ەلورداداعى «جاستار» تەاترىندا استانا قالاسى اكىمدىگىنىڭ تىلدەردى دامىتۋ جانە ارحيۆ ءىسى باسقارماسىنىڭ, «رۋحانيات» مەكەمەسىنىڭ ۇيىمداستىرۋىمەن اقىن, جازۋشى, جۋرناليست, قر مادەنيەت قايراتكەرى ەسەنگەلدى ءسۇيىنوۆتىڭ «جايناي بەر, تۋعان ەلىم» اتتى شىعارماشىلىق كەشى ءوتتى.
قالا جۇرتشىلىعىن, جاستاردى قالامگەردىڭ شىعارماشىلىعىمەن تەرەڭىرەك تانىستىرۋ ماقساتىندا وتكەن بۇل كەزدەسۋگە قر مادەنيەت جانە اقپارات مينيسترلىگىنىڭ, قر جازۋشىلار وداعى استانا قالالىق فيليالىنىڭ وكىلدەرى, سونداي-اق اقىندار مەن جازۋشىلار, تەاتر اكتەرلەرى, جاستار قاتىستى. استانا قالاسى اكىمدىگىنىڭ تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى يسلامبەك دوسجان استانا قالاسى اكىمىنىڭ قۇتتىقتاۋ حاتىن كەش يەسىنە تاپسىرسا, قر جازۋشىلار وداعى استانا قالالىق فيليالىنىڭ توراعاسى داۋلەتكەرەي كاپۇلى وداقتىڭ قۇتتىقتاۋ حاتىن وقىپ, قالامگەرگە شىعارماشىلىق تابىس تىلەدى.
ەسەنگەلدى ءسۇيىنوۆتىڭ ەسىمى وقىرمان قاۋىمعا قالامى جۇيرىك جۋرناليست, اقىن رەتىندە جاقسى تانىس. ونىڭ ءومىردىڭ وزەكتى ماسەلەلەرىن ارقاۋ ەتكەن ماقالالارى, پۋبليتسيستيكا, ەسسە, سۇحباتتارى رەسپۋبليكالىق باسىلىمداردا ءجيى جارىق كورىپ ءجۇر. «كۇڭگىر تاۋ قۇپياسى», «ارايلى تاڭ», «تەربەگەن تەڭىز ءالديى» سىندى كىتاپتاردىڭ اۆتورى.
– بۇل شىعارماشىلىق كەشتى حالىق الدىنداعى ەسەپ بەرۋىم دەپ سانايمىن. كەشتە سياسى كەپپەگەن ولەڭدەرىم دە وقىلدى. جالپى قازىرگە دەيىن ءار جانردا جازعان 6 كىتابىم جارىق كوردى, «سۇيەمىن سەنى» جىر جيناعىن باسپاعا ۇسىندىم, بۇيىرسا, جاقىندا جارىق كورەدى, – دەدى كەش يەسى.
