ەسكەرتكىش تاقتا ورناتىلدى
اسا كورنەكتى ادەبيەتتانۋشى عالىم, قر ۇعا اكادەميگى, قر مەملەكەتتىك سىيلىعىنىڭ يەگەرى رىمعالي نۇرعاليدىڭ ءومىرىنىڭ سوڭعى ون جىلى استانادا ءوتتى. كەيىنگى جىلدارى باس قالاداعى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قازاق ادەبيەتى كافەدراسىنىڭ مەڭگەرۋشىسى قىزمەتىن اتقاردى. استانا قالاسىنىڭ اكىمدىگى جانە اتالمىش ۋنيۆەرسيتەتتىڭ ۇيىمداستىرۋىمەن عالىم تۇرعان ۇيگە ورناتىلعان ەسكەرتكىش تاقتا سالتاناتتى جاعدايدا اشىلدى.
شاراعا قاتىسقان استانا قالاسى اكىمىنىڭ ورىنباسارى ەرمەك امانشاەۆ اكادەميك رىمعالي نۇرعاليدىڭ قازاق ادەبيەتىنىڭ دامۋىنا جانە شاكىرت تاربيەلەۋدە, ەلوردامىز استانانىڭ رۋحانياتىنا قوسقان ۇلەسى تۋرالى ايتىپ ءوتتى.
«مەن رىمعالي نۇرعاليدىڭ ءشاكىرتىمىن. ۇستازىمىزدىڭ ارقاسىندا ۋنيۆەرسيتەت قابىرعاسىندا ءجۇرىپ ماعجاننىڭ ولەڭدەرىمەن, مىرجاقىپ پەن احمەت بايتۇرسىنۇلىنىڭ ەڭبەكتەرىمەن تانىسا باستادىق. اعامىزدىڭ قازاق عىلىمىنا, وركەنيەتىنە قوسقان ۇلەسى وراسان زور. ەلورداعا العاشقى لەكپەن كوشىپ كەلگەن ونىڭ وسى قالانىڭ ءمادەنيەتىنە, رۋحانياتىنا قوسقان ۇلەسىن دە اتاپ كەتۋ مۇمكىن ەمەس» دەدى ەرمەك امانشاەۆ.
قالا باسشىسىنىڭ ورىنباسارى رىمعالي نۇرعاليدىڭ جەتەكشىلىگىممەن كانديداتتىق ديسسەرتاتسيا قورعاعانىن ايتىپ, عالىمنىڭ قازاق تەاترى مەن دراماتۋرگياسى تاريحىن تەرەڭ زەرتتەگەنىن, احمەت بايتۇرسىنۇلى, ماعجان جۇماباەۆ, جۇسىپبەك ايماۋىتوۆ, مۇحتار اۋەزوۆ, تاعى باسقا قازاق ادەبيەتى كلاسسيكتەرىنىڭ شىعارماشىلىعى تۋرالى ىرگەلى مونوگرافيالىق ەڭبەكتەر جازعانىن ەسكە سالدى.
سالتاناتتى شاراعا رىمعالي نۇرعاليمەن عىلىمعا قاتار كەلگەن زامانداستارى, دوستارى, شاكىرتتەرى, اتاپ ايتساق, اكادەميكتەر سەيىت قاسقاباسوۆ پەن بولات كومەكوۆ, تەلەدراماتۋرگ سۇلتان ورازالى, جازۋشى, پۋبليتسيست بولات بوداۋباي, اقىندار سەرىك تۇرعىنبەكۇلى, نەسىپبەك ايتۇلى, ت.ب. قاتىسىپ, عالىم تۋرالى ەستەلىكتەرىمەن ءبولىستى.