مۇگەدەكتەردىڭ ماسەلەلەرى تىڭدالدى

مۇمكىندىگى شەكتەۋلى جاندار الەۋمەتتىك تۇرعىدان قالاي قورعالۋدا؟ باس قالانىڭ اتقارۋشى ورگاندارى ول ءۇشىن نە ىستەپ جاتىر؟ استانا قالالىق ءماسليحاتىنىڭ تۇراقتىكوميسسيالارىنىڭ قوعامدىق تىڭداۋىندا ءتيىستى باسقارمالاردىڭ باسشىلارى بۇل تاراپتا ەسەپ بەرىپ, مۇگەدەكتەر ۇيىمدارىنىڭ جەتەكشىلەرى ءوز ۇسىنىستارى مەن تالاپ-تىلەكتەرىن جەتكىزدى.

الدىمەن بايانداما جاساعان جۇمىسپەن قامتۋ, ەڭبەك جانە الەۋمەتتىك قورعاۋ باسقارماسىنىڭ باسشىسى ەرمەك وسپانوۆتىڭ ايتۋىنشا, استانادا 23069 مۇگەدەك تىركەلگەن. ولاردىڭ 4379-ى – بالالار. مۇمكىندىگى شەكتەۋلى جانداردى وڭالتۋعا بيىل 2 ملرد تەڭگەگە جۋىق قارجى ءبولىندى.
بۇل قاراجاتقا ءجۇرىپ-تۇرۋى قيىن ءبىرىنشى توپ مۇگەدەكتەرىنە كورسەتىلەتىن جەكە كومەكشىنىڭ الەۋمەتتىك قىزمەتى, مۇمكىندىگى شەكتەۋلى جانداردى اربالارمەن, مىندەتتى گيگيەنالىق قۇرالدارمەن, تاعى باسقا كەرەك-جاراقتارمەن قامتاماسىز ەتۋ, ءارتۇرلى مەديتسينالىق كومەك, مۇگەدەك بالالاردى ءۇي­دە وقىتۋ قىزمەتى, سونداي-اق, مۇگەدەكتەردى تاسىمالدايتىن كولىك قىزمەتى (ينۆاتاكسي) كىرىپ وتىر. قالادا قازىر سونداي قىزمەتتى 21 كولىك كورسەتەدى.
مادەني, ءبىلىم بەرۋ, سپورت, دەنساۋلىق ساقتاۋ, كاسىپكەرلىك نىسانداردىڭ مۇگەدەكتەرگە قولجەتىمدىلىگى باعىتىندا جۇمىس جۇرگىزىلۋدە. بۇگىنگى كۇنگە 1106 نىسان پاسپورتتالدى. پاندۋستار بولماعان جاعدايدا ايىپپۇل سالىنادى. قالاداعى 749 اۆتوبۋسقا مۇمكىندىگى شەكتەۋلى جاندار ءمىنىپ-تۇسە الاتىنداي قۇرىلعى ورناتىلدى. «استانا – رۋحى مىقتى ادامدار قالاسى» باعدارلاماسىنان مۇگەدەكتەر تىس قالىپ كەلە جاتقان جوق.
دەنساۋلىق ساقتاۋ باسقارماسىنىڭ باسشىسى كامالجان نادىروۆتىڭ سوزىنشە, مۇگەدەكتەر تەگىن مەديتسينالىق كو­مەك­تىڭ كەپىلدەندىرىلگەن كو­لەمى اياسىندا دياگنوستيكا­لىق تەك­سەرۋلەردىڭ تولىق كولەمىن الادى. «تاۋەلسىز ءومىر» دوس» قو­عامدىق بىرلەستىگىنىڭ باس مامانى ارداق وتارباەۆ تابيعي جولمەن بالا سۇيە المايتىن, ارباعا تاڭىلعان مۇگەدەكتەرگە قولدان ۇرىقتاندىرۋعا مۇمكىندىك جاساپ, كۆوتا ءبولۋدى سۇرادى. باسقارما باسشىسى بۇعان استانادا ءبىر پەرزەنتكە زار بولىپ جۇرگەن وتباسىلارعا جىلىنا 50 كۆوتا بولىنەتىنىن, الايدا ءتيىستى كەزەكتە مىڭداعان ادام تۇرعانىن, كۆوتا ءبولۋ كەزىندە ادامنىڭ مۇگەدەك-مۇگەدەك ەمەستىگى ەسەپكە الىنبايتىنىن, مۇندا ناقتى مەديتسينالىق كورسەتكىشتەر مەن كەزەكتىلىك ءرول وينايتىنىن ايتتى.
