وتكەن اپتانىڭ سوڭعى كۇندەرى الەۋمەتتىك جەلىلەردى قولدانۋشىلاردىڭ كوپشىلىگى ءبىر اۋىز ءسوزى ءۇشىن دەنساۋلىق ساقتاۋ ءمينيسترى ەلجان بىرتانوۆقا شۇيلىكتى.
دەنساۋلىق ساقتاۋ سالاسىنىڭ ايدارىنان جەل ەسىپ تۇرعان جوق. سوڭعى جىلدارى حالىق سانى ارتىپ جاتسا دا, بيۋدجەتتەن بولىنەتىن قاراجاتتىڭ كولەمى وسىدان ون جىل بۇرىنعى كۇيىندە قالدى. ونىڭ كورىنىسى بۇگىنگى مەديتسينادان ايقىن بىلىنەدى. الايدا جاۋىردى جابا توقىماي, وسى سالانىڭ دامۋىنا جول ىزدەلىك دەگەن ءمينيستردىڭ جازىعى بار ما؟
«ءبىزدىڭ ەلدە, باسقا ەلدەرمەن سالىستىرعاندا, اۋرۋحانالاردىڭ قىزمەتىن شامادان تىس تۇتىنۋ وتە كوپ. ياعني, ۇيىندە جاتىپ دارىگەرگە كورىنىپ, ءدارىسىن الىپ ەمدەلىپ نەمەسە كۇندىزگى ستاتسيونارعا كەلىپ-كەتىپ ءدارىسىن ەگىپ, ەم قابىلداۋعا بولاتىن جاعدايدا ادامدار تىم كوپ جانە ءجيى اۋرۋحانالارعا جاتادى» دەدى مينيستر.
ونىڭ ايتۋىنشا, بۇكىل الەمدە قاجەتتىگى شامالى جانە جاتىپ ەمدەۋدى ارتىعىنان تۇتىنۋدى بولدىرتپاۋ ءۇشىن ناۋقاستاردى اۋرۋحاناعا جاتقىزۋدى باقىلاۋ بويىنشا وتە قاتاڭ تالاپتار قويىلادى, ويتكەنى ول وتە قىمبات.
«ءبىز بەس ءجۇز توسەكتىك اۋرۋحانا-سارايلار سالۋدى ۇيرەندىك. ەش جەردە ونداي جوق. جۇرەككە كۇردەلى وپەراتسيادان كەيىن دە ناۋقاس ءبىر اپتا ىشىندە ۇيىنە كەتەدى. ال بىزدە ادامداردى ستاتسيونارعا ايلاپ جاتقىزامىز, ويتكەنى كەيبىر دارىگەرگە ولاردىڭ توسەك تارتىپ جاتقانى ءتيىمدى» دەيدى ەلجان ءبىرتانوۆ ماسەلەنى ءتۇسىندىرىپ.
ونىڭ ايتۋىنشا, اۋرۋحانادا كۇندىز-كۇنى دارىگەردىڭ باقىلاۋى قاجەت نەمەسە مامانداردىڭ ءجىتى قاداعالاۋىن قاجەت ەتەتىن اۋىرعان ادام جوسپارلى وپەراتسياعا دايىنداعاندا عانا جاتقىزىلۋى ءتيىس.
قاراپ وتىرساڭىز, جازىعى – جاقسى بولسىن دەگەنى ەكەن. نەگە ءمينيستردىڭ اششى ءسوزى كوبىمىزدىڭ قىتىعىمىزعا ءتيدى؟
قازىر زامان وزگەردى. اۋرۋدىڭ دا ءتۇرى ارتپاسا, كەمىپ جاتقان جوق. كۇندىز-ءتۇنى كۇرە تامىرىنان ءدارى قۇيىپ, دارىگەردىڭ ءبىر ەلى كەتۋىنە بولمايتىن دەرتتى جاندار دا كوبەيدى. جاتىپ ەمدەلۋگە سولار شىن مۇقتاج. ەندەشە, شىن مۇقتاجداردىڭ ىشىندەگى ناعىز كارىپتەردىڭ قامىن ويلاعان ءمينيستردى نەگە دۇرىس تۇسىنبەدىك؟
