ەلوردادا 500-دەن اسا قوعامدىق باقىلاۋشى سايلاۋعا باقىلاۋ جۇرگىزەدى. مۇنداي جاڭالىقتى كەشە جاستار سارايىنداعى بريفينگتە «امانات» سايلاۋعا مونيتورينگ جۇرگىزۋ ازاماتتىق پلاتفورماسى قالالىق شتابىنىڭ وكىلدەرى جاريا ەتتى. باسقوسۋدا ءمالىم بولعانداي, ەلىمىزدەگى 185 قوعامدىق ۇيىمدى بىرىكتىرەتىن «امانات» پلاتفورماسى 10 مىڭعا جۋىق تاۋەلسىز باقىلاۋشىنى وقىتىپ, دايىنداۋعا كىرىسكەن.
ەلورداداعى «سوتسيۋم-زەرتتەۋ» قوعامدىق بىرلەستىگىنىڭ جەتەكشىسى التىناي نۇركەەۆا «اماناتقا» قوسىلعان ازاماتتىق قوعامنىڭ باستى ماقساتى – ءادىل, اشىق جانە تازا سايلاۋ وتكىزۋدى قامتاماسىز ەتۋ ەكەنىن ايتادى. «ءبىز, قوعامداعى بەلسەندى ازاماتتار, نۇر-سۇلتان قالاسىنداعى ازاماتتىق قوعامنىڭ وكىلدەرى, «امانات» سايلاۋعا مونيتورينگ جۇرگىزۋ ازاماتتىق پلاتفورماسىنىڭ قۇرىلۋىن قولدادىق. بۇگىنگە دەيىن قالا بويىنشا شامامەن 500-دەن استام باقىلاۋشىنى وقىتىپ, دايىندادىق. ولاردىڭ جۇمىسىنا «ءموبيلدى كاپيتاندار» دەپ اتاعان 17 ۇيلەستىرۋشىمىز جەتەكشىلىك ەتەدى. باقىلاۋشىلارعا بەلگىلى ءبىر ۋچاسكەلەر بەلگىلەنگەن. ءبىزدىڭ تاۋەلسىز باقىلاۋشىلارىمىز سايلاۋ وتەتىن كۇنى ەكى اۋىسىممەن (05-45-تەن 14-00-گە دەيىن, 14.00-دەن 22.00-گە دەيىن) جۇمىس ىستەيدى. ءار باقىلاۋشى سايلاۋ ۋچاسكەسى اشىلعان ۋاقىتتان باستاپ جابىلعانعا دەيىنگى بارلىق ۇدەرىسكە قاتىسادى. ولار ارنايى انكەتا تولتىرادى» دەپ ءتۇسىندىردى ا.نۇركەەۆا.
قوعامدىق بىرلەستىك جەتەكشىسىنىڭ ايتۋىنشا, زاڭ بۇزۋشىلىقتار انىقتالعان كەزدە باقىلاۋشىلار دەرەۋ ۋچاسكەلىك كوميسسيا توراعاسىنا حابارلايدى. اسا ەرەكشە زاڭ بۇزۋشىلىق ورىن العاندا نەمەسە سول زاڭ بۇزۋشىلىققا كوميسسيا مۇشەلەرى جول بەرگەندە نە كوميسسيا توراعاسىنىڭ قاتىسى بولعان جاعدايدا قالالىق شتابقا, ودان ءارى رەسپۋبليكالىق شتابقا جەتكىزەدى. سول وقيعا تۋرالى ەكى دانا اكتى تولتىرادى. قۇجاتتى وزىنەن بولەك ەكى باقىلاۋشى نە سايلاۋشى راستاپ, قول قويادى. سونداي-اق التىناي نۇركەەۆا «اماناتتىڭ» باقىلاۋشىلارى بۇكىل قالا اۋماعىن قامتىپ, شالعاي كەنتتەردەگى ۋچاسكەلەرگە دە باراتىنىن ءمالىم ەتتى.
