ەلوردا اكىمى التاي كولگىنوۆ «Nur Otan» پارتياسىنىڭ قوعامدىق قابىلداۋىندا ازاماتتاردى جەكە قابىلدادى.
وسى جىلدىڭ تامىز ايىندا وتكەن Nur Otan پارتياسى ساياسي كەڭەسىنىڭ كەڭەيتىلگەن وتىرىسىندا ەلباسى حالىقپەن ءوزارا ءىس-قيمىلدى كۇشەيتۋدى, اتاپ ايتقاندا, پارتيانىڭ قوعامدىق قابىلداۋ بولمەلەرىنىڭ جۇمىسىن جانداندىرۋدى تاپسىردى. مەملەكەت باسشىسى قاسىم-جومارت توقاەۆ «قوعاممەن بايلانىستى نىعايتىپ, حالىققا ەسەپ بەرىڭدەر» دەپ تاپسىرما بەردى. وسى رەتتە ەلوردا اكىمى قالا تۇرعىندارىنىڭ وتىنىشتەرىن, مۇڭ-مۇقتاجىن تىڭداپ, ءوز تاراپىنان تيىسىنشە جاۋاپتارىن بەردى. تۇرعىندار, نەگىزىنەن, مەديتسينالىق كومەك الۋ, تۇرعىن ءۇي باعدارلامالارىنا قاتىسۋ, قىسقى كەزەڭدە كومىرمەن قامتاماسىز ەتۋ, جۇمىسقا ورنالاسۋ جانە باسقا دا ماسەلەلەر بويىنشا وتىنىشتەرىن ءبىلدىردى.
جالپى قالا باسشىسى وتكەن ءۇش اي ىشىندە 450-دەن اسا ادامدى جەكە قابىلدادى. سونداي-اق ازاماتتاردى قابىلداۋ اۋداندىق اكىمدىكتەردە جانە «جانۇيا» وتباسى ينستيتۋتىن قولداۋ ورتالىعىندا دا وتۋدە. ءار ءوتىنىش بويىنشا دەربەس جۇمىس جۇرگىزىلۋدە. ماسەلەن, ءوتىنىش بىلدىرگەندەردىڭ ءبىر بولىگى ماماندىق الۋعا وقىتۋدان وتسە, بالاباقشالارعا جولداما الۋ, مەديتسينالىق كومەك كورسەتۋ, تۇرعىن ءۇي الۋعا كەزەككە تۇرۋ جانە باسقا دا ماسەلەلەر شەشىمىن تاپتى.
