مەيىرىمى مەن جان جىلۋى ارقىلى ناۋقاستىڭ كەسەلىنەن ايىعۋىنا ۇلكەن ىقپال ەتەتىن جانداردىڭ ءبىرى كىشى مەديتسينا قىزمەتكەرلەرى ەكەنى بەلگىلى. دەنساۋلىق ساقتاۋ سالاسىنداعى قىزمەتتىڭ باسىم بولىگىن جاۋاپكەرشىلىكپەن اتقاراتىن وسىنداي تاجىريبەلى ماماننىڭ ءبىرى – استانا قالاسىنداعى №11 ەمحانانىڭ مەيىرگەرى گۇلنار بەيسەنوۆا.
ول – تۇركىستان وبلىسىنىڭ تۋماسى. كەنتاۋ قالالىق مەديتسينا ۋچيليششەسىن ويداعىداي تامامداعاننان كەيىن وسىنداعى ورتالىق اۋرۋحانانىڭ اكۋشەرلىك بولىمىندە 10 جىلدان استام ۋاقىت ەڭبەك ەتىپ, تاجىريبە جيناقتادى. وڭتۇستىك قازاقستاندا تۋىپ-وسسە دە, كوپشىلىككە ارمان بولعان ارۋ قالا – استاناعا اڭسارى اۋىپ, بولاشاعىن ەلىمىزدىڭ باس شاھارىمەن بايلانىستىرۋ ماقساتىندا 2000 جىلى وسىندا قونىس اۋداردى. اقىرى ەلوردادا ومىرلىك سەرىگىن جولىقتىرىپ, تۇرمىس قۇرىپ, بالالى-شاعالى بولادى. مىنە, سودان بەرى شيرەك عاسىرعا جۋىق ۋاقىت استانانىڭ مەديتسينا سالاسىن دامىتۋعا اتسالىسىپ كەلەدى.
مۇندا دا قاراپ وتىرمادى, ماماندىعى بويىنشا جۇمىسقا ورنالاسىپ, الدىمەن ونكولوگيا ورتالىعىندا, كەيىن كوپبەيىندى №2 وبلىستىق اۋرۋحانادا مەيىرگەر, باس مەدبيكە قىزمەتىن اتقاردى. بۇگىندە №11 قالالىق ەمحانادا ەڭبەك ەتىپ, ەڭبەكقورلىعى مەن ماماندىعىنا دەگەن قالتقىسىز قۇرمەتىنىڭ, تاباندىلىعى مەن تىندىرىمدىلىعىنىڭ ارقاسىندا وزىنە بەرىلگەن ايماق تۇرعىندارىنىڭ ءىلتيپاتىنا بولەنىپ ءجۇر. وسى جولدا ايانباي تەر توگىپ, ءوزىنىڭ سانالى عۇمىرىن ادامدارعا كومەك قولىن سوزۋدان شارشامايتىن مەيىربيكە قىزمەتىنە ارناعان جاندى ەمحاناعا كەلۋشىلەر دە ەرەكشە قۇرمەت تۇتادى. اسىرەسە ونى ەگدە كىسىلەر ايرىقشا كۇتەدى. سەبەبى گۇلنار ايقىنبايقىزى جۇمىسىنا جاي عانا مىندەت دەپ قاراماي, ولارعا جىلى ءسوزى مەن مەيىرىمىن ايامايدى.
جالپى مەيىربيكە – ناۋقاسقا ەڭ جاقىن ءارى قامقورشى ادام, ويتكەنى ناۋقاستى دارىگەردەن بۇرىن كۇتىپ الىپ, شىعارىپ سالاتىن دا ءوزى. سوندىقتان مەيىربيكەنىڭ ءوز ماماندىعىنا دەگەن سۇيىسپەنشىلىگى, الدىنا كەلگەن ناۋقاسقا جاناشىرلىق تانىتۋى بارىنەن ماڭىزدى. بۇل رەتتە تاجىريبەلى مەيىربيكە گۇلنار بەيسەنوۆا كوپكە ۇلگى.
