سىيلىققا, جوندەۋ جۇمىستارىنا, ينتەراكتيۆتى تاقتاعا, سىنىپ قورىنا دەپ سۇرالاتىن مەكتەپتەگى اقشا جيناۋ ماسەلەسى تالاي اتا-انانىڭ جۇيكەسىن جۇقارتىپ كەلەدى. «مەكتەپتەگى جەمقورلىق قايدان شىعادى؟» دەگەن ساۋالعا جاۋاپ ىزدەگەن «استانا – ادالدىق الاڭى» جوباسىنىڭ ماماندارى ارنايى زەرتتەۋ جۇرگىزىپ, ناتيجەسىن جاريالادى.
اتا-انالار كوميتەتىن تاراتۋ كەرەك
ەلوردادا قولعا الىنعان جەمقورلىققا قارسى ستراتەگيالار باسقا ايماقتارعا ءۇلگى بولاتىنى انىق. «استانا – ادالدىق الاڭى» جوباسىنىڭ كوزدەگەن ماقساتى دا سول – تۇرمىستىق جەمقورلىقتى جويىپ, ازاماتتارعا بارىنشا قولايلى جاعدايلار جاساۋ. وسى رەتتە ءبىلىم بەرۋ جۇيەسىندەگى جەمقورلىقتى انىقتاۋ ماقساتىندا قالالىق ءبىلىم باسقارماسىنىڭ جانە وعان باعىناتىن ۇيىمداردىڭ سوڭعى ءتورت ايداعى قىزمەتىنە تالداۋ جۇرگىزىلدى. «تالداۋ جۇرگىزۋگە سىبايلاس جەمقورلىق امالدارىنىڭ, «جاسىرىن» مەملەكەتتىك قىزمەتتەردىڭ, نورماتيۆتىك قۇقىقتىق اكتىلەردەگى جانە اكىمشىلىك كەدەرگىلەردەگى قايشىلىقتاردىڭ بولۋى سەبەپ بولدى» دەيدى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ استانا قالاسى بويىنشا دەپارتامەنت باسشىسى جازيرا جىلقىشيەۆا.
جوبا اياسىندا قوعامدىق ۇيىمدارمەن بىرلەسىپ وقۋشىلاردىڭ اتا-انالارى اراسىندا الەۋمەتتىك ساۋالناما ءجۇرگىزىلگەن. ناتيجەسىندە ءبىلىم بەرۋ مەكەمەلەرىندە مەكتەپتىڭ نەمەسە سىنىپتىڭ قوسىمشا قاجەتتىلىكتەرى ءۇشىن ءجيى اقشا جينالاتىندىعى انىقتالعان. نەگىزىنەن, اقشا جيناۋ اتا-
انالار كوميتەتى ارقىلى جۇزەگە اسىرىلادى. ءبىر سوزبەن ايتقاندا, قىزمەتى رەگلامەنتتەلمەگەن اتا-انالار كوميتەتى تۇرمىستىق جەمقورلىقتىڭ تۋىنداۋىنا باستى سەبەپ بولىپ وتىر. سول ءۇشىن جوبا كەڭسەسى ءبىلىم جانە عىلىم مينيسترلىگىنە اتا-انالار كوميتەتىنىڭ قىزمەتىنە تىيىم سالۋ جونىندە ۇسىنىس ەنگىزىپ وتىر. ۇسىنىستىڭ قانشالىقتى قولداۋ تاباتىنى الداعى ۋاقىتتا بەلگىلى بولماق.
ديرەكتورلار جاۋاپقا تارتىلدى
جالپى ءبىلىم بەرۋ مەكەمەلەرىندەگى كەز كەلگەن ءتارتىپ نورماتيۆتىك قۇقىقتىق اكتىلەرمەن رەتتەلەتىنى بەلگىلى. قابىلداۋ, اۋىسۋ, گرانتتار ءبولۋ, جاتاقحاناداعى ورىنداردى انىقتاۋ جانە تاعى باسقا پروتسەستەر ءتيىستى نورماتيۆتىك قۇقىقتىق اكتىلەردە انىق كورسەتىلگەن.
