مەملەكەت باسشىسى سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆتى قابىلدادى. اليك شپەكباەۆ قاسىم-جومارت توقاەۆقا سىبايلاس جەمقورلىققا قارسى ءىس-قيمىل اگەنتتىگىنىڭ بيىلعى 7 ايدا اتقارعان جۇمىستارىنىڭ نەگىزگى قورىتىندىلارى تۋرالى ەسەپ بەردى.
اگەنتتىك توراعاسى ساياسي مەملەكەتتىك قىزمەتشىلەر مەن جاۋاپتى باسشىلاردى سىبايلاس جەمقورلىققا قارسى شارا قولدانباعانى ءۇشىن قىزمەتىنەن بوساتۋعا جانە نورماتيۆتىك-قۇقىقتىق اكتىلەردى جەمقورلىققا قارسى ساراپتامادان وتكىزۋدى قالپىنا كەلتىرۋگە قاتىستى مەملەكەت باسشىسىنىڭ بۇعان دەيىن بەرگەن تاپسىرمالارىنىڭ ورىندالۋى تۋرالى باياندادى.
پرەزيدەنت مەملەكەتتىك ورگانداردىڭ جۇمىسىنا قىزمەت كورسەتۋ مودەلىن ەنگىزۋدىڭ ماڭىزدىلىعىن اتاپ ءوتىپ, اگەنتتىكتىڭ ازاماتتىق قوعام وكىلدەرىمەن بىرگە سىبايلاس جەمقورلىقتىڭ الدىن الۋ جانە ادالدىق يدەولوگياسىن ىلگەرىلەتۋ جونىندەگى ءىس-قيمىلدارىنا وڭ باعا بەردى.
كەزدەسۋ سوڭىندا مەملەكەت باسشىسى 19 تامىز كۇنى سىبايلاس جەمقورلىققا قارسى ءىس-قيمىل جونىندەگى كەڭەستە جەمقورلىق قىلمىستار ءۇشىن جاۋاپكەرشىلىكتى قاتاڭداتىپ, قوعامدىق باقىلاۋدىڭ تيىمدىلىگىن ارتتىرۋعا قاتىستى بەرىلگەن تاپسىرمالاردى تەزىرەك زاڭ جۇزىندە ىسكە اسىرۋدىڭ قاجەت ەكەنىن ايتتى.
سونىمەن قاتار, مەملەكەت باسشىسى قاسىم-جومارت توقاەۆ «ۇلتتىق عىلىمي مەديتسينا ورتالىعى» اق باسقارما توراعاسى اباي بايگەنجيندى قابىلدادى. اباي بايگەنجين پرەزيدەنتكە ۇلتتىق عىلىمي مەديتسينا ورتالىعى اتقارعان جۇمىستاردىڭ قورىتىندىلارى تۋرالى باياندادى. كەزدەسۋ سوڭىندا مەملەكەت باسشىسى ورتالىقتىڭ حالىق دەنساۋلىعىن ساقتاۋدا ۇلكەن جۇمىس اتقارىپ جاتقانىن ايتىپ, الداعى قىزمەتتەرىنە تىلەكتەستىك ءبىلدىردى.
