قاسيەتتى قۇربان ايت مەرەكەسىنە وراي «شانس» («مۇمكىندىك») الەۋمەتتىك-قۇقىقتىق قولداۋ ورتالىعىندا جۇرتشىلىققا تەگىن شاش قيۋ اكتسياسى وتكىزىلدى.
اكتسيا بارىسىندا تەك شاش قيۋ عانا ەمەس, سونىمەن قاتار قىز-كەلىنشەكتەرگە مانيكيۋر, پەديكيۋر جاساۋ قىزمەتتەرى دە تەگىن ۇسىنىلدى. بۇل يگىلىكتى ىسكە ارنايى كۋرستا وقيتىن بىرنەشە شاشتارازشى مەن مانيكيۋر جانە پەديكيۋر جاساۋ شەبەرلەرى جۇمىلدىرىلعان بولاتىن. كەلۋشىلەر دە وسىنداي اكتسيانىڭ وتكىزىلىپ جاتقانىنا ءدان ريزا بولدى. سولاردىڭ ءبىرى – نەسىبەلى ەسىمدى بويجەتكەن.
– مەن مۇندا اكتسيا اياسىندا شاشىمدى تەگىن ارلەپ, مانيكيۋر جاساتتىم. قىزمەت كورسەتۋ ساپاسى ۇنادى. شەبەرلەرگە كوپ راقمەت. سول سياقتى, اكتسيانى ۇيىمداستىرۋشىلارعا دا العىسىمدى بىلدىرگىم كەلەدى, – دەيدى نەسىبەلى.
«شانس» الەۋمەتتىك-قۇقىقتىق قولداۋ ورتالىعىنىڭ ديرەكتورى ولگا رىل تىلشىلەر توبىنا قۇربان ايت مەرەكەسىنە ارنالىپ جايىلعان داستارقان باسىندا سۇحبات بەردى. اڭگىمە بارىسىندا ولگا ۆلاديميروۆنا جالپى «شانس» ورتالىعى جايلى ايتىپ ءوتتى.
– «شانس» ورتالىعى بالالىقپەن قانداي دا ءبىر بۇزاقىلىق نەمەسە زاڭعا قارسى ارەكەتتەر جاساپ, زاڭ الدىندا جاۋاپقا تارتىلعان جاسوسپىرىمدەرگە ءتۇزۋ جول باعىتتاپ, ولاردىڭ بولاشاقتا ەكىنشى قايتارا قاتەلىككە بوي الدىرماي, ەڭبەك ەتىپ, ەل قاتارلى ءومىر سۇرۋىنە قولداۋ كورسەتۋ ماقساتىندا 2010 جىلى قۇرىلعان. ورتالىق قالالىق اكىمدىكپەن, ءبىلىم باسقارماسىمەن جانە قۇقىق قورعاۋ ورگاندارىمەن تىعىز قارىم-قاتىناستا جۇمىس ىستەيدى. ىشكى ىستەر ورگاندارىنىڭ كامەلەتكە تولماعانداردىڭ ىستەرى جونىندەگى ۋچاسكەلىك پوليتسيا ينسپەكتورلارى باعىتتاعان 9-17 جاس ارالىعىنداعى جاسوسپىرىمدەردى قاراماعىنا الىپ وتىر, – دەيدى و. رىل.
ولگا ۆلاديميروۆنانىڭ ايتۋىنشا, اتالمىش ورتالىق اشىلعان كۇننەن باستاپ مىڭداعان جاسوسپىرىمگە قولداۋ كورسەتكەن. ال قازىرگى ۋاقىتتا ورتالىق بازاسىندا 630 بالا مەن ءجاسوسپىرىم تىركەلگەن ەكەن.
بۇل مەكەمەدە الەۋمەتتىك ماماندار مەن پسيحولوگتار جانە زاڭگەرلەر – بارلىعى 19 مامان قىزمەت ەتەدى. سول سياقتى ورتالىقتا تىركەۋدە تۇرعان بالالار بوس ۋاقىتتارىن ءتيىمدى پايدالانۋ ءۇشىن دومبىرا, گيتارا, جول ءجۇرۋ ەرەجەلەرىن ۇيرەتۋ سياقتى ۇيىرمەلەر دە قاراستىرىلعان. ايتا كەتۋ كەرەك, مۇنداعى بارلىق قىزمەت تۇرلەرى – تەگىن. البەتتە, تەك تىركەۋدە تۇرعان بالالار ءۇشىن عانا. سونداي-اق, ورتالىقتا بالالار قوناقۇيى دە قاراستىرىلعان. ماسەلەن,ءتۇرلى سەبەپتەرمەن ۇيىنەن كەتىپ قالعان بالالاردىڭ قانداي دا ءبىر جامانشىلىققا ۇرىنىپ قالماۋى ءۇشىن ءبىراز ۋاقىتقا وسى قوناقۇيدى پانالاۋعا مۇمكىندىكتەرى بار.
جۇمىس ورىندارىن ارالاتا ءجۇرىپ تانىستىرعان ولگا رىل قالالىق اكىمدىكتىڭ قولداۋىمەن اتالمىش ۇيىمنىڭ بازاسىندا تىركەۋدە تۇرعان بالالار ءۇشىن مەكەمەنىڭ جانىنداعى بوس ورىنعا فۋتبول الاڭىنىڭ دا سالىنعانىن جەتكىزدى. ايتۋىنشا, قازىرگى ۋاقىتتا بۇل الاڭدا ىقشام اۋدان تۇرعىندارى دا سپورتپەن اينالىساتىن كورىنەدى.
نۇرداۋلەت كاكىشەۆ
