نۇر-سۇلتان قالاسىنىڭ بايقوڭىر اۋدانى اقجولتاي باستاما كوتەردى. اۋداندىق اكىمدىك پەن ارداگەرلەر كەڭەسى كەشە ج.جاباەۆ اتىنداعى №4 مەكتەپ-گيمنازيادا «سالت-داستۇرلەر – حالىقتىڭ اسىل قازىناسى» اتتى اۋداندىق اشىق بايقاۋىن وتكىزدى.
ەڭ ماڭىزدىسى سول, بۇل بايقاۋعا ەلوردامىزدىڭ الماتى, ەسىل, سارىارقا اۋداندارىنان دا ۇمىتكەرلەر قاتىستى. سوندىقتان دا كورەرمەنى مەن جانكۇيەرلەر دە كوپ بولىپ, مەكتەپتىڭ ۇلكەن زالىندا ينە شانشار جەر قالمادى. «اقساقالدىڭ اق باتاسى» جانە «اق اجەنىڭ بەسىك جىرى» نوميناتسيالارى بويىنشا ۇيىمداستىرىلعان سايىستا ىرىكتەلگەن 25 ۇمىتكەر باق سىنادى.
بۇل بايقاۋ ەلباسىنىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» باعدارلامالىق ماقالالارىنىڭ نەگىزدەرىندە قازاق حالقىنىڭ سالت-داستۇرلەرىن دارىپتەۋ, ۇلتتىڭ تاريحي جانە رۋحاني قۇندىلىقتارىن ناسيحاتتاۋعا قولداۋ كورسەتۋ, رۋحاني تاربيە جۇمىستارىن اتقارۋدا ارداگەرلەردىڭ قوعامداعى ورنى مەن ءرولىن كوتەرۋ, جاس ۇرپاقتى حالىقتىڭ سالت-داستۇرلەرىنىڭ نەگىزىندە تاربيەلەۋگە باعىتتالعان. مەكتەپتىڭ كىرەبەرىس زالىندا ۇلتتىق قولونەر كورمەسى مەن وركەسترلىك كونتسەرتتى تاماشالاعان جۇرتشىلىقتىڭ كوتەرىلگەن كوڭىل كۇيىن اڭعاردىق.
بايقاۋدىڭ قازىلار القاسىندا رەسپۋبليكالىق جانە استانالىق ارداگەرلەر كەڭەستەرىنىڭ باسشىلارى ومىرزاق وزعانباەۆ پەن سانسىزباي ەسىلوۆ, قر ءبىلىم بەرۋ ءىسىنىڭ قۇرمەتتى قىزمەتكەرى بازاركۇل سىزدىقوۆا جانە باسقا دا بەلگىلى ازاماتتار مەن قوعام قايراتكەرلەرى بولدى.
ال بايقاۋدىڭ وزىنە كەلەر بولساق, حايدار ءابدىراحمانۇلى, ابىلاي اليەۆ, سەرىك ءالجانوۆ, ساقتاش السەيىتوۆ, امانگەلدى قابيەۆ, سەرىك ورال, قۋات راحيمجانوۆ, تورعاۋىت شاحزادا, مەلس ىسقاقوۆ سىندى اتالارىمىز ونەگەلى ونەرىمەن كوزگە تۇسسە, كەنجەتاي جانۇزاقوۆا, جامال كالەنوۆا, كۇلپاش قالقابەكوۆا, بايان قاپاشەۆا, ساپا قايىرجان-تەگى, كەنجەتاي نۇركەنوۆا, نەسىبەلدى ورال, بەيسەكۇل راحىمباەۆا, سامال سابىروۆا, ايسۇلۋ سەيداحمەتوۆا, سافۋرا سەيتماعامبەتوۆا, كۇلجان توقباەۆا, دامەش شاكەرقىزى سەكىلدى اجەلەرىمىز سالت-ءداستۇرىمىزدىڭ ءتۇر-ءتۇرىن كورسەتە ءبىلدى. دەگەنمەن قۋات راحيمجانوۆ پەن ايسۇلۋ سەيداحمەتوۆا 1-ورىنعا يە بولدى.
بايقاۋدا جۇلدەگە قول سوزعان ارداگەرلەردىڭ بارىنە ارنايى ديپلومدار, العىس حاتتار مەن سىيلىقتار تابىس ەتىلدى. ەڭ باستى سىيلىق حالىقتىڭ قوشەمەتى بولدى, ارينە.
ماعىنالى دا مازمۇندى شارانىڭ سوڭىندا قاتىسۋشىلار مەن قوناقتارعا بايقوڭىر اۋدانى اكىمدىگى اتىنان ورازا ايتىنا ارنالعان مەرەكەلىك داستارقان جايىلدى. مۇندا دا ءان اۋەلەپ, كۇي كۇمبىرلەدى.
تۇيىندەپ ايتارىمىز, بايقوڭىر اۋدانىنىڭ يگى باستاماسى ەلوردامىزدىڭ رۋحاني تىرشىلىگىنە ءبىر سەرپىن بەرگەندەي بولدى. سالت-ءداستۇرىمىزدى اسپەتتەگەن اتالارىمىز بەن اجەلەرىمىزگە ونەرىنە ءسۇيسىنىپ, جانكۇيەر بولعان كوپشىلىكتىڭ كوڭىل كۇيىنە قاراپ وسىنداي وي تۇيدىك. اقجولتاي دەمەكپىز.
