جاقىندا الەۋمەتتىك جەلىلەردە ەلىمىزدىڭ باستى مونۋمەنتى «قازاق ەلى» الاڭىنداعى تاستاردىڭ قۇلاپ جاتقانى قىزۋ تالقىعا تۇسكەن بولاتىن. راسىمەن دە سالماعى اۋىر ءمارمار تاستار ويلاماعان جەردەن وتكىنشىلەردىڭ باسىنا تۇسسە, بىرەۋ-مىرەۋدى جازىم ەتپەي قويماسى انىق. وسىنداي وقىس وقيعا بولماس ءۇشىن قانداي جۇمىستار جۇرگىزىلىپ جاتىر؟ ماسەلەنىڭ ءمان-جايىن انىقتاپ كوردىك.
«قازاق ەلى» مونۋمەنتىنىڭ نەگىزگى بولىگى مادەنيەت جانە سپورت باسقارماسىنىڭ بالانسىندا بولسا, الاڭنىڭ ءبىر بولىگى الماتى اۋدانىنىڭ اكىمدىگىنە, ەندى ءبىر بولىگى تاۋەلسىزدىك سارايىنا جانە تاعى ءبىر جارىم جارتىسى «شابىت» شىعارماشىلىق سارايىنا قارايدى ەكەن. مامانداردىڭ سوزىنە سۇيەنسەك, ءمارمار تاستارى شىتىناپ, ءتۇسىپ جاتقان مونۋمەنتتىڭ ارتىنداعى كولونناداعا الداعى اپتادا جوندەۋ جۇمىستارى باستالىپ, قالا كۇنىنە دەيىن اياقتاۋ جوسپارلانۋدا.
– كولوننادانىڭ كەيبىر جەرىندەگى ءمارمار تاستار راسىندا دا قۇلاپ قالعان. تاعى دا بوساپ, قۇلاعالى تۇرعاندارى بار. وسىعان بايلانىستى قازىرگى ۋاقىتتا كونكۋرستىق راسىمدەر جۇرگىزىلىپ جاتىر. جاقىن ارادا مەردىگەر ۇيىم انىقتالىسىمەن مونۋمەنتتىڭ ارتىنداعى باعاندار جوندەلە باستايدى. جالپى, جوندەۋ جۇمىستارى جوسپار بويىنشا قالا كۇنىنە دەيىن اياقتالادى. سونىمەن قاتار كولوننادان بولەك مۇنداعى كەتەۋى كەتىپ, الاڭنىڭ سىنىن بۇزىپ تۇرعان جەرلەر دە جاڭارتىلادى. ايتا كەتۋ كەرەك, بۇعان دەيىن بۇل جەردەگى سۋ بۇرقاقتار قالپىنا كەلتىرىلگەن بولاتىن, – دەيدى
الماتى اۋدانى اكىمدىگىنىڭ اباتتاندىرۋ جانە ينفراقۇرىلىمدى دامىتۋ ءبولىمىنىڭ جەتەكشىسى رۋسلان ورالوۆ تىلشىلەرگە بەرگەن سۇحباتىندا.
مامانداردىڭ ايتۋىنشا, وسىناۋ الاڭعا جوندەۋ جۇمىستارى جىل سايىن جۇرگىزىلەتىن كورىنەدى. بىراق بۇعان دەيىن الاڭنىڭ باسقا ۋچەسكەلەرى جوندەلىپتى. مىسالى, بىلتىر تاۋەلسىزدىك سارايىنا قاراستى اۋماقتىڭ شامامەن 500 شارشى مەتر كولەمدە قابىرعا كەروماگرانيتتەرى مەن 300 شارشى مەتر جەر توسەمى رەتكە كەلتىرىلگەن.
– الاڭ ۇلكەن. ءبىزدىڭ اۋماعىمىز دا از ەمەس. سوندىقتان ءتيىستى جەرلەردى جىل سايىن جوندەۋگە تۋرا كەلەدى. بيىلعى جوندەۋ جۇمىستارىنا 58 ميلليون تەڭگە ءبولىندى. بۇل قارجىعا شامامەن 400 شارشى مەتر قابىرعاداعى كەراموگرانيت پەن 700 شارشى مەتر كولەمىندەگى جەر توسەمدەرىن جاڭارتۋ جوسپارلانىپ وتىر. وسى جۇمىستى 1 ماۋسىمعا دەيىن اياقتاۋ مەجەلەندى. قازىرگى ۋاقىتتا بارلىق قۇجاتتارىمىز دايىن. ەندى تەك كەلەسى اپتادا كەلىسىمگە قول قويۋدى كۇتىپ وتىرمىز, – دەيدى تاۋەلسىزدىك سارايى ديرەكتورىنىڭ ورىنباسارى دۋلات قوجاحمەتوۆ.
ال الاڭداعى «شابىت» شىعارماشىلىق سارايىنا تيەسىلى اۋماقتا 148 شارشى مەتر كەراموگرانيت زاقىمدالىپتى. ونى جوندەۋگە 3 ملن 600 مىڭ تەڭگە ءبولىنىپ وتىر ەكەن.
– بىزدەگى پروبلەمالار, نەگىزىنەن, قىستىڭ كۇندەرى قار جينايتىن كولىكتەر مەن تيەۋىشتەردىڭ سالدارىنان تۋىندايدى. بۇل ماسەلەلەر جىل سايىن قايتالانىپ, قالپىنا كەلتىرىلەدى. بۇعان دەيىن اكىمدىك قارجىلاندىرىپ كەلدى. ەندى ءوز ەسەبىمىزدەن جوندەيتىن بولامىز. وسى اپتانىڭ سوڭىنا دەيىن قىزمەت كورسەتۋشى انىقتالۋى كەرەك. قازىر قايتا مونتاجداۋ جۇمىسى باستالىپ كەتتى. بىزگە تيەسىلى اۋماقتاعى جوندەۋ جۇمىستارى مامىر ايىنىڭ سوڭىنا دەيىن اياقتالۋى ءتيىس, – دەيدى «شابىت» شىعارماشىلىق سارايىنىڭ اكىمشىلىك شارۋاشىلىق قىزمەتى جەتەكشىسىنىڭ ورىنباسارى دىنمۇحامەد تۇيمەباەۆ.
رەتى كەلگەندە, قايتا مونتاجداۋ جۇمىسىن جاساپ جاتقان جۇمىسشىلارمەن دە از-كەم تىلدەستىك. ولاردىڭ ايتۋىنشا, وسىعان دەيىن الاڭداعى كەيبىر جەرلەرگە تاڭىلعان كەروماگرانيتتەر از مولشەردەگى تسەمەنت ەرىتىندىسىمەن عانا جاپسىرىلعان. بۇرىنعى مەردىگەر ۇيىمنىڭ جاۋاپسىزدىعىنا تاڭدانىستارىن بىلدىرگەن جۇمىسشىلار بۇل جولى ونداي ولقىلىقتى جىبەرمەيتىندەرىن ايتتى.
