جاقىندا اۋىلدان جىقاڭ كوكەم كەلگەن. بۇل كىسى ەلدەن الىسقا ۇزاپ شىقپاعان ادام. ومىرىندە ارقالىققا ءبىر-ەكى رەت قانا جولى تۇسكەن بولار. ودان باسقا شاھارعا ات ءىزىن سالىپ كورمەگەن. بىراق تىرشىلىكتەن تەرگەنى كوپ. ءار نارسەدەن وي ءتۇيىپ جۇرەدى. وسى جولى ايكوركەم استانانى كورەيىن دەپ تابان تىرەپتى. جاڭا ۆوكزالدان كۇتىپ الدىم. الىپ عيماراتتى كورىپ, تاڭدايىن قاقتى. كولىككە وتىرعاننان «ال, بالا, باستا» دەپ ەرىكتى وزىمە بەردى. شاھارعا العاش كەلگەن قوناعىمدى الىپ, ۇلكەن كوشەلەر بويىمەن جۇيتكي جونەلدىم. اۋەلى, سول جاعالاۋدى ارالادىق. باس قالانىڭ سيمۆولى سانالعان «بايتەرەكتى» كورسەتتىم. «ماڭگىلىك ەل» قاقپاسىنا باردىق. ەندى شەتىنەن كەرتىپ كوشەلەردى تانىستىرىپ كەلەمىن. «مىناۋ, ءاليحان بوكەيحانوۆتىڭ, اناۋ احمەت بايتۇرسىنوۆتىڭ كوشەسى. انا بۇيىردە دىنمۇحامەد قوناەۆ اتىنداعى كوشە قالىپ بارادى» دەپ قويامىن كوكەمە. ول بولسا «وي, ارىستار-اي» دەپ ريزا بولىپ, مارقايىپ وتىر. ءبىر كەزدە كوكەم «مۇستافا شوقايدىڭ كوشەسى قايدا؟» دەپ قويىپ قالدى. ءتىلىمدى ءتىستەپ, نە ايتارىمدى بىلمەدىم.
شىندىعىندا, ۇلتىمىزدىڭ ۇلى تۇلعالارىنىڭ ءبىرى, كورنەكتى قوعام قايراتكەرى, الاش قوزعالىسى كوسەمدەرىنىڭ بىرەگەيى, تۇركىستان اۆتونومياسىنىڭ جەتەكشىسى, ءومىرىنىڭ سوڭىنا دەيىن ازاماتتىق ۇستانىمىنان تايماعان قايراتكەرگە ەگەمەن ەلدىڭ ورداسىنان بۇيىرعان كوشە قايدا ەدى؟! بىلمەسەڭىز, ايتايىق. ول – بۇگىنگى قالانىڭ شەتىندەگى بۇرىن «پرومىشلەننىي» كەنتى بولعان, قازىر تۇرعىن الاپ اتانعان اۋدانداعى ۇزىندىعى 1108,8 مەترگە سوزىلعان كوشە. بۇنىڭ ەسكى اتاۋى «پەرسپەكتيۆنىي» بولعان ەكەن. قالاي تاۋىپ قويىلعان دەسەڭىزشى؟! جەر بەتىندە قازاق دەگەن حالىق بار دا مۇستافانىڭ اتى ولمەيتىنى ءمالىم عوي.
ءبىر جىلدارى ءاليحان بوكەيحانوۆ پەن احمەت بايتۇرسىنوۆقا ەلوردادان ەلەۋسىز كوشە بەرىلدى. سول كەزدە زيالىلار دابىل قاعىپ, الاشتىڭ ارداقتى ەكى ازاماتىنا سول جاعالاۋداعى كورنەكى كوشەلەردى بەرۋ كەرەك دەگەن ماسەلە كوتەردى. اقىرى, بۇل ءىس ساتىمەن جۇزەگە استى. ال شوقاي ەسىمى سول قالپىندا قالىپ قويدى. ءۇش الاش ارداقتىسىنىڭ كوشەلەرى قاتار جاتسا ايىپ پا؟ وسىنى قالالىق ونوموستيكا كوميسسياسىنىڭ مۇشەلەرى ەسكەرگەنى ءجون ەدى. قىسقاسى, بۇكىل تۇركى جۇرتى توبەسىنە كوتەرگەن مۇستافا اتامىز ءوز ەلىندە ۇمىت بولاتىن تۇلعا ما؟!
