعان ءىس-شارامىزدىڭ نەگىزگى ماقساتى – ۇلت مۇراتى, مەملەكەتتىلىكتى قالىپتاستىرۋ جولىندا ەرەن ەڭبەك ەتىپ, قازاق رۋحانياتىنىڭ ادەبيەتى مەن مادەنيەتىنىڭ دامۋىنا ۇلەس قوسقان الاش قايراتكەرلەرىنىڭ تاعىلىمدى جولىن وسكەلەڭ ۇرپاققا ۇلگى-ونەگە رەتىندە جەتكىزۋ, دارىپتەۋ. جوبا «جاستار جىلى» اياسىندا جۇرگىزىلەدى. سونىمەن قاتار «رۋحاني جاڭعىرۋ» ارقىلى ەل مۇراتى حاقىندا, تۇتاستىق پەن بىرلىك ارقىلى ۇلتتىق رۋحتى جاڭعىرتۋعا ۇلەس قوسۋ. بۇعان دەيىنگى وتكەن كەزدەسۋلەرىمىزدى ءاليحان بوكەيحانۇلىنا, اباي قۇنانبايۇلىنا ارنادىق. سونىڭ ناتيجەسىندە ءاليحان اتىنداعى مۇراجاي اشىلدى, اباي اتامىزدىڭ مەرەيتويى قارساڭىندا مەكتەپكە اتى بەرىلدى. بۇل ءبىز باعىندىرعان بەلەستىڭ باسى عانا. الداعى ۋاقىتتا دا وسىنداي جيىندارىمىزدى كوبەيتپەكپىز» دەيدى «رۋحانيات» مەكەمەسىنىڭ ديرەكتورى ەرجان ەڭسەباي.
فارحات قانالى
