وسى جىلدىڭ سوڭىنا دەيىن ەلورداداعى 928 كوپبالالى وتباسىعا جالدامالى پاتەردىڭ سەرتيفيكاتى تابىس ەتىلەدى. ودان بولەك, تۇرعىن ءۇي قۇرىلىسى جيناق بانكى ارقىلى 2 پايىزدىق نەسيەمەن باسپانا الۋ جوباسى قولعا الىنادى. بۇل تۋرالى نۇر-سۇلتان قالاسى اكىمىنىڭ ورىنباسارى ەرلان قاناليموۆ اكىمدىكتە وتكەن ءباسپاسوز ءماسليحاتىندا ءمالىم ەتتى.
– كوپبالالى انالارعا قاتىستى كەزەك كۇتتىرمەس ەكى ماسەلە بار. ول الدىمەن – جالدامالى ءۇي ماسەلەسىن شەشۋ, ەكىنشىدەن, تومەن پايىزدىق مولشەرلەمەمەن تۇرعىن ءۇي قۇرىلىسى جيناق بانكى ارقىلى نەسيە الۋ. اتالعان بانكپەن 2 پايىزدىق مولشەرلەمە تۋرالى كەلىسىم جاسالىپ قويدى, ەندى بانكتىڭ ىشكى قۇجاتتارىن رەتتەۋ پروتسەسى ءجۇرىپ جاتىر. ءبىزدىڭ ەسەپ بويىنشا بۇل جوبا 17 ماۋسىم مەن شىلدە ايىنىڭ باسى ارالىعىندا ىسكە قوسىلۋى كەرەك, – دەدى اكىمنىڭ ورىنباسارى.
جاڭا باعدارلاماعا قاتىسۋ ءۇشىن كوپبالالى وتباسى ءوزىنىڭ كىرىس كوزىن راستايتىن قۇجات وتكىزۋى قاجەت. ال پاتەر الاردا 10 پايىزدىق العاشقى جارنا رەتىندە تولەيتىن قاراجاتى بولماعان جاعدايدا قالالىق اكىمدىكتەن بەرىلەتىن 1 ميلليون تەڭگەنىڭ سەرتيفيكاتىن الا الادى. بيىل اكىمدىك اتىنان كوپبالالى انالارعا جىل سوڭىنا دەيىن 1 مىڭ سەرتيفيكات بەرىلەدى.
بۇدان باسقا, اكىم ورىنباسارى كوپبالالى انالارعا ارنالعان جالدامالى ءۇي جايىنا توقتالدى. ونىڭ ايتۋىنشا, وسى جىلى ەلوردالىقتارعا 928 جالدامالى پاتەر بولىنبەك. وعان قۇجاتتاردى قابىلداۋ استاناداعى ر.قوشقارباەۆ كوشەسى, 39-ءۇي مەكەنجايى بويىنشا كەشەدەن باستاپ جۇرگىزىلۋدە. شامامەن 17 ماۋسىمعا دەيىن قۇجاتتاندىرۋ پروتسەسى اياقتالسا, ودان ءارى العاشقى 150 پاتەردىڭ سەرتيفيكاتى تابىس ەتىلەدى. پاتەرلەر 2-3 بولمەدەن تۇرادى. وتباسىلار جاڭا قونىسقا 15 شىلدەدەن 1 تامىزعا دەيىن كىرەتىن بولادى. سونداي-اق الگى سەرتيفيكات نەگىزىندە اكىمدىك ارقىلى تۇرعىن ءۇي قۇرىلىسى جيناق بانكىمەن كەلىسىمشارت جاسالادى. كەلىسىمشارت مەرزىمى – 5 جىل, ۋاقىتى بىتكەن سوڭ ونى ودان ءارى ۇزارتۋ مۇمكىندىگى بەرىلەدى. تاعى ءبىر ايتا كەتەرلىگى, بۇل مۇمكىندىك – تەك قانا كوپبالالى وتباسىلار ءۇشىن.
