مۇگەدەكتەرگە بەرىلگەن مۇمكىندىك
مۇمكىندىگى شەكتەۋلى جاندارعا ارنالعان بوس جۇمىس ورىندارىنىڭ كەزەكتى جارمەڭكەسى ءوتتى.
مۇگەدەكتەردى جۇمىسپەن قامتۋدىڭ بەلسەندى شاراسىندا ادەتتەگى ءداستۇر بويىنشا, الەۋمەتتىك قورعاۋ ماسەلەلەرى, سونىمەن قاتار ەڭبەك نارىعىنداعى احۋال تۋرالى اقپاراتتار بەرىلدى.
«ءبىز وسىمەن ءۇشىنشى جىل قاتارىنان مۇمكىندىگى شەكتەۋلى جاندار ءۇشىن بوس جۇمىس ورىندارى جارمەڭكەسىن وتكىزۋدەمىز. ءبىر قۋانارلىعى, بۇل يگى ىسكە مەكەمە مەن كاسىپورىنداردىڭ قىزىعۋشىلىعى كۇننەن-كۇنگە ارتىپ كەلەدى. ماسەلەن, مىنا شاراعا 30 جۇمىس بەرۋشى قاتىسۋدا», – دەدى استانا قالاسى اكىمدىگىنىڭ جۇمىسپەن قامتۋ ورتالىعىنىڭ ديرەكتورى ولجاس ومار.
ونىڭ ايتۋىنشا, مۇنداي جارمەڭكەلەر مۇمكىنشىلىگى شەكتەۋلى ادامدارعا ءبىر مەزەتتە ءبىرنەشە جۇمىس بەرۋشى ۇيىممەن بايلانىسۋعا مۇمكىندىك بەرەدى. ال جۇمىس ۇسىنىپ وتىرعانداردىڭ باسىم بولىگى – شاعىن جانە ورتا بيزنەس سالاسىنىڭ ۇيىمدارى. ولار وزدەرىنە قاجەتتى الەۋمەتتىك قىزمەتكەر, ەسەپشى, باعدارلاماشى, كۇزەتشى, تىگىنشى, اكىمگەر, ساۋدا جانە قىزمەت كورسەتۋ, پوليگرافيا ماماندارىن جارمەڭكەگە كەلۋشىلەردىڭ قاتارىنان تاپتى. جۇمىس ىزدەۋشىلەردىڭ 60 پايىزى – ايەلدەر. وتكەن جىلى ءبىز وسىنداي جولمەن شامامەن 90 ادامدى جۇمىسقا ورنالاستىردىق. ءبىر جاقسىسى, جۇمىسپەن قامتۋ ورتالىعى جۇمىس بەرۋشىلەر جارمەڭكەسى ارقىلى ەڭبەكپەن قامتىلعان جانداردى ۇنەمى نازاردا ۇستاپ وتىرادى. حالىقتىڭ نىسانالى توپتاعى تۇلعالارى جۇمىسپەن قامتۋ ورتالىعىنىڭ ماماندارىنان «جۇمىسپەن قامتۋ 2020 جول كارتاسى» باعدارلاماسى شەڭبەرىندە وزدەرىن قىزىقتىرعان سۇراقتاردىڭ جاۋابىن الدى. سونىمەن قاتار, وسى شارا بارىسىندا «قاسيەت» پسيحولوگيا ورتالىعى مۇگەدەكتەرگە «ءوزىن-ءوزى دامىتۋ» تاقىرىبىندا سەمينار-ترەنينگ وتكىزدى.
ايگۇل ۋايسوۆا