نۇر-سۇلتانداعى №79 مەكتەپ-ليتسەيدىڭ جانىنان مۇز ايدىنى اشىلىپ, بالالاردىڭ يگىلىگىنە بەرىلدى.
اۋدانى 1552,2 شارشى مەتردى قۇرايتىن مۇز ايدىنىن اتالعان ءبىلىم مەكەمەسىندەگى قامقورشىلىق كەڭەس پەن اكەلەر كەڭەسىنىڭ مۇشەسى ازامات ەرمۇحامەدوۆ سالعىزىپتى. قۇرىلىس سالاسىنداعى كاسىپكەردىڭ ءوزى دە وسى مەكتەپتىڭ تۇلەگى ەكەن.
– مۇز ايدىنىن سالۋدىڭ ەش قيىندىعى جوق. بالا كۇنىمىزدە ءبارىمىز دە مۇنى جاسادىق. بار كەرەگى – سۇيرەتكى, شلانگ, ءورت ءسوندىرۋ گيدرانتى عانا. بۇل جۇمىسقا 5-7 كۇندەي ۋاقىتىمىز كەتتى. نەگىزى تاۋەلسىزدىك كۇنىنە قاراي اشامىز دەپ جوسپارلاعان ەدىك. كۇن جىلىپ كەتىپ, ءسال كەش اياقتادىق. مۇز ايدىنى ءۇشىن 30 جۇپ كونكي سىيعا تارتتىق. ەندى ناۋرىز ايىنا دەيىن بالالاردىڭ ءىشى پىسپايتىن بولار. قار كەتكەن سوڭ, ايدىندى تەننيس كورتى نەمەسە روليك تەبەتىن الاڭقاي رەتىندە پايدالانۋعا بولادى, – دەيدى ول.
مۇز ايدىنىنىڭ اشىلۋى بارىسىندا «بارىس» حوككەي كلۋبىنىڭ حوككەيشىلەرى ونەر كورسەتىپ, مەكتەپ وقۋشىلارى فلەشموب جاسادى.
