مەملەكەتتىك ماراپاتتار تاپسىرىلدى
كەشە استانا قالاسىنىڭ اكىمى ادىلبەك جاقسىبەكوۆ جەڭىستىڭ 70 جىلدىعىنا وراي ەلوردالىق ءبىر توپ ۇلى وتان سوعىسى ارداگەرلەرى مەن تىل ەڭبەككەرلەرىن قازاقستان رەسپۋبليكاسىنىڭ مەملەكەتتىك ناگرادالارىن تاپسىردى.
جينالعان قاۋىمدى جەڭىستىڭ 70 جىلدىق مەرەيتويىمەن قۇتتىقتاعان قالا باسشىسى: – جەڭىس كۇنى – قاسيەتتى دە, قاستەرلى مەرەكە. وتان ءۇشىن وت كەشكەن قازاقستاندىق جاۋىنگەرلەر جەڭىس كۇنىن جاقىنداتۋعا از ۇلەس قوسقان جوق. سىزدەردىڭ ەرلىكتەرىڭىز, قاھارماندىق پەن وتانسۇيگىشتىك قاسيەتتەرىڭىز – كەيىنگى ۇرپاققا ۇلگى-ونەگە. سوعىستان كەيىن قۇلدىراعان ەكونوميكانى قالپىنا كەلتىرۋگە دە ارداگەرلەرىمىز قاجىرلىلىقپەن اتسالىستى. وسىناۋ مەيرام قارساڭىندا ەلباسىنىڭ جارلىعىمەن ەلىمىزدىڭ وركەندەۋىنە ەرەكشە ۇلەس قوسقان ازاماتتارعا جوعارى مەملەكەتتىك ماراپات تاپسىرىلاتىن ءداستۇر بار. بيىل دا ءبىر توپ استانالىق ارداگەر سونداي قۇرمەتكە يە بولىپ وتىر, – دەپ اتاپ ءوتتى.
بۇدان كەيىن ادىلبەك رىسكەلدىۇلى مەملەكەت الدىنداعى ەرەن ەڭبەگى, بەلسەندى قوعامدىق قىزمەتى ءۇشىن جانە ۇلى وتان سوعىسىنداعى جەڭىستىڭ 70 جىلدىعىنىڭ قۇرمەتىنە وراي سوعىس ارداگەرى شاعيلا قۇسانوۆاعا «پاراسات» وردەنىن, مايدانگەرلەر تەزەكپاي ابدىراحمانوۆقا, ۆلاديمير كالسينگە, «ارداگەرلەر ۇيىمى» رەسپۋبليكالىق قوعامدىق بىرلەستىگى استانا قالاسىنداعى بولىمشەسىنىڭ توراعاسى امانگەلدى سىزدىقوۆقا «قۇرمەت» وردەنىن تاپسىردى. قارت ساربازدار بايمۇحان ءابىلوۆ, باقتىباي المابەكوۆ, الەكساندر مورۋنوۆ, ءشارىپ راحىمجاروۆ, ەڭبەك ارداگەرى قالي مۇقاتاەۆ, «ارداگەرلەر ۇيىمى» رقب استانا قالاسىنداعى بولىمشەسى توراعاسىنىڭ ورىنباسارى ەسبولات دۇيسەنوۆ «ەرەن ەڭبەگى ءۇشىن» مەدالدارىمەن ماراپاتتالدى. ال سوعىس ارداگەرلەرى سيحىمباي مامىروۆ پەن جانياز شالبولوۆقا قازاقستان رەسپۋبليكاسىنىڭ قۇرمەت گراموتاسى تابىستالدى.
وسى كۇنى ماراپاتتالعانداردىڭ ءبىرى – ەسىل اۋدانى مۇگەدەكتەر قوعامىنىڭ توراعاسى باقىتجان ءسارسەنباەۆ. ول «قازاقستان حالقى اسسامبلەياسىنىڭ – 20 جىلدىعى» مەرەيتويلىق مەدالىمەن ماراپاتتالدى.
– سىزدەردىڭ وتان ءۇشىن جاساعان ەرلىكتەرىڭىز ەشقاشان ۇمىتىلمايدى. وزدەرىڭىز سىيلاعان بەيبىت ءومىردىڭ ارقاسىندا ەلىمىز ۇلكەن جەتىستىكتەرگە جەتىپ وتىر. اعا ۇرپاققا قاشان دا تاعزىم! مەرەكەلەرىڭىز قۇتتى, دەندەرىڭىز ساۋ, وتباستارىڭىز امان بولسىن, – دەپ ءسوزىن تۇيىندەدى ەلوردا اكىمى.
سالتاناتتى جيىنعا قاتىسۋشىلاردىڭ اتىنان ءسوز العان سوعىس ارداگەرى تەزەكپاي ءابدىراحمانوۆ وزدەرىنە دەگەن مەملەكەتتىڭ ءىلتيپاتىنا ريزا ەكەندىگىن جەتكىزىپ, العىسىن ءبىلدىردى.
قىمبات توقتامۇرات