«تسيفرلاندىرۋ اكىمشىلىك كەدەرگىلەردى جويۋعا ىقپال ەتەدى. دەگەنمەن بۇگىنگى تاڭدا بىزدە بارلىق راسىمدەر تسيفرلانباعان. ناتيجەسىندە لاۋازىمدى تۇلعالار ءوز وكىلەتتىلىكتەرىن اسىرا پايدالانىپ جاتادى. شامادان تىس قۇجاتتار مەن رەگلامەنتتەلمەگەن اقپارات تالاپ ەتىلەدى. وقۋ جىلىنىڭ قارساڭىندا ءبىز حالىققا قىزمەت كورسەتۋ ورتالىعى ۇسىناتىن قىزمەتتەرگە تالداۋ جۇرگىزدىك. مەكتەپتەردىڭ قاجەتسىز قۇجاتتاردى تالاپ ەتۋى سالدارىنان اتالمىش ورتالىقتا كەزەكتە تۇرعان اتا-انالاردىڭ سانى جەتىپ ارتىلدى. بۇل جونىندە ءتيىستى اقپارات ءبىلىم باسقارماسىنا جىبەرىلدى. 5 مەكتەپ ديرەكتورىنا قاتىستى تارتىپتىك شارالار قابىلدانىپ, 10 ديرەكتورعا قاتاڭ ەسكەرتۋ جاسالدى» دەيدى جازيرا جىلقىشيەۆا. ونىڭ ايتۋىنشا, جاتاقحانالارعا زاڭسىز ورنالاستىرۋ, قارجىلىق كومەك كورسەتۋ, بالاباقشالاردا اقىلى ورىن اۋىستىرۋ تۋرالى دەرەكتەر دە انىقتالعان. وسىلايشا ءبىلىم بەرۋ مەكەمەلەرىندە كەيبىر زاڭدىلىقتار ساقتالماي وتىرعانى قىنجىلتادى.
بيۋدجەت قاراجاتى اشىق بولا ما؟
«بارلىق ءبىلىم بەرۋ مەكەمەلەرى جاڭا وقۋ جىلىنا ساقاداي ساي, قارجى ءبولىندى. ەشقانداي مەكتەپتە اقشا جينالماسىن!». بۇل – جاڭا وقۋ جىلى باستالار تۇستا ءبىلىم جانە عىلىم مينيسترلىگى تاراتاتىن جاتتاندى اقپارات. دەگەنمەن ارتىنشا كىتاپ, داپتەرگە دەيىن ساتىپ الۋعا ءماجبۇر بولعان شاراسىز اتا-انالاردى كورەمىز. ەگەر مەملەكەت ءبىلىم بەرۋ مەكەمەلەرى ءۇشىن جەتكىلىكتى قارجىلاندىرۋدى قامتاماسىز ەتسە, اتا-انالاردان قوسىمشا قارجى جيناۋىنا نە سەبەپ؟ بيۋدجەتتەن بولىنەتىن قارجىنىڭ جۇمسالۋىن كىم باقىلايدى؟
جازيرا جىلقىشيەۆانىڭ ايتۋىنشا, قاراجات بارلىق قاجەتتىلىكتەرگە بولىنەدى. «اقپاراتقا قول جەتكىزۋ تۋرالى» زاڭدا ءبىلىم بەرۋ مەكەمەلەرىنىڭ بيۋدجەت قاراجاتىن ينتەرنەت-رەسۋرستاردا جانە باسقا دا قولجەتىمدى سايتتاردا جاريالاۋ قاجەتتىلىگى جونىندە مىندەتتەمەلەرى بار. ءار ادام قارجىنىڭ قايدا جۇمسالاتىنى تۋرالى ءبىلۋى قاجەت. دەگەنمەن ءبىزدىڭ ەلدە اتالمىش تالاپتاردىڭ ورىندالۋى ساقتالماي وتىر. سوندىقتان «استانا – ادالدىق كەڭسەسى» ءبىلىم بەرۋ مەكەمەلەرىنىڭ ينتەرنەت-رەسۋرستارىن سايكەستەندىرۋ بويىنشا بىرقاتار ۇسىنىستار بەرۋگە دايىن.
P.S: تامىز ايىنىڭ سوڭىندا ءبىلىم باسقارماسىنىڭ ۆەدومستۆولىق باعىنىستى ۇيىمدارىنىڭ باسشىلارى جەكە جاۋاپكەرشىلىك پيلوتتىق قۇجاتىنا قول قويدى. ەندى اقشا جيناۋ, زاڭدى بۇزۋ, قىزمەتتىڭ اشىقتىعىن ساقتاماۋ دەرەكتەرى انىقتالعان جاعدايدا, ديرەكتورلارعا قاتىستى ءتيىستى شارالار قابىلداناتىن بولدى. ال وقۋشىلار مەن اتا-انالاردىڭ قۇقىقتارى بۇزىلعان جاعدايدا 55-68-73, 55-68-83, 8 775 160 32 سەنىم تەلەفوندارىنا حابارلاسقان ءجون.