ءبىلىم باسقارماسىنىڭ باسشىسى ءانۋار جانعوزين قالادا ەرەكشە قاجەتتىلىگى بار بالالارعا ارنايى ءبىلىم بەرەتىن 42 مەكەمە قىزمەت كورسەتەتىنىن, سۇرانىس بولىپ وتىرعاندىق­تان 2020 جىلدىڭ سوڭىنا دەيىن تاعى وسىنداي 5 مەكەمە سالۋ جوسپارلانعانىن جەتكىزدى. «قازىر استانادا جەكە عيماراتتارى بار 199 ءبىلىم بەرۋ ۇيىمىنىڭ 187-سىندە نەمەسە 94 پايىزىندا مۇمكىندىگى شەكتەۋلى جاندارعا ءتيىستى جاعداي جاسالعان. قالعان 12-سىندەگى كەمشىلىكتەردى بيىل تۇزەيمىز» دەگەن ول مۇگەدەك بالالاردى وقىتاتىن كادرلار, سونىڭ ءىشىن­دە لوگوپەدتەر, دەفەكتولوگتار, باسقا دا وسى سياقتى ماماندار, جيىنى 63 ادام جەتىس­پەي جاتقانىن ايتتى. ونىڭ ايتۋىنشا, گۋمانيتارلىق كوللەدج بازاسىندا ينكليۋزيۆ­تى ءبىلىم بەرۋ بويىنشا جاڭا مامان­دىققا وقىتۋ جۇيەسى ەنگىزىلمەك. ال بولاشاقتا وسى وقۋ ورنى نەگىزىندە ۋنيۆەرسيتەت اشىلماق.
كاسىپكەرلىك جانە ونەركاسىپ باسقارماسى باسشىسىنىڭ ورىنباسارى رۋسلان ىدىرىسوۆ وسى باعىتتا مۇگەدەكتەردى قولداۋ جۇمىسىمەن تانىستىردى. تۇرعىن ءۇي باسقارماسىنىڭ باسشىسى رۋسلان احمەتوۆ مەملەكەت تاراپىنان بەرىلەتىن باسپانا كەزەگىندە 3 مىڭعا جۋىق ءى جانە ءىى توپتاعى مۇگەدەكتەر جانە مۇگەدەك بالالاردى تاربيەلەپ جاتقان 2 مىڭعا تارتا وتباسى تۇرعانىن باياندادى. «ولارعا الەۋمەتتىك ءالسىز توپتار تارماعىنداعى كەزەكتىلىكتىڭ رەتى بويىنشا پاتەر بەرىلەدى.
ءى جانە ءىى توپتاعى مۇگەدەكتەر باسپانا العان بەتتەن جەكەشەلەندىرە الادى. ول ءۇشىن ءتيىستى زاڭناما بار. جالپى العاندا, 2015-2017 جىلدارى مۇگەدەكتەرگە 102 پاتەر بەرىلدى» دەدى باسقارما باسشىسى.
«ناسلەديە» قوعامدىق بىرلەستىگىنىڭ ءتورايىمى مارجان ابدۋللينا, استانا اكىمىنىڭ مۇگەدەكتەردى الەۋمەتتىك قورعاۋ ماسەلەلەرى جونىندەگى كەڭەسشىسى مۇرات ءابدىمومىنوۆ تۇيتكىلدەردى قوزعاپ, ءوز ۇسىنىستارى مەن تالاپ-تىلەكتەرىن جەتكىزدى. قالالىق ءماسليحات دەپۋتاتى يليا مەششەرياكوۆ مۇگەدەكتەردىڭ باستامالارىن قولداۋ كەرەكتىگىنە نازار اۋداردى.
تىڭداۋ قورىتىندىسىندا قالالىق ءماسليحاتتىڭ تۇراقتى كوميسسيالارىنىڭ مۇشەلەرى قالا اكىمدىگىنە ءتيىستى ۇسىنىس­تاردى جىبەردى.

امانعالي قالجانوۆ