عىلىم, ءبىلىم جانە ءوندىرىس
وسى ءۇش باعىتتىڭ اراسىندا جۇيەلى بايلانىس ورناسا, ەلىمىزدىڭ اۋىل شارۋاشىلىعى اياعىن نىق باسادى.
قازاقستان پرەزيدەنتتىگىنە ۇمىتكەر تولەۋتاي راقىمبەكوۆ الماتى وبلىسىنا بارعان ساپارىندا وسى ماسەلەنى جەرگىلىكتى ماماندارمەن تالقىلادى. بۇعان قوسا, ول جاقىندا اشىلعان اگروباق پەن سالاعا قىزمەت ەتەتىن اۆياتسيا وكىلدەرىمەن دە كەزدەستى. ۇمىتكەردىڭ پىكىرىنشە, اۋىل شارۋاشىلىعىن عارىش, اۆياتسيا, درونداردىڭ جەتىستىكتەرىن قولدانباي, ەكونوميكانى دامىتۋ مۇمكىن ەمەس.
شىعىس جۇرتشىلىعىمەن جۇزدەستى
قازاقستان پرەزيدەنتتىگىنە ۇمىتكەر قاسىم-جومارت توقاەۆتىڭ رەسپۋبليكالىق قوعامدىق شتابى وكىلدەرى شىعىس قازاقستان وبلىسى جۇرتشىلىعىمەن كەزدەسىپ, ۇمىتكەردىڭ سايلاۋالدى باعدارلاماسى تۋرالى جان-جاقتى ماعلۇمات بەردى.
باعدارلاما ساباقتاستىق, ادىلدىك, ورلەۋ قاعيدالارىنا تابان تىرەيتىنىن ايتقان شتاب باسشىسى ماۋلەن اشىمباەۆ ۇمىتكەردىڭ الدىندا تۇرعان باستى مىندەتتەر حالىقتىڭ ءال-اۋقاتىن ارتتىرۋ, ءبىلىم بەرۋ مەن دەنساۋلىق ساقتاۋ سالاسىن جاقسارتۋ, ينفراقۇرىلىمدى دامىتۋ, اۋىلدىق جەرلەردە ءومىر ءسۇرۋ ساپاسىن كوتەرۋ ەكەنىن جەتكىزدى.
دومبىرا – بابالاردىڭ ءۇنى
پرەزيدەنتتىككە ۇمىتكەر سادىبەك تۇگەل اتىراۋ وبلىسىنىڭ حالقىمەن كەزدەسىپ, بابالاردان قالعان سالت-داستۇرلەرىمىزدى كوزدىڭ قاراشىعىنداي ساقتاۋعا ۇندەدى.
اتىراۋلىقتارمەن باسقوسۋ حالىق قولونەر شەبەرلەرىنىڭ شەبەرلىك دارىستەرىمەن باستالدى. «ءار قازاق ءۇشىن دومبىرا – ۇلى حالىقتىڭ ۇلتتىق رۋحىنىڭ ءبىر بەلگىسى. باسقا ەشبىر مۋزىكالىق قۇرال دومبىراداي ۇلتتىق رۋحتى كوتەرىپ, حالىقتى بىرىكتىرە المايدى. سوندىقتان ءار بالاعا مەكتەپ جاسىنان دومبىرا تارتۋدى ۇيرەتەيىك» دەدى س.تۇگەل.
اشىق ەسىك كۇنىن وتكىزدى
پرەزيدەنتتىككە ۇمىتكەر دانيا ەسپاەۆا كەشە اشىق ەسىك كۇنىن وتكىزىپ, ءوزىنىڭ باسقا ۇمىتكەرلەردەن ارتىقشىلىعىن اتادى. «بۇل سايلاۋ ناۋقانىنداعى تۇڭعىش جانە جالعىز ايەل بولۋىم – باستى ارتىقشىلىعىم.
ءبىز قازاقستاننىڭ بارلىق ءوڭىرىن ارالاپ شىقتىق. كەزدەسۋلەردە ەلىمىزدەگى سايلاۋشىلاردىڭ 52 پايىزىنىڭ ايەلدەر ەكەنىن ءجيى ايتامىن. ءبىر قىزىعى, بۇل جيىنداردا مەنى ايەلدەر عانا ەمەس, جاستار دا قولداۋدا. مەنىڭ بۇل ناۋقانعا شىعۋىم ايەلدەر دە ءوزىن ۇسىنا الادى دەگەن دەموكراتيانىڭ بەلگىسى بولدى» دەپ مالىمدەدى ۇمىتكەر.
مەرەكەلىك فلەشموب وتكىزدى
پرەزيدەنتتىككە ۇمىتكەر امانگەلدى تاسپيحوۆتىڭ سەنىمدى وكىلدەرى نۇر-سۇلتان قالاسىندا جانە الماتى وبلىسىندا مەملەكەتتىك رامىزدەر كۇنىنە وراي مەرەكەلىك فلەشموب وتكىزدى.
باس قالاداعى ساياباقتا كاسىپوداقتاردىڭ 200-دەن اسا بەلسەندى جاسى جينالدى. ولار بي بيلەپ, حالىقتىڭ كوڭىلىن كوتەردى. بيمەن جاسالعان فلەشموبتىڭ كەيىپكەرلەرى كادىمگى ەڭبەك ادامدارى بولدى. ا.تاسپيحوۆتىڭ باعدارلاماسى جۇمىسشىلاردىڭ ەڭبەك قۇقىقتارىن قورعاۋعا نەگىزدەلگەن.
وتاندىق ونىمگە سۇرانىس ارتۋى كەرەك
پرەزيدەنتتىككە ۇمىتكەر جامبىل احمەتبەكوۆ وسكەمەندەگى ەكونوميكا جانە قارجى كوللەدجىنىڭ وقىتۋشى-پروفەسسورلارىمەن جانە ستۋدەنتتەرىمەن كەزدەستى.
ول حالىققا سايلاۋالدى تۇعىرناماسىن تانىستىردى. «قكحپ اگروونەركاسىپتىك كەشەن ونىمدەرىنە تۇتىنۋشىلىق سۇرانىستى ىنتالاندىرۋ باعدارلاماسىمەن بىرگە كەدەيلىكپەن كۇرەس باعدارلاماسىن دا قابىلداۋىمىز كەرەك. ءبىزدىڭ پارتيا ونى ىسكە اسىرۋدى جانە وتاندىق ونىمدەرگە دەگەن سۇرانىستى ارتتىرۋدى بىرنەشە رەت ۇسىندى» دەدى ۇمىتكەر.
عالامتوردا ەمەس, ومىردە جۇزدەسكەن ارتىق
پرەزيدەنتتىككە ۇمىتكەر ءامىرجان قوسانوۆ ورال قالاسىندا بولىپ, سايلاۋشىلارمەن جۇزدەستى.
«ارينە, زاماناۋي تەحنولوگيالار مەن كوممۋنيكاتسيالار ادامدارعا عالامتوردا جۇزدەسۋگە مۇمكىندىك بەرەدى. بەينەكونفەرەنتسيالاردىڭ دا بەرەرى مول. بىراق عالامتوردا ەمەس, ءار اداممەن ومىردە جۇزدەسكەن ارتىق. سول سەبەپتەن سىزدەرگە ارنايى كەلدىم» دەدى ۇمىتكەر. ول باسقوسۋ بارىسىندا حالىقتى تولعاندىرعان ساۋالدارعا جاۋاپ بەردى.