«باقىلاۋشىلاردىڭ مىندەتى – سايلاۋ ۇدەرىسىنە باقىلاۋ جانە تالداۋ جۇرگىزۋ. ءاربىر باقىلاۋشى جۇمىسقا كەلگەندە ارنايى انكەتا تولتىرادى. ول جەردە سايلاۋ ۋچاسكەسىنىڭ اشىلۋىنا, داۋىس بەرۋ بارىسىنا, داۋىستاردى ساناۋعا قاتىستى بىرنەشە سۇراققا جاۋاپ بەرەدى. ءبىزدىڭ باقىلاۋشىلارىمىز سايلاۋ كوميسسيالارىنىڭ جۇمىسىنا سەبەپسىز كيلىكپەيدى» دەدى ا.نۇركەەۆا.
«امانات» پلاتفورماسىنىڭ قالالىق شتابى جەتەكشىسى اسىلبەك ءابدىراشيتوۆتىڭ ايتۋىنشا, سايلاۋدىڭ ءادىل جانە اشىق وتۋىنە مۇددەلى قازاقستان ازاماتتارىنىڭ «امانات» تاۋەلسىز ەرىكتى قاۋىمداستىعىن قۇرۋعا ەلىمىزدەگى 260 قوعامدىق ويدىڭ كوشباسشىسى قولداۋ بىلدىرگەن. ونىڭ ايتۋىنشا, ازاماتتىق پلاتفورمانى قۇرۋ باستاماسىن ەلىمىزدەگى – 260, ال ەلوردامىزداعى 50-گە جۋىق قوعامدىق ويدىڭ كوشباسشىسى قولدادى. سونىڭ ىشىندە مۇرات ابەنوۆ, مۇساعالي دۋامبەكوۆ سياقتى ەلگە تانىمال 15-كە جۋىق تۇلعا بار.
ول «امانات – ازاماتتىق پلاتفورماسى» اتتى جوبانى باس قالاداعى 52 قوعامدىق بىرلەستىك, 500-دەن استام بەلسەندى ازامات قولداپ, سايلاۋ كۇنى بارلىق 204 ۋچاسكەگە باقىلاۋ جۇرگىزۋگە كومەكتەسەتىنىن جەتكىزدى. «نۇر-سۇلتان قالاسىندا 204 اشىق سايلاۋ ۋچاسكەسى بار, سولارعا ءبىزدىڭ 408 باقىلاۋشىمىز بارادى. بۇعان قوسا, تاعى 93 ادامدى رەزەرۆكە قويدىق. ويتكەنى سايلاۋ وتەتىن كۇنى باقىلاۋشىلاردىڭ ءبىرى سىرقاتتانىپ قالسا نەمەسە بەلگىلى ءبىر سەبەپتەرمەن كەلە الماي قالاتىن بولسا, رەزەرۆتەگى ادامدارمەن اۋىستىرامىز. ياعني, الداعى ۋاقىتتا تۋىندايتىن پروبلەمالاردىڭ بارلىعى الدىن الا قاراستىرىلىپ قويعان. ءبىزدىڭ باقىلاۋشىلاردىڭ ۇلەستىك سالماعىنا كەلەتىن بولساق, 69 پايىزى – ايەلدەر, 31 پايىزى – ەر-ازاماتتار, 30,6 پايىزى – جاستار, 20,3 پايىزى – زەينەتكەرلەر, 49,1 پايىزى – ورتا جاستاعى ادامدار» دەدى ول اتالعان جيىندا.
ەرىكتى قاۋىمداستىق وكىلدەرى سايلاۋ ۋچاسكەلەرىنىڭ ينفراقۇرىلىمىن تەكسەرىپ, ول جەردە اۋا باپتاعىشتاردىڭ, مۇگەدەكتەردىڭ ءجۇرىپ-تۇرۋىنا ىڭعايلى پاندۋستاردىڭ بولۋىنا ەرەكشە نازار اۋدارادى.
